Friday, December 23, 2011

പഞ്ചവടിപ്പാലം ഓര്‍മ്മ പെടുത്തുന്നത്.


 1984  മോഡല്‍ സിനിമ.
നാട്ടിന്റെയും നാട്ടാരുടേയും നാട്ടു കള്ളന്മാരുടെയും കരിഞ്ചന്തക്കാരുടെയും കഥ. കെ.ജി. ജോര്‍ജ്ജ് അന്ന് പറഞ്ഞു വെച്ചത് കേരളത്തിനു എക്കാലത്തേക്കും വേണ്ടിയുള്ള കഥ തന്നെ.

മുല്ലപ്പെരിയാറിന്റെ പേരില്‍ ഒഴുക്കപ്പെടുന്ന മുതല കണ്ണീര്‍  പഞ്ചവടിപ്പാലത്തെ വീണ്ടും ഓര്‍മ്മയിലേക്ക് കൊണ്ട് വരുന്നു.

ദുശാസനക്കുറുപ്പ്, മണ്ഡോദരിയമ്മ, ശിഖണ്ഡിപ്പിള്ള, യൂദാസ് കുഞ്ഞ്,  ബറാബാസ്, അനാര്‍ക്കലി, അവറാച്ചന്‍, സ്വാമി, ആബേല്‍, രാഹേല്‍, ഇസഹാക്ക്, തരകന്‍, ജഹാംഗീര്‍, കാതരോയന്‍, പൂതന, അങ്ങിനെ മിക്കവാറും വെള്ളിത്തിരയില്‍ മുപ്പതാണ്ട് മുന്നേ മിന്നി മറഞ്ഞ കഥാ പാത്രങ്ങള്‍ ഒക്കെയും ഇന്ന് മുല്ലപ്പെരിയാറിന്റെ വേദിയില്‍ പുനര്‍ജ്ജനിച്ചിരിക്കുന്നു.

ദേണ്ടെ ദുശ്ശാസന കുറുപ്പ് കത്തിക്കയറുകയാണ്...


അങ്ങിനെ പാലം...
സോറി അണക്കെട്ട് അപകടത്തില്‍ ആയിക്കഴിഞ്ഞു.

അഴിമതിയുടെ അക്ഷയ ഖനിയാണ് തുറക്കപ്പെടാന്‍ പോകുന്നത്. 

ഇന്നി  ബറാബസിന്റെ ഊഴം.അത് എപ്പോള്‍ വേണമെങ്കിലും സംഭവിക്കാം...ഒരു കറുത്ത വാവിന്റെ അകലത്തില്‍  ബറാബസ് ഉണ്ട്. ഏതു നിമിഷം  വേണമെങ്കിലും ബറാബസ് കാത്തിരിപ്പ് അവസാനിപ്പിച്ചേക്കാം....

പാലം... സോറി..
അണക്കെട്ട് അപകടത്തില്‍ ആണ്. പക്ഷെ ഒഴുകി പോകുന്ന ജീവനുകള്‍ അല്ല ഇപ്പോള്‍ ഒഴുക്കപ്പെടുന്ന  മുതല കണ്ണീരിന്റെ ഹേതു. അത് അനന്തമായ അഴിമതിയുടെ വാതായനങ്ങള്‍ തുറക്കപ്പെടുന്നത് കാണുമ്പോള്‍ ഉണ്ടാകുന്ന ആനന്ദ കണ്ണീര്‍ ആണ്.

ഈശ്വരാ രക്ഷിതോ... യൂദാസ് കുഞ്ഞന്മാരുടെ ഒറ്റില്‍ നിന്നും - ഈ തുണ്ട് ഭൂമിയെ!

Monday, December 19, 2011

ഗീബത്സിന്റെ ജാര സന്തതികള്‍ !


ഗീബല്സ്  ആത്മ ഹത്യ ചെയ്തത്   മക്കള്‍ ആറു പേരെ സയനൈഡില്‍ അവസാനിപ്പിച്ചു ഭാര്യ മഗ്ദയെ വെടിവെച്ചു  കൊന്നിട്ടാണ്. ഗീബത്സിന്റെ പരമ്പര അതോടെ അന്ന് അഡോള്‍ഫ് ഹിട്ലരിനോടൊപ്പം ചത്തൊടുങ്ങി എന്ന് ചരിത്രം. പക്ഷെ ഗീബത്സിന്റെ സന്തതി പരമ്പര ഇന്നും ജീവിച്ചിരിക്കുന്നു. ഇങ്ങു കൊച്ചു കേരളത്തില്‍...  അത് പക്ഷെ ഗീബത്സിന്റെ ജാര സന്തതി  പരമ്പര ആണെന്ന് മാത്രം.

നാസി ജര്‍മനയില്‍ ഹിട്ലരുടെ എല്ലാ കൊള്ളരുതായ്മകള്‍ക്കും വെള്ള പൂശുകയായിരുന്നു അദ്ദേഹത്തിന്റെ പ്രോപ്പഗണ്ടാ   മിനിസ്ടര്‍ ആയിരുന്ന  ഗീബല്സില്‍ നിക്ഷിപ്തം ആയിരുന്ന കര്‍ത്തവ്യം. "ഒരു കളവു പല  വട്ടം പറഞ്ഞാല്‍ അത് സത്യം ആയി മാറും" എന്ന ലോക തത്വത്തിന്റെ ഉപജ്ഞാതാവ്.  പക്ഷെ മലയാളക്കരയില്‍  ഗീബത്സിന്റെ ജാര സന്തതി പരമ്പര തിമിര്‍ത്താടുകയാണ്. പത്തു തവണ പറഞ്ഞാല്‍ ഏത് കളവും ഇന്ന് ഭൂമി മലയാളത്തില്‍ സത്യം ആയി മാറും. ഓരോ നേതാവും ഓരോ  പാര്‍ട്ടിയും  ഓരോ പ്രോപ്പഗണ്ടാ മിനിസ്ടരും ആണ്. കളവുകള്‍ മാത്രം പറഞ്ഞു കൊണ്ടിരിക്കുന്ന, തെറ്റാണു ചെയ്യുന്നത് എന്ന് പൂര്‍ണ വിശ്വാസം ഉള്ള കാര്യങ്ങള്‍ പോലും ഒരിളിപ്പുമില്ലാതെ,  ജനങ്ങള്‍ക്ക്‌ വേണ്ടി എന്ന് ആണയിടാന്‍ കഴിയുന്ന ഗീബത്സിന്റെ ജാര സന്തതികള്‍...

മുഖ്യ മന്ത്രി മുതല്‍ പ്രതി പക്ഷ നേതാവ് വരെ ഒരെണ്ണം പോലും സത്യം പറയില്ല. എല്ലാവരും എപ്പോഴും ജനപക്ഷത്ത് ആണ് എന്ന വ്യജേന നാടിന്റെ നന്മകളെ ഊറ്റി കുടിക്കും. ജനമോ എപ്പോഴും മറു പക്ഷത്തും. ജനപക്ഷത്തു നില്‍ക്കുന്ന ഏതെങ്കിലും ജനകീയന്‍ ഉണ്ടെങ്കില്‍ അവനെ ഗീബല്സീയന്‍ സിദ്ധാന്ധത്തില്‍ മുക്കി കൊല്ലും. അണികള്‍ തെരുവില്‍ തല്ലി മരിക്കും. അഴിമതിയില്‍, പെണ്‍ വാണിഭത്തില്‍, വ്യാജ  വാറ്റില്‍, കൊട്ടേഷന്‍ സംഘങ്ങള്‍ക്ക് സംരക്ഷണം നല്‍കുന്നതില്‍ എല്ലാം ഒറ്റ കെട്ടും. എപ്പോഴും ഭരണ പ്രതിപക്ഷ കക്ഷികളുടെ ഒരു അധോലോക രാഷ്ട്രീയ അടിത്തറയില്‍ ആണ് മുഖ്യ ധാര രാഷ്ട്രീയം കെട്ടിപ്പടുത്തിരിക്കുന്നത്. പുറമേ നിന്ന് നോക്കിയാല്‍ പരസ്പരം കടിച്ചു കീറാന്‍ വെമ്പല്‍ കൊള്ളുന്ന പ്രത്യായ ശാസ്ത്രങ്ങള്‍. പക്ഷെ അഴിമതിയുടെയും അവമതിയുടെയും ചൂഷണത്തിന്റെയും ജനദ്രോഹത്തിന്റെയും  കാര്യത്തില്‍ എല്ലാ കൊടികളെയും നേതാക്കന്മാരെയും  കൂട്ടി യോജിപ്പിക്കുന്ന ഒരു അദൃശ്യ ചങ്ങല കേരള രാഷ്ട്രീയത്തെ ചൂഴ്ന്നു നില്‍ക്കുന്നു. അത് ഏറ്റവും ഒടുവില്‍ വെളിവാക്ക പെട്ടത് മുല്ലപ്പെരിയാര്‍ വിഷയത്തില്‍ ആണ് താനും.

ചപ്പാത്തെ  സമരം മുഖ്യ ധാര രാഷ്ട്രീയക്കാര്‍ ഏറ്റെടുത്തതിനു ശേഷം പെട്ടെന്ന് സമരത്തിന്റെ ഗതി മാറിയത് ജയലളിത ഒരു പ്രസ്താവന ഇറക്കിയതിനു ശേഷം ആണ്. കമ്പത്തും തേനിയിലും ഉള്ള കേരള നേതാക്കന്മാരുടെ ഭൂ സ്വത്തിന്റെ വിവരം പുറത്തു വിടും എന്ന ഭീഷണിക്ക് ശേഷം സമരങ്ങളുടെ ഗതി മാറി. കേരള സര്‍ക്കാരിന്റെ നില നില്പ് തന്നെ അപകടത്തില്‍ ആക്കാന്‍ തക്ക ശേഷിയുള്ള പിറവം ഉപ തിരഞ്ഞെടുപ്പ് പടിവാതില്‍ക്കല്‍ എത്തി നില്‍ക്കെ ഇടതു പക്ഷത്തിനു വ്യക്തമായ മേല്‍കൈ ലഭിക്കാന്‍ കഴിയും ആയിരുന്ന മുല്ലപ്പെരിയാര്‍ സമര മുഖത്ത്  നിന്നും പിന്മാറാന്‍ തയ്യാറാണെന്ന് സര്‍വ്വ കക്ഷി സംഘം പ്രധാന മന്ത്രിയെ കണ്ടപ്പോള്‍ ആദ്യം പറഞ്ഞത് പിണറായി വിജയന്‍ ആണ്. തുടര്‍ന്ന് സര്‍വ്വ കക്ഷി സംഘത്തില്‍ പെട്ട എല്ലാവരും അതേറ്റു പിടിച്ചു. പ്രധാന മന്ത്രിയില്‍ നിന്നും വ്യക്തമായ  ഒരു ഉറപ്പും ലഭിക്കാതെ തിരിച്ചു പോരും വഴി ഉമ്മന്‍ ചാണ്ടി പറഞ്ഞത് പ്രധാന മന്ത്രി ഉടന്‍ പ്രശ്നത്തില്‍ ഇടപെടും എന്നാണ്. അങ്ങിനെ അല്ല എന്ന് കൃത്യം ആയി അറിയാവുന്ന പ്രതിപക്ഷത്തെ ഒരാള്‍ പോലും ഉമ്മന്‍ ചാണ്ടിയുടെ പ്രസ്താവനയെ എതിര്‍ത്തില്ല. സത്യത്തോട് പുല ബന്ധം പോലും ഇല്ലാത്ത ഒരു സംഗതിയെ സത്യം ആയി അവതരിപ്പിച്ച മുഖ്യ മന്ത്രിയുടെ  ഗീബല്സീയന്‍ പ്രസ്താവനയെ മറ്റെല്ലാ ഗീബല്സുകളും കൈടിച്ചു അങ്ങീകരിക്കുന്ന കാഴ്ചയാണ് പിന്നെ കണ്ടത്.

മുല്ലപ്പെരിയാര്‍ പ്രശ്നത്തില്‍ ജയലളിത തന്റെ പ്രസ്താവനയില്‍ ഉറച്ചു നിന്ന് കൊണ്ട് കേരള ഭൂ ഉടമകളുടെ പേര് വിവരം പ്രഖ്യാപിച്ചാല്‍ തങ്ങള്‍ക്കുണ്ടാകുന്ന നഷ്ടത്തെ കുറിച്ച് കൂട്ടായി ചര്‍ച്ച ചെയ്യാനുള്ള അവസരമാക്കുക ആയിരുന്നു ദില്ലി യാത്രയുടെ രഹസ്യ അജണ്ട എന്ന് തോന്നുന്ന തരത്തില്‍ ആയിരുന്നു സമരത്തിനുണ്ടായ വഴിത്തിരുവുകള്‍.

ഓരോ പാര്‍ട്ടികളും കമ്മിറ്റി കൂടിയതിനു ശേഷം സെക്രട്ടറിയോ പ്രസിടെണ്ടോ വിളിച്ചു കൂട്ടുന്ന പത്ര സമ്മേളനങ്ങളില്‍ ഓരോ തവണയും കേള്‍ക്കുന്നത് ഗീബല്സീയന്‍ ഗീര്‍വാണങ്ങള്‍  ആണ്. പരസ്പരം കണ്ടാല്‍ മുഖം തിരിച്ചു നടക്കുന്ന നേതാക്കന്മാര്‍ ഒരുമിച്ചിരിന്ന് കൂടുന്ന മീറ്റിങ്ങുകളില്‍  ആദ്യമത്യാന്തം തൊഴുത്തില്‍  കുത്തും തമ്മിലടിയും ആയിരിക്കും. എന്നാല്‍ വെളുക്കെ ചിരിച്ചു കൊണ്ട് പത്രക്കാരോട് പറയുക ഒറ്റ കെട്ടായി തീരുമാനം എടുത്തു എന്നും. എടുത്ത തീരുമാനങ്ങള്‍ ഒരു പക്ഷെ ചര്‍ച്ചക്ക് പോലും വന്നിട്ടുണ്ടാവില്ല.

ജനാധിപത്യ വ്യവസ്ഥിതിയില്‍ എല്ലാം അറിയേണ്ടുന്നത് പ്രജകള്‍ തന്നെയാണ്.  ജനാധിപത്യ പാര്‍ട്ടികള്‍ നിലനില്‍ക്കുന്നതും പ്രവര്‍ത്തിക്കുന്നതും പാര്‍ടി പ്രവര്‍ത്തകര്‍ക്ക് വേണ്ടിയല്ല. ജനങ്ങള്‍ക്ക്‌ വേണ്ടിയാണ്. ഓരോ പാര്‍ടിയുടെയും ആശയങ്ങളും സന്ദേശങ്ങളും ജനങ്ങളിലേക്ക് എത്തിക്കുകയും ജന നന്മക്കു വേണ്ടി പ്രവര്‍ത്തിക്കുകയും ആണ് ഓരോ പാര്‍ടി പ്രവര്ത്തകന്റെയും ധര്‍മം. അത് കൊണ്ഗ്രെസ്സ് ആയാലും കമ്മ്യുണിസ്റ്റ്  ആയാലും സംഘപരിവാര്‍ ആയാലും ലീഗ് ആയാലും അങ്ങിനെ തന്നെ. പക്ഷെ ഇപ്പോഴും പാര്‍ട്ടികള്‍ക്ക് ഉള്ളില്‍  നടക്കുന്ന സംഗതികളും ചര്‍ച്ചകളും ജനങ്ങളില്‍ നിന്നും ഒളിച്ചു വെച്ച് ജനത്തെ സുഖിപ്പിക്കുന്ന  പ്രസ്താവനകള്‍ ആണ്  ഓരോ പാര്‍ട്ടിക്കാരും  നടത്തികൊണ്ടിരിക്കുന്നത്.

കണ്ടാല്‍ മുഖം തിരിക്കുന്ന നേതാക്കന്മാര്‍ നിറഞ്ഞ,  അഭിപ്രായങ്ങള്‍ക്ക് അജഗജാന്തരം  ഉള്ള സി.പി.എമ്മില്‍ വിഭാഗീയത ഉണ്ടോ എന്ന് ചോദിച്ചാല്‍ ഇല്ല എന്ന്  നിര്‍ലജ്ജം പത്രക്കാരോടും ജനത്തോടും പറയും. പക്ഷെ സി.പി.എമ്മില്‍ വിഭാഗീയത ഇല്ലാത്തതു കളവു പറയുന്ന കാര്യത്തില്‍ മാത്രമാണെന്ന് ഇന്ന് ഓരോ സാധാരണ കാരനും അറിയാം.

ലീഗിന്റെ പാര്‍ടി സമ്മേളനത്തിന് ശേഷം സ്ഥിരം ആയി കേള്‍ക്കുന്ന ഒരു പ്രസ്താവനയാണ് "എല്ലാം പാണക്കാട് തങ്ങളുടെ തീരുമാനത്തിന് വിട്ടു" എന്നത്. അതും പേരും  നുണയാണ്. കേരള രാഷ്ട്രീയത്തില്‍ പാണക്കാട് തറവാട്ടിന്  മാത്രമായി എന്തെങ്കിലും തീരുമാനം എടുക്കാന്‍ കഴിയുമോ? തീരുമാനം എടുക്കുക എല്ലായിപ്പോഴും   കുഞ്ഞാലി കുട്ടി തന്നെയായിരിക്കും. പക്ഷെ പറയുന്നതോ പാണക്കാട്  തങ്ങള്‍ എല്ലാം തീരുമാനിക്കും എന്ന കളവും.

കോണ്‍ഗ്രസ്‌  മീറ്റിങ്ങുകളില്‍ അജണ്ട ഒന്നും, ചര്‍ച്ച വേറൊന്നും, തീരുമാനം മറ്റൊന്നും ആയിരിക്കും. തുടര്‍ന്ന്, പത്രക്കാരോടും ജനത്തോടും വിശദീകരിക്കുന്നത് ഇതൊന്നും അല്ലാത്ത മറ്റു  എന്തെങ്കിലും ഒക്കെ ആയിരിക്കുകയും ചെയ്യും. പത്ര സമ്മേളനത്തിലെ വിശദീകരണം കേള്‍ക്കുമ്പോള്‍  തങ്ങള്‍ ഉള്‍പെട്ട മീറ്റിങ്ങില്‍ എടുത്ത തീരുമാനം ആണോ ഇതെന്ന രീതിയില്‍ അന്തം വിട്ടിരിക്കുന്നത് കാണാം - ചില സാധുക്കള്‍. ചിലപ്പോഴെങ്കിലും പ്രതികരിക്കുന്നത് വി.എം.സുധീരന്‍ മാത്രവും! ഓരോ നേതാവും ഓരോ ഗ്രൂപ്പ്‌ ആയ കോണ്‍ഗ്രസില്‍ ചര്‍ച്ചകള്‍ ഓരോരോ വഴിക്കായിരിക്കും എങ്കിലും തീരുമാനം ഏകഖണ്ഡം ആയിട്ടാണെന്ന് പച്ച കള്ളം പത്രക്കാര്‍ക്ക് മുന്നില്‍ എഴുന്നുള്ളിക്കാന്‍ പ്രസിടെന്റിനു ഒരു മനസാക്ഷി കുത്തും ഉണ്ടാവാറില്ല.

പത്ര സമ്മേളനം വിളിച്ചിട്ട് "ലീഗിന് അഞ്ചു മന്ത്രി സ്ഥാനം യൂ.ഡി.എഫ് സര്‍ക്കാരില്‍ ഉണ്ടാകും" എന്ന് പോയ നിയമ സഭാ തിരഞ്ഞെടുപ്പിന് ശേഷം പ്രസ്താവിച്ച പാണക്കാട് തങ്ങള്‍ക്കു അറിയാം - അതൊരു വെറും വാക്കാണെന്നും അങ്ങിനെ ഒരു തീരുമാനം എടുത്തിട്ടില്ല എന്നും. എന്നിട്ടും യാതൊരു വിധ ഭാവ വിത്യാസവും ഇല്ലാതെ ആണ് ആ പ്രസ്താവന ലീഗിന്റെ ആത്മീയ നേതാവ് പുറപ്പെടുവിച്ചത്. മഞ്ഞളാം കുഴി അലിയുടെ അനുയായികളെ തൃപ്തി പെടുത്താന്‍ അങ്ങിനെ ഒരു പ്രസ്താവന ലീഗ് നേതാവിന് വേണ്ടി വന്നു എന്നതാണ് വസ്തുത. ആത്മീയ നേതാവും കേരളത്തില്‍ ഗീബല്സീയന്‍ പ്രഭാവത്തില്‍ തന്നെ! ആ കളവിന്റെ തുടര്‍ കളവുകള്‍ ഇടയ്ക്കിടയ്ക്ക് ഇപ്പോഴും അലയടിക്കുന്നത് കേള്‍ക്കാം.

പോയ സര്‍ക്കാരിന്റെ കാലത്ത് അവസാനം ആയി അവതരിപ്പിച്ച ബജറ്റില്‍ ഡോക്ടര്‍ തോമസ്‌ ഐസക് പറഞ്ഞ ഒരു ഹിമാലയന്‍ കളവായിരുന്നു നാല്‍പതിനായിരം കോടി രൂപ മുടക്കി കേരളത്തിലെ റോഡുകള്‍ നവീകരിക്കും എന്നത്. ഫണ്ട് കൊണ്ട് വരുന്നത് ഭാവിയില്‍ തുടങ്ങാന്‍ പോകുന്ന അല്‍ബറാക് ഇസ്ലാമിക് ബാങ്കില്‍ നിന്നും വായ്പ എടുത്തിട്ടും. ബാങ്ക് തുടങ്ങിയിട്ട് പോലും ഇല്ല. ഇല്ലാത്ത ബാങ്കില്‍ നിന്നും കിട്ടാത്ത വായ്പ കൊണ്ട് കേരളത്തിന്റെ റോഡു വികസനം. കളവാണെന്ന് ഐസക്കിന് അറിയാം. എന്നിട്ടും അത് ബജറ്റില്‍ ഉള്‍പെടുത്താന്‍ തക്ക ചങ്കൂറ്റം ഉണ്ടാകുന്നത് രക്തത്തില്‍ ഗീബത്സിന്റെ പാരമ്പര്യം  ഇഴകി ചേര്‍ന്നിരിക്കുന്നത് കൊണ്ട് മാത്രമാണ്.

കണ്ണൂര്‍ ജില്ലാ സെക്രട്ടറി പി. ശശി അവധിയില്‍ പ്രവേശിച്ച കാര്യം വെളുപ്പെടുത്തിയ പിണറായി വിജയന്‍റെ പത്ര സമ്മേളനത്തില്‍ കല്ല്‌ വെച്ച നുണ പറയുമ്പോഴും അദ്ധേഹത്തിന്റെ ശരീര ഭാഷയില്‍ ഒരു വ്യതിയാനവും ഉണ്ടായിരുന്നില്ല. പെണ്‍ കേസില്‍ സഖാവിനെ പുറത്താക്കുക ആയിരുന്നു എന്ന പകല്‍ പോലത്തെ സത്യം മറച്ചു വെച്ച് എത്ര തന്മയത്വത്തോടെ ആണ് പാര്‍ട്ടി  സെക്രട്ടറി പത്രക്കാരുടെയും ജനങ്ങളുടെയും മുന്നില്‍ പച്ച കള്ളം പറഞ്ഞത്. അതേ കള്ളം അന്ന് ആഭ്യന്തര മന്ത്രിയായിരുന്ന കൊടിയേരിയും അതേ പടി ആവര്‍ത്തിച്ചു. നട്ടാല്‍ കുരുക്കാത്ത നുണ പറയുന്നത് നാടിന്റെ ആഭ്യന്തര മന്ത്രി ആയിരുന്നു എന്നോര്‍ക്കണം!

കളവുകളില്‍ നിന്നും കളവുകളിലെക്കുള്ള ഞാണിന്‍മേല്‍ കളിയാണ് ഇന്നത്തെ കേരള രാഷ്ട്രീയം.  അഴിമതി ആരോപണങ്ങള്‍ പോലും കല്ല്‌ വെച്ച നുണകള്‍ ആണ്. കൃത്യമായി സംഭവിക്കുന്ന  അഴിമതികള്‍ പുറത്ത് വരാതിരിക്കാന്‍ ഓരോരുത്തരും പരസ്പരം സഹായിക്കുകയും ചെയ്യും. ഇല്ലാത്ത അഴിമതികഥകള്‍ വിളിച്ചു പറഞ്ഞു കോലാഹലം ഉണ്ടാക്കി യഥാര്‍ത്ഥ അഴിമതികളെ മറച്ചു വെക്കാനാണ് നേതാക്കന്മാര്‍ പരസ്പരം ശ്രമിക്കുന്നത്. അഴിമതിയില്‍ മുങ്ങി കേരളം നില്‍ക്കുമ്പോഴും ഒരു അഴിമതിക്കാരും പിടിക്കപെടാത്തതും ശിക്ഷിക്കപെടാത്തതും ആരോപിക്കുന്നവരും ഇരകളും തമ്മിലുള്ള ഇഴയടുപ്പം കൊണ്ടാണ്.

നാസി ജര്‍മനിയോടും അഡോള്‍ഫ് ഹിട്ലരോടും ദേശീയ സോഷ്യലിസത്തോടും ഗീബല്സിനു കൂറ് ഉണ്ടായിരുന്നു. താന്‍ വിശ്വസിച്ച പ്രത്യായ ശാസ്ത്രത്തിനും ജനതക്കും നേതാവിനും വേണ്ടിയാണ് ഗീബല്സ് കളവുകള്‍ പ്രചരിപ്പിച്ചു കൊണ്ടേയിരുന്നത്. പക്ഷെ ഭൂമി മലയാളത്തിലെ ഗീബത്സിന്റെ ജാര സന്തതികള്‍ക്ക് കൂറ് തങ്ങളുടെ കീശകളോട് മാത്രമാണ്. തങ്ങളുടെ തല്പര്യങ്ങളോട് മാത്രമാണ്. ജനതയോടോ,അണികളോടോ, എന്തിനു ആശ്രിതരോടോ പോലും ലവലേശം ആത്മാര്‍ഥതയോ  സ്നേഹമോ താല്പര്യമോ ഉണ്ടെന്നു തെറ്റിദ്ധരിക്കേണ്ട. ഗീബല്സും മലയാള രാഷ്ട്രീയവും തമ്മില്‍ അല്പം എങ്കിലും വേറിട്ട്‌ നില്‍ക്കുന്നത് ഇക്കാര്യത്തില്‍ ആണ് താനും. അവിടെയും ഭേതം ഗീബല്സു ആണ്!

നുണപരിശോധനാ യന്ത്രങ്ങള്‍ക്കു  പോലും കേരള രാഷ്ട്രീയത്തിലെ നുണകളെ വേര്‍തിരിച്ചെടുക്കാന്‍ കഴിയില്ല. നുണ പറയുമ്പോള്‍ ഉണ്ടാകുന്ന തലച്ചോറിന്റെ  വ്യതിയാനങ്ങള്‍ ആണല്ലോ നുണ പരിശോധനാ യന്ത്രത്തിന്റെ വിജയത്തിന് അടിസ്ഥാനം. ഗീബത്സിന്റെ നുണകള്‍ ഗീബല്സിനെ സംബന്ധിച്ചിടത്തോളം സത്യം ആയതിനാല്‍ ശരീര ചലനങ്ങളിലും തലച്ചോറിലും ഒരു വ്യതിയാനവും ഉണ്ടാക്കില്ല. കേരളത്തിന്റെ  രാഷ്ട്രീയ നേതാക്കന്മാരെ നുണ പരിശോധനക്ക് വിധേയം ആക്കിയാലും സ്ഥിതി അതായിരിക്കും. നുണ പരിശോധനാ യന്ത്രം നാണിച്ചു തല താഴ്ത്തും. 

Friday, December 16, 2011

തലപ്പാവുകാരന്റെ തല തിരിഞ്ഞ സാമ്പത്തിക നയങ്ങള്‍


ണ്ടായിരത്തി എട്ടിലെ കെണിയില്‍ നിന്നും നാം രക്ഷപെട്ടു. അതു പക്ഷേ മുജ്ജന്മ സുക്രുതം. പക്ഷേ ഇപ്പോ പെടും എന്നാണു തോന്നുന്നത്. അല്ല പെട്ടു എന്നതു തന്നെയാണു ശരി. ഭാരതത്തിലെ സാമ്പത്തിക രംഗം മുച്ചൂടും നശിപ്പിച്ചത് സാമ്പത്തിക വിദഗ്ദനായ മന്മോഹന്‍ സിങ്ങ് തന്നെയാണ് എന്ന് ഒരാള്‍ അനുമാനിച്ചാല്‍ അതിനെ എതിര്‍ക്കാന്‍ കടുത്ത മന്മോഹന ഭക്തന്മാര്‍ക്കു പോലും കഴിയും എന്നു തോന്നുന്നില്ല. ആഗോള വല്‍ക്കരണം കൊണ്ടു ഒരു രാജ്യത്തിന്റെ സാമ്പത്തിക സ്ഥിതിയും രക്ഷപെട്ടിട്ടില്ല എന്ന  സത്യം മുന്നില്‍ വാ പിളര്‍ന്നു നില്‍ക്കുമ്പോഴും ഭാരത്തിനു ഒരിക്കലും അനുഗുണം അല്ലാത്ത ആഗോള വല്‍ക്കരണവും സ്വകാര്യ വല്‍ക്കരണവും അടിച്ചേല്‍പ്പിക്കാന്‍ ശ്രമിക്കുന്നതാണ് ഭാരതത്തിന്റെ സാമ്പത്തിക രംഗം അപകടകരമായ അവസ്ഥാ വിശേഷത്തിലേക്കു വീഴാന്‍ കാരണം.

ഭാരതത്തിന്റെ ആത്മാവ് ഗ്രാമങ്ങളില്‍ ആണെന്ന വചനം നമ്മള്‍ മനപൂര്‍വ്വം മറന്നു. വിദേശ ഫണ്ടുകള്‍ ഭാരതത്തെ അങ്ങു ദത്തെടുക്കും എന്നു ധരിച്ചവശായ മന്മൊഹനനും കൂട്ടരും ഭാരതത്തിന്റെ ആത്മാവിനെ വരെ വിറ്റു തുലക്കുന്നിടത്ത് കാര്യങ്ങല്‍ എത്തി നില്‍ക്കുന്നു. ചോരയുള്ളിടത്തേ കൊതുകിനു കൌതുകം ഉണ്ടാവുള്ളൂ. ചൂഷണത്തിനു സാധ്യതയുള്ളിടത്തേ വിദേശ ഫണ്ടുകള്‍ക്കും താല്പര്യം ഉണ്ടാവുള്ളൂ എന്നര്‍ത്ഥം. പണപ്പെരുപ്പം നാല്പതു ശതമാനത്തിനും മുകളില്‍ എത്തി സാമ്പത്തിക രംഗം മുച്ചൂടും മുടിഞ്ഞു പോയ മെക്സിക്കോ ഒന്നാന്തരം ഉദാരണം. അടുത്തിടെ പാപ്പര്‍ സ്യൂട്ടായ ഐസ്‌ലാന്റ് ഏറ്റവും ഒടുവിലത്തെ സാക്ഷ്യം.  ഒരു കാലത്ത് ആഗോള വല്‍ക്കരണത്തിന്റേയും സ്വകാര്യ വല്‍ക്കരണത്തിന്റേയും സ്വര്‍ഗ്ഗമായിരുന്നു തകര്‍ന്നടിഞ്ഞ ഈ രാജ്യങ്ങള്‍ ഒക്കെയും.

എല്ലാം തകര്‍ന്നു. അല്ലെങ്കില്‍ തകര്‍ന്നു കൊണ്ടേയിരിക്കുന്നു. ഗ്രീസ്, ഇറ്റലി, പൊര്‍ച്ചുഗല്‍ അങ്ങിനെ അങ്ങിനെ തകര്‍ന്നടിയുന്ന സാമ്പത്തിക ശക്തികള്‍ നമ്മുക്ക് മുന്നില്‍ ഉണ്ട്. ആദ്യം തന്നെ അമേരിക്ക പൊട്ടി. ബ്രിട്ടനും അതിന്റെ പിറകേ... ആഗോള വല്‍ക്കരണവും സ്വകാര്യ വല്‍ക്കരണവും ഒരിക്കലും ഒരു രാജ്യത്തെയും രക്ഷപെടുത്തിയിട്ടില്ലാ എന്നു ഭാരതത്തിന്റെ മുഴുവന്‍ ജനങ്ങളും മനസ്സിലാക്കിയാലും ഭാരതത്തിലെ ഏറ്റവും പ്രശസ്ഥനായ ഒരു സാമ്പത്തിക വിദഗ്ദനു അതു മനസ്സിലാകുന്നില്ല. അയാള്‍ ഭാരതത്തിന്റെ പ്രധാനമന്ത്രിയായി പോയി എന്നതു ഭാരതത്തിന്റെ ഗതികേട്!

"കക്കുന്തോറും മുടിയും... മുടിയുന്തോറും കക്കും."
ഇതിനെ അന്വോര്‍ത്വം ആക്കുന്നതാണ് മന്മോഹന്‍ സിങ്ങിന്റെ ഭരണ പരിഷ്കാരങ്ങള്‍. എല്ലാ മുതലാളിത്വ രാജ്യങ്ങളും കരുതുന്നതു പോലെ മന്മോഹന്‍ സിങ്ങും ധരിക്കുന്നതു ഒഹരി വിപണിയാണ് നാടിന്റെ ആത്മാവ് എന്നാണ്. ഓഹരി വിപണി ഉയര്‍ന്നു നിന്നാല്‍ പുറം ലോകം വെറുതേ അങ്ങു ധരിച്ചോളും രാജ്യത്തിന്റെ സാമ്പത്തിക സ്ഥിതി വളരെ ശക്തമാണെന്നു. ശ്രദ്ധമുഴുവനും ഓഹരി വിപണിയില്‍ കേന്ദ്രീകരിച്ചിരിക്കുന്ന നാടിന്റെ ആസൂത്രണ വിദഗ്ദര്‍ കണ്ടില്ലാന്നു നടിച്ചത് അനുനിമിഷം തകര്‍ന്നടിയുന്ന കാര്‍ഷിക മേഖലയെയാണ്. ഉണ്ണാനുള്ളത് പ്രാദേശികമായി തന്നെ ഉല്പാദിപ്പിക്കന്‍ കഴിയാതെ വന്നാല്‍ ദാരിദ്ര്യം ആയിരിക്കും ഫലം എന്നത് മന്മോഹന സിങ്ങിനും കൂട്ടര്‍ക്കും അറിയാത്തതൊന്നും അല്ല. പക്ഷേ അവര്‍ക്ക് എപ്പോഴും താല്പര്യം ഭാരതത്തെ മറ്റൊരു അമേരിക്ക ആക്കുക എന്നതാണ്. അതിനു വേണ്ടിയുള്ള നയ രൂപീകരണങ്ങളാണ് നമ്മുടെ സാമ്പത്തിക വിദഗ്ദര്‍ നടത്തി കൊണ്ടേയിരിക്കുന്നത്. അമേരിക്കക്ക് എപ്പോഴെങ്കിലും ഒരു പക്ഷേ ഇന്‍ഡ്യ ആകാന്‍ കഴിയുമായിരിക്കും. പക്ഷേ ഒരിക്കലും... ഒരിക്കലും ഭാരതത്തിനു അമേരിക്ക ആകാനേ കഴിയില്ല തന്നെ.

സാമ്പത്തിക പ്രതിസന്ധി തുടങ്ങിയതു അമേരിക്കന്‍ ബാങ്കുകള്‍ പാപ്പരായതു മുതലാണല്ലോ? അതു തുടങ്ങിയത് ഭവനവായ്പകള്‍ കിട്ടാകടങ്ങള്‍ ആയതു മുതലാണ്. ലാഭം മാത്രം നോക്കി ഈടിന്റെ യഥാര്‍ത്ഥ മൂല്യം കണക്കാക്കാതെ വന്‍ പലിശക്ക് വീടിന്റെയോ ഭൂമിയുടേയോ വിലയുടെ തൊണ്ണൂറു ശതമാനമോ അതിലധികമോ വായ്പ അനുവദിച്ച നിമിഷം തന്നെ ബാങ്കിങ്ങ് തകര്‍ച്ചയുടെ ഒന്നാം ഘട്ടം ആരംഭിക്കുകയായിരുന്നു. കാരണം, ഭൂമിയുടെ അല്ലെങ്കില്‍ കെട്ടിടത്തിന്റെയോ വില റിയല്‍ എസ്റ്റേറ്റ് കമ്പനികളാല്‍ ഊതി വീര്‍പ്പിച്ചു നിര്‍ത്തുകയായിരുന്നു.  തിരിച്ചടവ് മുടങ്ങിയപ്പോള്‍ ബാങ്കുകള്‍ ഈട് പിടിച്ചെടുത്ത് ലേലത്തിനു വെച്ചു. ലേലം കൊള്ളാന്‍ ആളില്ല. ഈടിനു നല്‍കിയ വായ്പക്ക് തുല്യം വില വരാതെ അല്ലെങ്കില്‍ എടുക്കാന്‍ ആളില്ലാതെ കിട്ടാക്കടങ്ങള്‍ പെരുകിയപ്പോള്‍ ബാങ്കുകളുടെ പ്രവര്‍ത്തനം താറുമാറായി. തൊഴിലുകള്‍ വെട്ടികുറക്കപെട്ടു തുടര്‍ന്നു ക്രെഡിറ്റ് കാര്‍ഡുകളും വാഹന വായ്പകളും വ്യക്തി ഗത വായ്പകളും കിട്ടാക്കടങ്ങള്‍ ആയി തുടങ്ങി. അങ്ങിനെ ധനകാര്യ സ്ഥാപനങ്ങളുടെ തകര്‍ച്ച സമ്പൂര്‍ണ്ണമായി. ആഗോളവല്‍ക്കരണം ഒരു ഹിസ്റ്റീരിയ ആയി ലോകത്ത് പടര്‍ന്ന കാലഘട്ടം ആയിരുന്നതു കൊണ്ട് അമേരിക്കയില്‍ ഉണ്ടായ സാമ്പത്തിക തകര്‍ച്ച ലോകമെമ്പാടും പടര്‍ന്നു പിടിക്കാന്‍ കൂടുതല്‍ സമയം ഒന്നും വേണ്ടായിരുന്നു.

തകര്‍ച്ചയുടെ ആ പരമ്പരയില്‍ നിന്നും ഭാരതം രക്ഷപെട്ടത് ഭാരതത്തിന്റെ മികവുറ്റ ബാങ്കിങ്ങ് ഘടനയുടെ പ്രത്യേകത കൊണ്ടായിരുന്നു. ഭൂപണയ വായ്പകളുടെ കാര്യത്തില്‍  ഭാരതീയ ബാങ്കുകള്‍ ഈടിന്റെ മൂല്യം കണക്കാക്കുന്ന രീതിയും ലോണിന്റെ പാറ്റേണും എപ്പോഴും ഈടിന്റെ മൂല്യം വായ്പയുടെ മൂല്യത്തിനു മുകളില്‍ നിര്‍ത്താന്‍ ഭാരതീയ ബാങ്കുകള്‍ക്ക് കഴിയും വിധമാണ്. അതിന് അഭിനന്ദിക്കേണ്ടത് ഇന്ദിരാ ഗാന്ധിയെ ആണ്. അല്ലാതെ മന്മോഹന സിദ്ധാന്ധങ്ങളെ അല്ല. ഇപ്പോഴും ബാങ്കിങ്ങ് മേഖല ഭാരതത്തില്‍ സുദൃഢം തന്നെ. മന്മോഹന സംഘം എത്ര ശ്രമിച്ചിട്ടും അതു തകര്‍ക്കാന്‍ കഴിയാത്തത് ബാങ്കിങ്ങ് മേഖലയിലെ തൊഴിലാളി സംഘടനകളുടെ ഇടപെടല്‍ കൊണ്ടു മാത്രവും.

ബാങ്കിങ്ങ് മേഖലക്ക് ഒരു പോറലും ഭാരതത്തില്‍ ഏല്‍ക്കില്ല തന്നെ. പക്ഷേ മറ്റു മേഖലകള്‍ പ്രതിസന്ധിയില്‍ ആണു. പരമ പ്രധാനം പെട്രോളിന്റെ വില നിശ്ചയിക്കുന്നതില്‍ ഗവണ്മെന്റിനു ഉണ്ടായിരുന്ന നിയന്ത്രണം എടുത്ത് കളഞ്ഞത് തന്നെ. എണ്ണയുടെ അന്താരാഷ്ട്ര ചലനങ്ങള്‍ക്ക് ഒപ്പിച്ച് ഭാരതത്തില്‍ എണ്ണയുടെ വില നിശ്ചയിക്കാം എന്നു വന്നിടത്ത് ഇപ്പോഴത്തെ പ്രതിസന്ധി തുടങ്ങുന്നു. ഒരു വര്‍ഷത്തിനുള്ളില്‍ എണ്ണ വില പത്തു തവണ കൂടി. ഫലം പണപ്പെരുപ്പവും വിലകയറ്റവും അതു പോലെ തന്നെ കൂടി. എണ്ണവില കൂടുമ്പോള്‍ മൊത്ത വില സൂചിക കൂടും ഒപ്പം പണപ്പെരുപ്പവും. പണപ്പെരുപ്പം കൂടുമ്പോള്‍ രൂപയുടെ വില ഇടിയും. രൂപയുടെ വില ഇടിയുമ്പോള്‍ അസംസ്കൃ എണ്ണയുടെ ഇറക്കുമതി ചിലവ് കൂടും വീണ്ടും എണ്ണ വില കൂടും തുടര്‍ന്ന് പണപ്പെരുപ്പവും അതിങ്ങനെ തുടരും.

യൂറോപ്പില്‍ ബാധിച്ച സാമ്പത്തിക മാന്ദ്യം മാറിയാലും ഇന്നി ഭാരതത്തിന്റെ സാമ്പത്തിക രംഗത്തിനു സ്ഥിരത ഉണ്ടാകില്ല. യൂറോപ്പിലെ മാന്ദ്യം അവസാനിക്കുമ്പോള്‍ അവിടെ ഉല്പാദനം കൂടും. ഉല്പാദനം കൂടുമ്പോള്‍ എണ്ണയുടെ ഉപഭോഗവും കൂടും. എണ്ണയുടെ ഉപഭോഗം കൂടുമ്പോള്‍ എണ്ണ വില കുത്തനെ കയറും. അന്താരാഷ്ട്ര എണ്ണ വിപണിക്കൊപ്പം ഭാരതത്തിലും എണ്ണ വില കൂടും. വ്യാവസായിക വളര്‍ച്ച ഉച്ചസ്ഥായിയില്‍ ആയ രണ്ടായിരത്തി എട്ടിന്റെ ആദ്യ പാദത്തില്‍ എണ്ണ വില നൂറ്റി നാല്പത് ഡോളറിനു മുകളില്‍ പോയിട്ടും ഭാരതത്തില്‍ പെട്രോള്‍ വില നാല്പതു രൂപയ്ക്ക് അടുത്ത് നിര്‍ത്താന്‍ കഴിഞ്ഞത് വില നിയന്ത്രിക്കാനുള്ള അധികാരം സര്‍ക്കാറില്‍ നിക്ഷിപ്തം ആയിരുന്നതു കൊണ്ടാണ്. പക്ഷേ ഇന്നി അതു നടപ്പില്ല. എണ്ണ വില അന്താരാഷ്ട്ര തലത്തില്‍ കൂടും മുന്നേ ഇന്നി ഭാരതത്തില്‍ ഇന്ധന വില കൂടും.  ലോക സാമ്പത്തിക രംഗം മാന്ദ്യത്തിന്റെ പിടിയില്‍ നിന്നും രക്ഷപെടുമ്പോള്‍ ഇന്ധന വിലയില്‍ ഉണ്ടാകുന്ന ഉയര്‍ച്ചയില്‍ തട്ടി പണപ്പെരുപ്പം ഉയര്‍ത്തും എന്നതില്‍ തര്‍ക്കമില്ല എന്നു സാരം.

പണപ്പെരുപ്പം കുറക്കാന്‍ റിസര്‍വ്വ് ബാങ്കിനു കൂടുതല്‍ ഒന്നും ചെയ്യാന്‍ ഇപ്പോള്‍ കഴിയില്ല. അവര്‍  മാസാമാസം കൂടിയിരുന്ന് റിസര്‍വ്വ് ആന്റ് റിവേഴ്സ് റിപ്പൊ റേറ്റ് ഇരുപത്തി അഞ്ച് പൈസ കൂട്ടും അല്ലാതെ എന്തു ചെയ്യാന്‍? പാവങ്ങള്‍... അവിടേയും തെറ്റാണ് ചെയ്യുന്നത്. പണപ്പെരുപ്പത്തിന്റെ തോത് കുറക്കാന്‍ പലിശ നിരക്ക് കൂട്ടുമ്പോള്‍ വിപണിയില്‍ പണ ലഭ്യത കുറയും. കാര്‍ഷിക വായ്പകള്‍ ഉള്‍പ്പെടെ വായ്പകളുടെ പലിശ കൂടും. പലിശ ചിലവ് കൂടുമ്പോള്‍ എണ്ണവില കൂടുന്നത് പോലെ തന്നെ സമ്പൂര്‍ണ്ണ വില കയറ്റം ഫലം. വീണ്ടും വിലകയറ്റം തന്നെ. പിന്നെയും ലവന്മാര്‍ കൂടിയിരുന്നു അവലോകനം നടത്തും. അവലോകനത്തിനൊടുവില്‍ പതിവുപോലെ ഇരുപത്തി അഞ്ചു പൈസ കൂട്ടും. പിന്നെയും പലിശ കൂടും. വായ്പ ചിലവു കൂടും വില കയറ്റവും...

ആഗോള വല്‍ക്കരണത്തിന്റെ ഭാഗമായ സാമ്പത്തിക അടിമത്വത്തിന്റെ ഫലമായി കാര്‍ഷിക മേഖലയ്ക്ക് നല്‍കിയിരുന്ന സബ്സിഡികള്‍ ഒരന്തവും ഇല്ലാതെ വെട്ടികുറച്ചത് കാര്‍ഷിക മേഖലയിലെ കൂട്ട ആത്മഹത്യകള്‍ക്കും ഹെതുവായി. കാര്‍ഷിക മേഖല എങ്ങിനെ എങ്കിലും മുടിപ്പിച്ചിട്ട് ഭാരതം എന്ന അനന്ത സാധ്യതകള്‍ ഉള്ള വിപണിയിലേക്ക് കടന്നു വരാന്‍ ആഗോള കുത്തകകള്‍ മത്സരിക്കുന്നു. അമേരിക്ക ഉള്‍പ്പെടെയുള്ള രാജ്യങ്ങളില്‍ കേന്ദ്രീകൃത കൃഷിയിടങ്ങള്‍ക്ക് വന്‍ സബ്സിഡികള്‍ നല്‍കുമ്പോഴാണ് അത്താഴ പഷ്ണിക്കാരുടെ കൃഷിയിടങ്ങളിലെ മുക്കാല്‍ ചക്ര സബ്സിഡികള്‍ വെട്ടി കുറക്കേണ്ടി വന്നത്. ചോദിക്കാനും പറയാനും ആരും ഇല്ലാ എന്ന അവസ്ഥ. കാരണം - എല്ലാം അറിയുന്ന ഒരാള്‍ പ്രധാന മന്ത്രിയായിരിക്കുന്നിടത്ത് സര്‍വ്വതും സുരക്ഷിതം ആയിരിക്കും എന്നു നാം തെറ്റിദ്ധരിച്ചു. എല്ലാം അയാളെ ഏല്പിച്ച് നാം സുഖ സുഷുപ്തിയില്‍ ആയി.

ഏറ്റവും ഒടുവില്‍ ചെറുകിട കച്ചവട മേഖലയില്‍ കൂടി വിദേശ ഫണ്ട് അനുവദിക്കാനുള്ള ശ്രമം നടക്കുന്നു. കാരണം പറയുന്നത് ഉപഭോക്താവിനു വില കുറവില്‍ ഗുണമേന്മയുള്ള സാധനങ്ങള്‍ ലഭിക്കും എന്നാണ്. ആഗോള ഭീമന്മാര്‍ ഭാരത ജനതയെ സേവിക്കാനല്ല ഇങ്ങോട്ടു കടന്നു വരുന്നത്. മാക്സിമം ലാഭം തന്നെയാണ് അവരുടെ ഉന്നം. കൃഷിടങ്ങള്‍ പാട്ടത്തിനെടുത്ത് അവിടെ ജനിതക മാറ്റങ്ങള്‍ വരുത്തിയ അത്യുല്പാദന ശേഷിയുള്ള അന്തക വിത്തുകള്‍ വിതച്ചു വന്‍ വിളവെടുപ്പ് നടത്തി ലാഭം കൊയ്യുക എന്നതാണ് സംഭവിക്കാന്‍ പോകുന്നത്. പതുക്കെ പതുക്കെ കര്‍ഷകര്‍ എന്ന വിഭാഗം തന്നെ ഇല്ലാതാകും.

മത്സരത്തിന്റെ ഭാഗമായി ചെറുകിട കച്ചവടക്കാരെ പൂട്ടിക്കാന്‍ ആദ്യ കാലങ്ങളില്‍ ചില ആനുകൂല്യങ്ങളും വിലക്കുറവും ഒക്കെ ഉപഭോക്താവിനു നല്‍കാന്‍ ഇവര്‍ ശ്രമിക്കും എങ്കിലും പതുക്കെ അതൊക്കെ ഇല്ലാതാകും. സമ്പന്നര്‍ക്ക് മാത്രം കടന്നു ചെല്ലാന്‍ കഴിയുന്ന ഇടങ്ങളായി വന്‍ വിദേശ വില്പന കേന്ദ്രങ്ങള്‍ മാറി കഴിയുമ്പോള്‍ സാധാരണക്കാരനു അടുപ്പു പുകക്കാന്‍ പാക്കരന്റെ പല ചരക്ക് കട കാണില്ല. ഒന്നുകില്‍ അയാള്‍ ആത്മഹത്യ ചെയ്തിട്ടുണ്ടാകും അല്ലെങ്കില്‍ വിദേശ കുത്തകക്കാരന്‍ നടത്തുന്ന കേന്ദ്രീകൃത കൃഷിയിടത്തിലെ തൊഴിലാളി ആയിട്ടുണ്ടാകും.

ചെറുകിട വ്യാപാരമേഖല കൂടി വിദേശ കുത്തകകള്‍ക്ക് തുറന്ന് കൊടുക്കണം എന്ന് വാദിക്കുന്നവര്‍ മിക്കവരും പറയുന്ന ഒരു ന്യായം ഭാരതത്തില്‍ ഇപ്പോള്‍ ഉല്പാദിപ്പിക്കപ്പെടുന്ന വിഭവങ്ങളില്‍ നല്ലൊരു ശതമാനവും വിളവെടുത്ത് ശേഖരിച്ച് സൂക്ഷിച്ചു വെക്കാന്‍  കഴിയാതെ നശിച്ചു പോകുന്നു. അതിനു തടയിടാന്‍ പുതിയ നയത്തിനു കഴിയും, വിദേശ ഫണ്ടുകള്‍ സുസ്സജ്ജമായ ശേഖരണ കേന്ദ്രങ്ങള്‍ തുടങ്ങി വിഭവങ്ങള്‍ സൂക്ഷിക്കും എന്നതാണ്. രാഹുല്‍ ഗാന്ധിയും അങ്ങിനെ പ്രസ്ഥാവന നടത്തുന്നതു കേട്ടു, വിഭവങ്ങള്‍ സുരക്ഷിതമായി സൂക്ഷിക്കാന്‍ സര്‍ക്കാറിനു കഴിയില്ലാ... വിദേശിയര്‍ക്കേ കഴിയുള്ളൂ എന്നു പറയുന്നിടത്ത് സര്‍ക്കാര്‍ തന്നെ പരാജയം ആണെന്നു സമ്മതിക്കുന്നതിനു തുല്യം ആണ്. നാടിന്റെ സമ്പത്ത് സൂക്ഷിക്കാന്‍ കഴിയാത്ത സര്‍ക്കാര്‍ ഒരു സാമ്പത്തിക വിദഗ്ദന്റെ നേതൃത്വത്തില്‍ ആണെന്നുള്ളത് അതിനേക്കാള്‍ മാനക്കേട്.

വിദേശ ഫണ്ടുകള്‍ക്ക് ഒരിക്കലും ഭാരതത്തോടു എന്തെങ്കിലും കൂറുണ്ടാകും എന്ന് ധരിക്കുന്നതേ അബദ്ധമാണ്. ഇപ്പോള്‍ ഓഹരി വിപണി എത്തപ്പെട്ടിരിക്കുന്ന ദുരന്തം തന്നെ അതിനു ഉദാഹരണം. ഭാരതത്തിന്റെ സാമ്പത്തിക നില അപകടത്തിലേക്ക് എന്ന സൂചന കിട്ടിയ നിമിഷം തന്നെ അവര്‍ ഫണ്ടുകള്‍ പിന്‍ വലിച്ചു തുടങ്ങി. ഫലം എന്താണ്? ഭാരതത്തിലെ സാധാരണ നിക്ഷേപകനു അവന്റെ നാമമാത്രമായ നിക്ഷേപം നഷ്ടപ്പെടുന്ന അവസ്ഥ. ഓഹരി വിപണിയിലേക്ക് സാധാരണ നിക്ഷേപകനെ ആകര്‍ഷിപ്പിക്കാന്‍ സര്‍ക്കാര്‍ തന്നെയാണ് മുങ്കൈ എടുത്തത്. ഇപ്പോള്‍ എല്ലാം നഷ്ടപ്പെട്ടു നിസ്സാഹയനായി നില്‍ക്കുന്ന സാധാരണ ഭാരതീയ നിക്ഷേപകന്‍ ആത്മഹത്യയുടെ വക്കിലും. വിദേശ ഫണ്ടുകള്‍ അപകടം മുങ്കൂട്ടി കണ്ട് നേരത്തെ തന്നെ അവരുടെ നിക്ഷേപങ്ങള്‍ സംരക്ഷിച്ചു കഴിഞ്ഞിരുന്നു.

സാമ്പത്തിക രംഗത്ത് നിന്നും എങ്ങിനെ വിദേശ ഫണ്ടുകള്‍ പിന്‍ വലിഞ്ഞോ അതേ പോലെ തന്നെ കാര്‍ഷിക രംഗത്ത് നിന്നും ചില്ലറ വ്യാപാര മേഖലയില്‍ നിന്നും തുടര്‍ന്ന് കാര്‍ഷിക മേഖലയില്‍ നിന്നും ഒക്കെ അവര്‍ പിന്‍ വലിയും. അപ്പോഴേക്കും നമ്മുടെ സ്വയം പര്യാപ്തത നമ്മുക്ക് നഷ്ടപ്പെട്ടിട്ടുണ്ടാകും. മണ്ണും വിത്തും ജലവും മാനഭംഗ പെട്ടിട്ടുണ്ടാകും. തകര്‍ന്നടിഞ്ഞ് കഴിയുന്ന കാര്‍ഷിക വിപണന മേഖല തിരികേ കൊണ്ടു വരുവാന്‍ ഒരു പക്ഷേ നമ്മുക്ക് കഴിയണം എന്നില്ല. ഫലം ഭക്ഷണത്തിനായി വിദേശ കപ്പലുകള്‍ തീരത്തണയുന്നതും കാത്തിരിക്കുന്ന അവസ്ഥയുണ്ടാകും.

മന്മോഹന്‍ സിങ്ങിനു പിഴക്കുന്നുണ്ട്. അമേരിക്കക്ക് പറ്റിയ നേതാവായിരിക്കും ഒരു പക്ഷേ മന്മോഹന്‍ സിങ്ങ്. പക്ഷേ ഭാരതത്തിനു അദ്ദേഹം ദോഷം മാത്രമേ ചെയ്യുന്നുള്ളു. ഭാരതീയരെയും ഭാരതത്തിന്റെ സാമ്പത്തിക ശാസ്ത്രത്തേയും ഭാരതത്തിന്റെ കര്‍ഷകരേയും വിശ്വാസത്തില്‍ എടുത്ത് മുന്നോട്ടു പോകാന്‍ കഴിയാത്തിടത്തോളം മന്മോഹന്‍ സിങ്ങ് കടുത്ത അപരാധമാണ് നാട്ടിനു ചെയ്തു കൊണ്ടിരിക്കുന്നത്. അമേരിക്കയെ ഭാരതത്തിലേക്ക് പറിച്ച് നടാനുള്ള വെമ്പലില്‍ മന്മോഹന്‍ സിങ്ങും കൂട്ടരും നാട്ടിന്റെ ആത്മാവിനെയാണ് കുരുതി കൊടുക്കുന്നത്.

ആഗോള വല്‍ക്കരണം ഒരു രാജ്യത്തിനും ഭൂഷണം അല്ല. ഒരോ രാജ്യവും സ്വയം പര്യാപ്തമാവുകയാണ് വേണ്ടത്. ആഗോളവല്‍ക്കരണം ഏതെങ്കിലും രാജ്യത്തെ സാമ്പത്തികമായി ഉന്നമനത്തില്‍ എത്തിച്ചിട്ടും ഇല്ല - നാളിതു വരെ. വിഭവങ്ങള്‍ പരസ്പരം വിപണനം ചെയ്യുന്നതിനു നാടിന്റെ സാമ്പത്തിക മേഖല കുത്തകകള്‍ക്ക് അടിയറവ് വെക്കേണ്ടുന്നതൊന്നും ഇല്ല. വിദേശ വിപണി കീഴ്പ്പെടുത്താന്‍ നാം വെമ്പല്‍ കൊള്ളുന്നതിനു മുന്നേ രാജ്യത്തിന്റെ കാര്‍ഷിക വിപണന സാമ്പത്തിക മേഖലകള്‍ ശക്തിപ്പെടുത്തുകയാണ് വേണ്ടത്.  ഉല്പാദന ചിലവു കുറച്ചാല്‍ നമ്മുടെ ഉല്പന്നങ്ങള്‍ക്ക് വിപണികള്‍ താനേ തുറക്കെപ്പെടും.

ലാഭം മാത്രമാണ് വിദേശ ഫണ്ടുകള്‍ ലക്ഷ്യം വെക്കുന്നത്. രാജ്യ സേവനം അവരുടെ ലക്ഷ്യമേ അല്ല. അതു നന്നായി അറിയാവുന്ന ഒരാള്‍ പ്രധാനമന്ത്രി ആയി ഇരുന്നു കൊണ്ട് രാജ്യത്തിന്റെ സാമ്പത്തിക മേഖലയെ തുരങ്കം വെക്കാന്‍ വിദേശ കുത്തകകള്‍ക്ക് അവസരം ഒരുക്കുന്നത് നാടിന്റെ ശാപമാണ്.

Saturday, December 10, 2011

നമ്മുടെ പെണ്‍കൊച്ചുങ്ങളും നമ്മുടെ സമുദായവും!

വ്യത്യസ്ത മത വിഭാഗങ്ങങ്ങളിലെ പ്രേമ ബന്ധങ്ങളും മിശ്ര വിവാഹങ്ങളും   ഇന്നും ഇന്നലെയും തുടങ്ങിയ പ്രതിഭാസങ്ങള്‍  അല്ല. ആണും പെണ്ണും തമ്മില്‍ കണ്ടു മുട്ടുന്നതും പരിചയപ്പെടുന്നതും പരിചയം പിന്നെ പ്രണയത്തിലേക്ക് വഴിമാറുന്നതും പ്രണയം വിവാഹത്തിലേക്ക് എത്തുന്നതും അല്ലെങ്കില്‍  വഴി പിരിഞ്ഞു പോകുന്നതും ഒന്നും  പുതുമയുള്ള കാര്യങ്ങളും അല്ല. കറയറ്റ പ്രണയത്തില്‍ ജാതി മത വര്‍ണ കുബേര കുചേല വ്യതിയാനങ്ങള്‍ ഒന്നും കടന്നു വരാറും ഇല്ല. 

ഇതര മത പ്രണയങ്ങള്‍ എക്കാലത്തും എതിര്‍ക്ക പെട്ടിട്ടുണ്ട്. നല്ല കരളുറപ്പുള്ള ചിലര്‍ എല്ലാ എതിര്‍പ്പുകളേയും അവഗണിച്ചു ഇഷ്ടങ്ങളെ വരിക്കുന്നു. സമൂഹത്തോടും സമുദായ കൊമരങ്ങളോടും
ജീവിതത്തോടും പോരടിച്ചു ജീവിത വിജയം നേടുന്നു. ചിലര്‍ ഇഷ്ട വിവാഹത്തിന് ശേഷം ഒന്നിച്ചു ജീവിച്ചു കൊള്ളാം എന്ന ഉടമ്പടി ഏകപക്ഷിയമായോ സംയുക്തമായോ അവസാനിപ്പിച്ചു പുതിയ മേച്ചില്‍ പുറങ്ങള്‍ തേടുന്നു. ഇതൊക്കെ കാലങ്ങള്‍ ആയി സംഭവിച്ചു കൊണ്ടിരിക്കുന്ന സംഗതികള്‍.

പ്രണയങ്ങള്‍, പ്രത്യേകിച്ചും ഇതര സമുദായ അംഗങ്ങള്‍  തമ്മിലുള്ള പ്രണയങ്ങള്‍ ഇന്നലെ നാല്‍ക്കവലകളിലെ   ചായ പീടികകളിലും ബാര്‍ബര്‍ ഷാപ്പുകളിലും ഒക്കെയായിരുന്നു ചര്‍ച്ചകള്‍. അവിടെ ഒരു ഇട്ടാവട്ടത്തില്‍ ഇരുന്നുള്ള പരദൂഷണത്തില്‍ എരിവും പുളിയും ചേര്‍ന്ന പ്രണയങ്ങളും ചര്‍ച്ചക്ക് വിഷയം ആകും ആയിരുന്നു. രക്ഷകര്‍ത്താക്കള്‍  ബന്ധുക്കള്‍ നാട്ടുകാര്‍ തുടങ്ങിയ തടസങ്ങളെ അതി ജീവിക്കാന്‍ കഴിയില്ല എന്ന് തോന്നിയാല്‍ കമിതാക്കള്‍ മുമ്പും പിറകും ചിന്തിക്കാതെ ഉറ്റവരെയും ഉടയവരെയും വിട്ടു ഒളിച്ചോടുകയും പതിവായിരുന്നു. അതും ഇമ്മാതിരി ഗ്രാമ സഭാ കാര്യലയങ്ങളിലെ ചര്‍ച്ചകള്‍ക്ക് വിഷയീ ഭവിക്കാറുണ്ട്. അതൊക്കെ ഇന്നലത്തെ കാര്യം.

ഇന്ന്-

കഥയൊക്കെ മാറിയിരിക്കുന്നു. ചര്‍ച്ചകള്‍ സോഷ്യല്‍ നെറ്റ് വര്‍ക്കുകളില്‍ കേന്ദ്രീകരിച്ചിരിക്കുന്നു. കമ്പ്യൂട്ടറും യൂണികോഡും ഒക്കെ ഉപയോഗിക്കാന്‍ കഴിയുന്ന വിദ്യ സമ്പന്നരായ ഒരു സമൂഹം ഇടപെടുന്ന നവ മാധ്യമത്തില്‍ നിന്നും പക്ഷെ പ്രതീക്ഷിക്കുന്ന ചര്‍ച്ചകളോ ചിന്താ ശകലങ്ങലോ അല്ല ഇക്കാര്യത്തില്‍  ഉരിതിരിയുന്നത്. നല്ലൊരു വിഭാഗവും ജാതിയും മതവും വര്‍ണവും രാഷ്ട്രീയവും ഒക്കെ നോക്കി മാത്രമാണ് പ്രതികരിക്കുന്നത്. ഒരു പക്ഷെ ഇന്നലെകളെക്കാള്‍ യുവത്വം വര്‍ഗീയ വല്‍ക്കരിക്ക പെട്ടിരിക്കുന്നു എന്നര്‍ത്ഥം.

ഇരുപത്തി മൂന്നു വയസുള്ള ഷിഫ എന്ന പെണ്ണും ദീപു എന്ന ആണും എലാപ്പാറയില്‍ നിന്നും വീട് വിട്ടു പോയിരിക്കുന്നു.  പ്രാഥമിക നിരീക്ഷണങ്ങള്‍ക്ക് ശേഷം പീരുമേട് പോലിസ് കേസെടുത്തു. തുടര്‍ന്നു ലുക്ക്‌ ഔട്ട്‌ നോട്ടീസും പോലീസ് പുറത്ത് വിട്ടു. പതിവ് പോലെ സംഗതി നേരെ നവ നാല്‍ക്കവല  ആയ സോഷ്യല്‍ നെറ്റ് വര്‍ക്കുകളില്‍ ചര്‍ച്ചയും തുടങ്ങി. നിരവധി ചര്‍ച്ചകളിലെ ഒരു ഉദാഹരണം.

ഒരു സമുദായ സ്നേഹി മേപ്പടി ലുക്ക്‌ ഔട്ട്‌ നോട്ടീസ് കോപ്പീ പേസ്റ്റ് ചെയ്തു ഒലിപ്പീരു തുടങ്ങി. അതിങ്ങനെ:

"ദയാവായി ഇത് ഷെയര്‍ ചെയ്യുക .... എന്തെങ്കിലും വിവരം ലഭിക്കുന്നവര്‍ ഇതിലെ നമ്പറില്‍ വിവരം അറിയിക്കുക

ഈ സംഘി വല വീശലില്‍ നമ്മുടെ എത്ര സഹോതരിമാര്‍ അറിഞ്ഞും അറിയാതെയും അകപ്പെട്ടു പോകുന്നു .... എവിടെക്കാണ്‌ നമ്മുടെ സമുദായത്തിന്റെ പോക്ക് .... എന്ത് കൊണ്ടാണ് ഒരു ബോധവല്‍കരണത്തിന് നമ്മുടെ സമുദായ നേതൃത്വം മുന്നോട്ടു വരാത്തത് ..????" 

മറ്റൊരു സമുദായി:
Love jihad aropichavar avarude pazhaya ajanda nammalil aropikkukayirunnu....... beware 

പോസ്ടിട്ട സമുദായിയുടെ മറുപടി:
"സംഘി വല വീശല്‍ നടക്കുന്നില്ല എന്ന് നമുക്ക് പറയാന്‍ കഴിയില്ല .... അത് പതുക്കെ പതുക്കെ നമ്മെ കാര്‍ന്നു തിന്നുകയാണ് ...നമുക്ക് ചുറ്റും വലയം തീര്‍ത്തു കഴിഞ്ഞിരിക്കുന്നു ..... ഇത് ഏറ്റവും കൂടുതല്‍ വിഷമിപ്പിക്കുന്നതു പ്രവാസി സഹോതരന്മാരെ തന്നെയാണെന്ന് പറയേണ്ടി വരും ഇത്തരം വാര്‍ത്തകള്‍ പുറത്തു വരുമ്പോള്‍ ..... സ്വന്തം കുടുംബത്തില്‍ നിന്നും മഹല്ലുകള്‍ കേന്ദ്രീകരിച്ചും ശക്തമായ ബോധവല്കരണം ഈ വിഷയത്തില്‍ ആവശ്യമാണ്‌ ...നൌഫല്‍ സാഹിബ്‌ .... ഫേസ് ബുക്കില്‍ ഇടക്കൊക്കെ ഓരോ വാര്‍ത്ത‍ വരുന്നു എന്നതിനെക്കാളേറെ നാട്ടില്‍ ഇതൊരു സത്രം സംഭവം ആയിരിക്കുന്നു ..... ശക്തമായ ബോധവല്കരണം ഈ വിഷയത്തില്‍ നടത്തിയില്ല എങ്കില്‍ ഇത് ഒരു വന്‍ നാഷതിലെക്കായിരിക്കും സമുധായാതെ നയിക്കുക ...."

ചര്‍ച്ച അങ്ങിനെ മുന്നോട്ടു പോവുകയാണ്. നമ്മുടെ പെങ്കൊച്ചിനെ മറ്റവന്‍മാരില്‍ ഒരുവന്‍ അടിച്ചോണ്ട് പോയിരിക്കുന്നു. പ്രതികരിക്കൂ സഹോദരന്മാരെ എന്നതാണ് ആഹ്വാനം.

പെണ്‍കുട്ടി ചതിക്ക പെട്ടതാണെങ്കില്‍ അത് ജാതി മത വര്‍ണ്ണ വ്യത്യാസങ്ങള്‍ നോക്കി അപലപിക്കേണ്ട സംഗതി അല്ല.   ആ പെണ്‍കുട്ടിയെ ജീവതത്തിലേക്ക് തിരിച്ചു കൊണ്ട് വരേണ്ടുന്നത് സമൂഹത്തിന്റെ ധാര്‍മ്മികമായ ഉത്തരവാദിത്വം  ആണ് താനും. അതല്ല പരസ്പരം ഇഷ്ട പെട്ടവരെ ഇതര സമുദായങ്ങള്‍ ആയതു കൊണ്ട് ഒരുമിച്ചു ജീവിക്കാന്‍ അനുവദിക്കാത്ത സമൂഹത്തിന്റെ മര്‍ക്കട മുഷ്ടിക്കു മുന്നില്‍ പിടിച്ചു നില്ക്കാന്‍ കഴിയാതെ പുറപെട്ടു പോയവര്‍ ആണെങ്കില്‍ അവര്‍ ജീവിക്കട്ടെ. പതുക്കെ പതുക്കെ നാട്ടുകാരും വീട്ടുകാരും ഒക്കെ അവരെ അംഗീകരിച്ചു കൊള്ളും. മിശ്ര വിവാഹിതരായ ഡസന്‍ ദമ്പതിമാരെ നേരിട്ടറിയാം - സുഖവും സന്തോഷം ആയി ജീവിക്കുന്നവരെ. ആദ്യത്തെ ആവേശം ഒക്കെ കഴിഞ്ഞു പൊരുത്ത കേടുകള്‍ നിറഞ്ഞ ജീവിതത്തില്‍ നിന്നും പരസ്പരം വഴി പിരിഞ്ഞ മിശ്ര വിവാഹക്കാരെയും  അറിയാം. പക്ഷെ ജാതകവും പൊരുത്തവും മുഹൂര്‍ത്തവും ഒക്കെ നോക്കി വിവാഹിതരായിട്ടു പിരിഞ്ഞു പോയ ദാമ്പത്യങ്ങളെക്കാള്‍ അവരുടെ എണ്ണം ഒരിക്കലും കൂടുതല്‍ അല്ല!

ഹൈന്ദവ പെണ്‍കുട്ടിയെ മുസ്ലീം പയ്യന്‍ പ്രണയിച്ചാല്‍ അത് ലൌ ജിഹാദ്. മുസ്ലീം പെണ്‍കുട്ടിയെ ഹൈന്ദവ പയ്യന്‍ പ്രണയിച്ചാല്‍ അത് ആര്‍.എസ്.എസ്. ഗൂഡാലോചന! പിന്നെ ചര്‍ച്ചയോട് ചര്‍ച്ച. പ്രണയം എന്നതിന്റെ അര്‍ഥം എന്താണെന്നോ അത് മുന്നോട്ടു വെക്കുന്ന മാനവികത എന്തെന്നോ  ഈ ചര്‍ച്ചാ കൂട്ടര്‍ക്ക് എന്തെങ്കിലും ബോധം ഉണ്ടോ എന്നറിയില്ല. ഇഷ്ട വിവാഹങ്ങളില്‍ ഇഷ്ടം മാത്രമാണ് പൊരുത്തം. അവിടെ സമ്പത്തും ജാതകവും തറവാടിത്വവും സ്ത്രീധനവും ഒന്നും കടന്നു വരാറില്ല. എന്തിനു, വിവാഹത്തിന്റെ പേരില്‍ കാട്ടി കൂട്ടുന്ന ഒരു അരാജകത്വവും പ്രണയ വിവാഹങ്ങളില്‍ കാണില്ല.  പരസ്പരം ഇഷ്ടപ്പെട്ടവര്‍ ഒന്നിച്ചു ജീവിക്കട്ടെ. ചതിയുണ്ടെങ്കില്‍ അത് കണ്ടെത്തി പരിഹാരം കാണാം.

നമ്മുടെ സമുദായത്തിന് ഇതെന്തു പറ്റി എന്ന് വിലപിക്കുന്ന സമുദായ സ്നേഹികള്‍ സ്വസമുദായത്തില്‍ പെട്ട പിതാവിനാല്‍  പീഡിപ്പിക്ക പെട്ട് കൊല ചെയ്യപ്പെട്ട കുഞ്ഞിനെ കുറിച്ചോ പെണ്‍വാണിഭത്തിനു നേതൃത്വം കൊടുക്കുന്ന സ്വസമുദായത്തിലെ ക്രിമിനലുകളെ കുറിച്ചോ എന്തെങ്കിലും ഉരിയാടിയതായി അറിവില്ല. ഏറ്റവും ഒടുവില്‍ വടക്കുള്ള ഒരു യതീം ഖാനയില്‍ പീഡിപ്പിക്ക പെട്ട അനാഥരായ പെണ്‍കുട്ടികളെ കുറിച്ച് ഒരിടത്തും  ആവലാതി പെട്ടും കണ്ടില്ല. പ്രായ പൂര്‍ത്തിയായ പെണ്‍കുട്ടി തനിക്കു ഇഷ്ടമുള്ള ഒരാളോട് ചേര്‍ന്നതില്‍ അല്ല ഈ ഹമുക്കുകളുടെ  അമര്‍ഷവും. "ഞങ്ങള്‍ക്ക് ഭോഗിക്കേണ്ട പെണ്ണിനെ നീ കൊണ്ട് പോയി ഭോഗിക്കേണ്ട" എന്നതില്‍ കവിഞ്ഞ ഒരു ചിന്തയും ഇവന്മാരുടെ വികാര പ്രകടനങ്ങള്‍ക്കില്ല തന്നെ.

സമുദായത്തില്‍ നടമാടുന്ന അനാചാരങ്ങള്‍ക്കും അനീതികള്‍ക്കും നേരെ പുറം തിരിഞ്ഞു നിന്നിട്ട് കവലകളില്‍ സദാചാര പോലീസ് ചമഞ്ഞു പിതാവിനെയും പുത്രിയേയും പോലും ചിത്ര വധത്തിനു വിധേയം ആക്കുന്ന നവ മാധ്യമ ചര്‍ച്ചക്കാര്‍ ആദ്യം  ചെയ്യേണ്ടുന്നത്  സ്വസമുദായത്തിലെ പെണ്‍കുട്ടികള്‍ നേരിടുന്ന സ്ത്രീധനം എന്ന ദുരന്തത്തിനെതിരെ പോരാടുകയാണ്. മാമാ മാരും മാമി മാരും ആയി സ്വ സമുദായ അംഗങ്ങള്‍ മാറുന്നതിനെ തടയാന്‍ ശ്രമിക്കുകയാണ്. കേരളത്തിലെ പെണ്‍ വാണിഭക്കാരുടെ ഒരു ലിസ്റ്റ് എടുത്താല്‍ ഒരു പക്ഷെ ഭൂരിപക്ഷം മുസ്ലീം നാമധാരികള്‍ ആയിരിക്കും എന്നതില്‍ സംശയം ഇല്ല തന്നെ.

സമൂഹത്തിലെ സ്വ സമുദായ പുഴു കുത്തുകളെ കണ്ടില്ലെന്നു നടിച്ചു  നമ്മുടെ പെങ്കൊച്ചിനെ മറ്റവന്‍ അടിച്ചോണ്ട് പോയി എന്ന് വിലപിച്ചിട്ട് എന്ത് കാര്യം?

Thursday, December 08, 2011

ഇറച്ചി കടകളിലെ മനുഷ്യാവകാശം.

നഴ്സുമാര്‍ ആക്രമിക്കപ്പെടുന്ന സംഭവങ്ങള്‍ വാര്‍ത്ത അല്ലാതായിട്ടു കാലങ്ങളായി. വെറും  ശമ്പളം മാത്രം ലക്‌ഷ്യം ആക്കുന്ന ഒരാള്‍ക്കും നാഴ്സാവാന്‍ കഴിയില്ല തന്നെ. ദീനാനുകമ്പയും സേവന തല്പരതയും സാമൂഹ്യ പ്രതിബദ്ധതയും ഉന്നതമായ മാനുഷിക മൂല്യങ്ങളും ഒക്കെ കൂടി ചേര്‍ന്ന ഒരാള്‍ക്കേ നഴ്സിംഗ് പ്രൊഫെഷന്‍ തിരഞ്ഞെടുക്കാനും അതില്‍ ശോഭിക്കാനും കഴിയുള്ളൂ. അങ്ങിനെയുള്ളവര്‍ കുറെയൊക്കെ സഹന ശക്തി ഉള്ളവരും പ്രതികൂല  സാഹചര്യങ്ങളോട് പൊരുത്തപ്പെട്ടു  ജീവിക്കാന്‍ കഴിയുന്നവരും ആയിരിക്കും. ഈ സഹന ശക്തി എപ്പോഴും ചൂഷണ വിധേയം ആയിരിക്കുകയും ചെയ്യും.

തരം കിട്ടിയാല്‍ തങ്ങളുടെ തന്നെ ശുശ്രൂഷയില്‍ കഴിയുന്നവരും തരമുണ്ടാക്കി സഹ ജീവനക്കാരും പീഡിപ്പിക്കാന്‍ ശ്രമിക്കുന്ന ഈ വിഭാഗം എപ്പോഴും അരക്ഷിതാവസ്ഥയില്‍ തന്നെയായിരിക്കും തങ്ങളുടെ കര്‍ത്തവ്യങ്ങളില്‍ വ്യാപരിക്കുന്നത്. പീഡനങ്ങള്‍ക്കെതിരെ  പരാതി  പെട്ടാല്‍ മിക്കവാറും വാദി തന്നെ പ്രതിയാകുന്ന അവസ്ഥകളും ഉണ്ടാകും. അത് കൊണ്ട് തന്നെ തൊഴില്‍ മേഖലയില്‍ നിന്നും ഉണ്ടാകുന്ന തിക്താനുഭവങ്ങളെ കണ്ടില്ല എന്ന് നടിച്ചും കഴിയുന്നിടത്തോളം സ്വയം  ഒഴിവായും ഒതുങ്ങി കൂടിയും കഴിയുന്ന സമൂഹത്തിലെ ഏറ്റവും അനിവാര്യം ആയ ഒരു തൊഴില്‍ മേഖലയില്‍ - അല്ല സേവന മേഖലയില്‍ പ്രവര്‍ത്തിക്കുന്ന ഒരു വിഭാഗത്തെ എപ്പോഴും അടിമകള്‍ ആക്കി വെക്കാനാണ് "ആശുപത്രി വ്യാപാരികള്‍" ശ്രമിക്കുന്നത്.

ഇറച്ചി കടകളും  ഇപ്പോഴുള്ള ആശുപത്രികളും തമ്മില്‍ എന്തെങ്കിലും തരത്തില്‍ വ്യത്യാസം ഉണ്ടെങ്കില്‍ അത്  ഇറച്ചി കാര്‍ന്നെടുക്കുന്നതില്‍ മാത്രമേ ഉള്ളൂ. ഒരിടത്ത് കൊന്നതിനു ശേഷം തോലുരിച്ചു മാംസം അറുത്തു എടുക്കുന്നു. മറ്റൊരിടത്ത് ഇരയുടെ മാംസം  ജീവനോടെ കാര്‍ന്നെടുക്കുന്നു.

പണം ഉണ്ടാക്കാനുള്ള എളുപ്പ വഴി എന്ന നിലക്കാണ് ഇന്ന് മിക്കവാറും എല്ലാ ആശുപത്രികളും പ്രവര്‍ത്തിക്കുന്നത്. മനുഷ്യന് ഏറ്റവും വിലപ്പെട്ടത്‌ ജീവനായത്‌ കൊണ്ട് തന്നെ അതിനെ നിലനിര്‍ത്താന്‍ എന്ത് വില കൊടുക്കാനും മനുഷ്യന്‍ എപ്പോഴും തയ്യാറായിരിക്കും. കിട്ടുന്ന ജീവനെ തട്ടി കളിച്ചു തടിച്ചു കൊഴുക്കുന്ന മാനേജുമെന്റുകള്‍ ഇറച്ചി കടയിലെ സേവന മേഖലയില്‍ പ്രവര്‍ത്തിക്കുന്ന നഴ്സ് മാരെയും പിഴിയുന്നു. ഡോക്ടറന്മാരെ പിഴിഞ്ഞെടുക്കാന്‍ ഇവര്‍ക്ക് കഴിയാറില്ല. കാരണം ഇറച്ചി കടയിലെ അറവുകാര്‍ ഈ വിഭാഗം ആയതു കൊണ്ട് അവരെ അവരുടെ സ്വര്‍ഗത്തില്‍ വിഹരിക്കാന്‍ വിടുകയാണ് പതിവ്. അറവു കാരന്‍ ഇല്ലാതെ ഇറച്ചിക്കട നടന്നു പോകില്ലല്ലോ?

കേരളത്തിന്റെ സ്വന്തം മാലാഖമാര്‍ക്ക് ലോകമെമ്പാടും അര്‍ഹിക്കുന്ന അംഗീകാരവും പ്രതിഫലവും സേവന മേഖലയില്‍ സുരക്ഷിതത്വവും ലഭിക്കുമ്പോള്‍ നമ്മുടെ ദൈവത്തിന്റെ സ്വന്തം നാട്ടില്‍ മാലാഖ കുട്ടികള്‍ക്ക് മാനഹാനിയും, പീഡനവും, തൊഴില്‍ മേഖലയിലെ അരക്ഷിതാവസ്ഥയും ആണ് നാം കനിഞ്ഞു നല്‍കുന്നത്. സഹികെട്ട് സേവന വേതന വ്യവസ്ഥയില്‍ മാറ്റം ആവശ്യപ്പെട്ടാല്‍ ക്രൂരം ആയ ശിക്ഷയും പീഡനവും. കൂട്ടം ചേര്‍ന്നാല്‍ തെരിവിലിട്ടു തല്ലലും
പിന്നെ കൊല്ലാകൊലയും അപവാദ പ്രചാരണവും. കേരളത്തിന്റെ സ്വന്തം മാലാഖ കുട്ടികളെ ദില്ലിയിലോ മുംബായിലോ ഇട്ടു തല്ലിയാല്‍ നാം ചന്ദ്രഹാസം ഇളക്കും. നമ്മുടെ ഭൂമി മലയാളത്തില്‍ ആണെങ്കില്‍ പിന്നെ "അവളുമാര്‍ക്ക് അത് ഇത്ര അഹങ്കാരമോ? അത് തന്നെ വേണം" എന്ന നിലപാടും.

ഏറ്റവും ഒടുവില്‍ കൊല്ലത്തെ പ്രശസ്തമായ ശങ്കേഴ്സിലും കൊച്ചിയിലെ അമൃതയിലും നേഴ്സുമാര്‍ ആക്രമിക്കപ്പെട്ടു - പട്ടാപകല്‍ പരസ്യം ആയി. ചാനലുകളില്‍ കൂടി ലൈവായി നാം അത് കണ്ടു ആസ്വാദിച്ചു. ദില്ലിയിലും മുംബയിലും കല്‍ക്കട്ടയിലും മലയാളീ നഴ്സുമാര്‍ അക്രമിക്കപെട്ടപ്പോള്‍ ഇരയുടെ പക്ഷം പിടിച്ചു നിരന്തര ചര്‍ച്ചകളും വിശകലങ്ങളും നടത്തിയ ദ്രിശ്യ ശ്രവ്യ  മാധ്യമങ്ങള്‍ എല്ലാം ഒരേ പോലെ അക്രമങ്ങളെ കണ്ടില്ല എന്ന് നടിച്ചു സുഖം ആയി ഉറങ്ങുന്നു. ചാനലുകള്‍ അടിക്കുന്ന വഴിയെ മാത്രം ചരിക്കുന്ന നമ്മളും ഇതൊന്നും കാണുന്നേയില്ല.


അമ്മ നടത്തുന്ന ഇറച്ചി കടയില്‍ ആണെങ്കിലും അമ്മാമമാര്‍  നടത്തുന്ന അറവു ശാലകളില്‍ ആണെങ്കിലും ഉപ്പാപ്പമാര്‍ നടത്തുന്ന പീടികകളില്‍ ആണെങ്കിലും പീഡിപ്പിക്ക പെടുന്ന നഴ്സുമാര്‍ സമൂഹത്തിന്റെ സഹതാപവും സ്നേഹവും ആദരവും അര്‍ഹിക്കുന്നുണ്ട്. ഡോക്ടറന്മാരുടെ കഴുത്തറപ്പന്‍ സമരം പോലെ അല്ല ഇത്. ഇവരുടെ സമരം അതിജീവനത്തിനു വേണ്ടിയുള്ളതാണ്. ലക്ഷങ്ങള്‍ എണ്ണി വാങ്ങുന്ന ഡോക്ടറന്മാരുടെ സമരം ജനദ്രോഹവും ഇവരുടെ സമരം ജനപക്ഷവും ആയിട്ടാണ് കണക്കാക്കേണ്ടുന്നത്. വേട്ടക്കാരന്റെ അത്യാഗ്രഹവും ഇരയുടെ പ്രാണ വേദനയും തമ്മിലുള്ള വ്യത്യാസം ഇരു സമരങ്ങളിലും തൊട്ടറിയാം.

ശങ്കേഴ്സിലും അമൃതയിലും തുടങ്ങിയിട്ടേ ഉള്ളൂ എന്നാണ് തോന്നുന്നത്. ജൂബിലിയിലും അസീസിയായിലും അമലയിലും തുടങ്ങി ഭൂമിമലയാളത്തിലെ സ്വകാര്യ ആശുപത്രികള്‍ എന്ന ഇറച്ചി കടകളിലെ നഴ്സുമാര്‍ കൂട്ട സമരത്തിന്റെ പാതയിലാണെന്നാണ് പിന്നാമ്പുറം. അതി ജീവനത്തിനു വേണ്ടിയുള്ള ഈ സഹന സമരത്തെ അടിച്ചമര്‍ത്താന്‍  പച്ചയിറച്ചി വ്യാപാരികള്‍ക്കു അധികാരത്തിന്റെ കൂട്ടുണ്ടാവും എന്നുറപ്പ്.  അറവു ശാലയില്‍ നിന്നും എറിഞ്ഞു കൊടുക്കുന്ന ഉച്ചിഷ്ടം നക്കി വാലും കാലിന്റിടയില്‍ തിരുകി യജമാന ഭക്തിയോടെ മുരളുന്ന ചാനലുകലുക്കും മാധ്യമങ്ങള്‍ക്കും ഈ സമരം ഒരു വാര്‍ത്തയും ആകില്ല. അപ്പോഴും പ്രതീക്ഷയുള്ളത് നവീന മാധ്യമങ്ങളില്‍ ആണ്.

അടിമ കച്ചവടത്തിന് തുല്യം ആയ കേരളത്തിലെ നഴ്സിംഗ് മേഖലയിലെ അതിജീവനത്തിനു വേണ്ടിയുള്ള  സമരത്തിന്‌ കേരള സമൂഹത്തിന്റെ പിന്തുണ അനിവാര്യം ആണ്. കിരാത ഭരണ കൂടങ്ങളെ മറിക്കാന്‍ തക്ക ശേഷിയുള്ള നവീന മാധ്യമങ്ങളിലെ ആശയ സംവാദങ്ങള്‍ക്ക് സമൂഹത്തിന്റെ ശ്രദ്ധ അര്‍ഹിക്കുന്ന നഴ്സുമാരുടെ സമരത്തിന്‌ പിന്തുണ നല്‍കാന്‍ കഴിയണം. അത് ഈ സമൂഹം നില നില്‍ക്കേണ്ടുന്നതിനു ആവശ്യം ആണ്.

സാമൂഹ്യ  മനസാക്ഷി ഉണരണം. അല്ലെങ്കില്‍ ഇവര്‍ അടിച്ചു ഒതുക്ക പെട്ടേക്കാം...

Monday, December 05, 2011

പപ്പയുടെ സ്വന്തം മകന്‍ - മമ്മിയുടെയും.

വൃദ്ധരായ മാതാ പിതാക്കളെ  വൃദ്ധ സദനത്തില്‍ ആക്കിയിട്ടു തിരികെ വരുകയായിരുന്നു അവര്‍.  കാറിന്റെ പിന്‍ സീറ്റില്‍  വിഷാദ മൂകനായി ഒമ്പത് വയസ്സുകാരന്‍ മകന്‍.
"എന്താടാ ഒന്നും മിണ്ടാത്തത് ..." അച്ഛന്‍ ചോദിച്ചു.
"അല്ല അച്ഛാ അവിടെ അപ്പുപ്പനും അമ്മുമ്മയും ഒറ്റക്കല്ലേ? അത് ഓര്‍ത്തതാ."
"അല്ല മോനെ അവിടെ വേറെ ഒരു പാട് അപ്പുപ്പന്മാരും അമൂമ്മമാരും ഉണ്ട്.  അവരെ നോക്കാന്‍ നേഴ്സ് ആന്റിമാരും ഒക്കെ ഉണ്ട്..."
"അപ്പോ അവര്‍ക്ക് അവിടെ താമസിക്കാന്‍ പൈസ കൊടുക്കേണ്ടേ പപ്പാ?"
"വേണം മോനെ. അതൊക്കെ പപ്പാ കൊടുത്തിട്ടുണ്ട്." അമ്മയുടെ മറുപടി.
"ഒരു പാട് പൈസ ആകുമോ മമ്മി?"
"ഈ ചെക്കനിതെന്നാത്തിന്റെ സൂക്കേടാ. അതൊന്നും നീയിപ്പോ അറിയേണ്ട. അവന്റെയൊരു പുന്നാരം," മമ്മി കയര്‍ത്തു.
"അല്ല മമ്മി... അപ്പൂപ്പനെയും അമ്മുമ്മയേയും കൊണ്ടാക്കിയിടത്ത് വയസ്സാകുമ്പോള്‍  പപ്പയേയും മമ്മിയേയും എനിക്കും കൊണ്ടാക്കണ്ടേ. അത് കൊണ്ട് ചോദിച്ചതാ."
മകന്റെ മറുപടി നിഷ്കളങ്കം ആയിരുന്നു! 

Friday, December 02, 2011

മുല്ലപ്പെരിയാര്‍ അണക്കെട്ടിനു സ്വാഭാവിക മരണം അനുവദിക്കണം!


നൂറ്റി പതിനാറാണ്ട് കഴിയുന്ന മുല്ലപ്പെരിയാര്‍ അണകെട്ട് ഇപ്പോ പൊട്ടും ഇപ്പോ പൊട്ടും എന്ന് കേള്‍ക്കാന്‍ തുടങ്ങിയിട്ട് പതിറ്റാണ്ടുകള്‍ കഴിയുന്നു. നമ്മള്‍ മലയാളികള്‍ പൊട്ടും എന്ന് പറയും, നെഞ്ചത്തടിക്കും, നിലവിളിക്കും. കഴിഞ്ഞൊരു ദിവസം തേനിയിലെ ഒരു കര്‍ഷ സംഘടനാ നേതാവ് അബ്ബാസ് പറഞ്ഞതാണ് ഇക്കാര്യത്തില്‍ ശരിക്കും ശരി.

"മഴ തുടങ്ങുമ്പോള്‍ മലയാളീ മക്കള്‍ അണപൊട്ടും അണപൊട്ടും എന്നു നിലവിളിക്കും. മഴ കഴിയുമ്പോള്‍ നിലവിളിയും നില്‍ക്കും. ഞങ്ങള്‍ കഴിഞ്ഞ പത്തു നാല്പതു വര്‍ഷം ആയി കാണുന്ന നാടകം ആണിത്... ആയതു കൊണ്ട് ഇപ്പൊഴത്തെ ബഹളങ്ങളിലും ഞങ്ങള്‍ക്ക് പുതുമയൊന്നും ഇല്ല."

അബ്ബാസിന്റെ നിരീക്ഷണത്തില്‍ ചില സത്യങ്ങള്‍ ഉണ്ട് താനും. പതിവു നിലവിളിയില്‍ നിന്നും വ്യത്യാസ്തമായി ഇപ്പോഴത്തെ നിലവിളിക്ക് ഒച്ച കൂടുന്നതിനു പിന്നില്‍ ഒരര്‍ത്ഥത്തില്‍ യശ്ശശരീരനായ ടി.എം.ജേക്കബ്ബിനോട് നാം ഭൂമിമലയാളം കടപ്പെട്ടിരിക്കുന്നു. പടിവാതില്‍ക്കല്‍ എത്തി നില്‍ക്കുന്ന പിറവം ഉപതിരഞ്ഞെടുപ്പാണ് ഉമ്മന്‍ ചാണ്ടി മുതല്‍ അച്യുതാനന്ദന്‍ വരെയുള്ള നേതാക്കന്മാര്‍ പൊട്ടാന്‍ പോകുന്ന മുല്ലപ്പെരിയാര്‍ അണക്കെട്ടിനെ ഓര്‍ത്തു വിങ്ങിപൊട്ടാനുള്ള കാരണം!

മുല്ലപ്പെരിയാര്‍ അണക്കെട്ട് ഒരു ജലബോംബ് തന്നെയാണ് എന്നതില്‍ സംശയമില്ല തന്നെ. അപകടത്തില്‍ ആയ അണക്കെട്ട് പുനര്‍ നിര്‍മ്മിക്കണം എന്നു പറയുമ്പോള്‍ പഴകിയ ഒരു ബോംബ് നിര്‍വ്വീര്യമാക്കിയിട്ട് പുതിയത് ഒന്നു ഉണ്ടാക്കി വെക്കണം എന്നതാണര്‍ത്ഥം. സുര്‍ക്കീ മിശ്രിതത്തിന്റെ ഉറപ്പില്‍ നൂറ്റാണ്ട് പിന്നിട്ട അണകെട്ട് പൊളിച്ചു മാറ്റി പുതിയത് ഒന്നു നിര്‍മ്മിക്കുമ്പോള്‍ നമ്മള്‍ ആദ്യം അറിയേണ്ടുന്ന സംഗതി നിര്‍മ്മാണ മേഖല നൂറ്റാണ്ടു പിന്നിടുമ്പോള്‍ എത്തി നില്‍ക്കുന്ന ദുരവസ്ഥയെ കുറിച്ചു കൂടിയാണ്. വെട്ടിമലത്തും കുംഭകോണവും കൊടികുത്തി വാഴുന്ന ഇക്കാലത്ത് അവനവന്‍ കീശമാത്രം ലക്ഷ്യാമാക്കുന്ന നിര്‍മ്മാണ വിദഗ്ദരും കമ്പനികളും അണക്കെട്ടിന്റെ സുരക്ഷിതത്വത്തില്‍ എത്ര മാത്രം ശ്രദ്ധാലുക്കള്‍ ആയിരിക്കും എന്ന് കണ്ടറിയേണ്ടിയിരിക്കുന്നു. ശവപ്പെട്ടി കുംഭകോണം മുതല്‍ കോമണ്‍ വെല്‍ത്ത് അഴിമതി വരെ എണ്ണിയാല്‍ ഒടുങ്ങാത്ത കഴുത്തറുപ്പന്‍ അഴിമതി കഥകള്‍ ആധുനിക ഭാരതത്തെ ചൂഴ്ന്ന് നില്‍ക്കുന്നു. അതായത് കോടാനു കോടി വെട്ടിമലത്താനുള്ള വാതായനങ്ങള്‍ തുറന്നിടുന്ന ബൃഹത്ത് പദ്ധതിയാണ് അണക്കെട്ട് പുനര്‍നിര്‍മ്മാണം എന്നര്‍ത്ഥം.

സമരങ്ങളുടേയും പ്രതിഷേധങ്ങളുടേയും ഒടുവില്‍ ഡാം പുനര്‍നിര്‍മ്മിക്കാനുള്ള സാഹചര്യം ഏതെങ്കിലും വിധത്തില്‍ ഉരിതിരിഞ്ഞാലും അതിന്റെ ഈട് നൂറ്റാണ്ടു മുന്നേ നിര്‍മ്മിക്കപ്പെട്ട അണക്കെട്ടിനു ഉണ്ടായിരുന്നതു പോലെ ഉണ്ടാകണം എന്നില്ല - അതു സാങ്കേതം എത്ര മാത്രം പുരോഗമിച്ചിട്ടുണ്ട് എങ്കിലും. ചുരുക്കത്തില്‍ താരതമ്യേന ഈടുള്ള അത്ര വല്ല്യേ കുഴപ്പങ്ങള്‍ ഒന്നും ഉണ്ടാക്കാത്ത പ്രത്യക്ഷത്തില്‍ തന്നെ ഈടുറ്റ ഒരു നിര്‍മ്മിതി ഇടിച്ചു നിരത്തി ദുര്‍ബലമായ മറ്റൊന്നു ഉണ്ടാക്കി വരും തലമുറയെ വെള്ളത്തില്‍ മുക്കി കൊല്ലാന്‍ തക്ക പരുവത്തില്‍ ഒരു ജലബോംബ് പുനര്‍ സൃഷ്ടിക്കാന്‍ വേണ്ടി നടക്കുന്ന വിലാപങ്ങള്‍ എതിര്‍ക്കപ്പെടണം. വേണ്ടത് മുല്ലപ്പെരിയാറിനു കുറുകേയുള്ള പടുകൂറ്റന്‍ ജലസംഭരണി ഇല്ലാതാവുകയാണ്.

ഡാം നിര്‍മ്മിക്കുന്നതിനു വേണ്ടി ഏറ്റവും കുറഞ്ഞത് ഒരു പതിനഞ്ചു വര്‍ഷം എങ്കിലും വേണ്ടി വരും എന്നു കണക്കാക്കാം. അങ്ങിനെയെങ്കില്‍ ഈ പതിനഞ്ചു വര്‍ഷം അണക്കെട്ടിന്റെ അവസ്ഥ എന്തായിരിക്കും എന്ന് ആര്‍ക്കെങ്കിലും പ്രവചിക്കാന്‍ കഴിയുമോ? എന്തിനേറെ? അണക്കെട്ട് അപകടത്തില്‍ പെട്ടാല്‍ ഉണ്ടാകാവുന്ന അപകടത്തിന്റെ തോത് എന്തായിരിക്കുമെന്ന് പഠിക്കാന്‍ റൂര്‍ക്കേല ഐ.ഐ.ടിയുമായി ഒപ്പിട്ട കരാറിലെ വ്യവസ്ഥ ആറുമാസത്തിനകം റിപ്പോര്‍ട്ട് സമര്‍പ്പിക്കണം എന്നാണ്. അപ്പോ ഈ ആറുമാസം അണക്കെട്ടിനു അപകടം ഒന്നും വരില്ലാ എന്ന് ആരാണ് നിശ്ചയിച്ചിരിക്കുന്നത്?

അണക്കെട്ടുമായി ബന്ധപ്പെട്ട തര്‍ക്കങ്ങള്‍ കേള്‍ക്കുന്ന ഭാരതത്തിന്റെ പരമോന്നോത നീതി പീഠം കേസ് അവധിക്കു വെച്ചു അവധിക്കു വെച്ച് മുമ്പോട്ടു പോകുന്നു. അടുത്ത ഹിയറിങ്ങ് ജനുവരി ഒമ്പതാം തീയതി. അപകടത്തില്‍ ആയ അണകെട്ട് തകര്‍ന്നാല്‍ നമ്മള്‍ പറയുന്നതു പോലെ അല്ലെങ്കില്‍ ഇപ്പോള്‍ പ്രചരിപ്പിക്കപ്പെടുന്ന പോലെ മുപ്പത് ലക്ഷത്തില്‍ അധികം ജനങ്ങള്‍ ഒറ്റയടിക്ക് കൊല്ലപ്പെടാവുന്ന ഒരു കേസില്‍ കോടതിയുടെ മെല്ലെപ്പോക്ക് നയം തന്നെ കുറ്റകരമായ അനാസ്ഥയല്ലേ? പറയപ്പെടുന്നതു പോലെ തന്നെ ഭീതിതം ആയിരിക്കും സംഭവിക്കുന്നത് എങ്കില്‍ ലോകം കണ്ട ഏറ്റവും ദാരുണവും ഭീവത്സവുമായ ഈ പ്രതിസന്ധിയേക്കാള്‍ പ്രാധാന്യമുള്ള എന്ത് കാര്യമാണ് ഇന്‍ഡ്യാ മഹാരാജ്യത്ത് പരമോന്നത നീതിപീഠത്തിനു പരിഗണിക്കാനുള്ളത്?

നൂറ്റി പതിനാറു വര്‍ഷം മുമ്പ് നിര്‍മ്മിക്കപ്പെട്ട ഡാമിനു അന്നു കല്പിച്ചിരുന്ന ആയുസ് അമ്പത് വര്‍ഷമാണ്. പക്ഷേ ഡാം ഇപ്പോഴും നിലനില്‍ക്കുന്നു. ഇടക്ക് ഗ്രൌട്ടടിച്ച് ശക്തിപ്പെടുത്തി എന്നതൊന്നും കണക്കില്‍ എടുക്കേണ്ട. പ്രധാന നിര്‍മ്മിതിയുടെ ബലവും നൂറ്റാണ്ടു മുമ്പത്തെ നിര്‍മ്മിതിയുടെ സാങ്കേതിക വിദ്യയുടെ മികവുമാണ് ഡാം ഇന്നും നിലനില്‍ക്കാന്‍ കാരണം. ഇപ്പോഴത്തെ സാങ്കേതിക വിദ്യായാണ് ഏറ്റവും മികച്ചത് എന്ന തെറ്റിദ്ധാരണയാണ് നമ്മേ ഭരിക്കുന്നത്. സിമന്റും കോണ്‍ക്രീറ്റും കണ്ടുപിടിക്കപ്പെടാതിരുന്ന കാലത്ത് നിര്‍മ്മിക്കപ്പെട്ട എടുപ്പുകള്‍ ഒരു കുഴപ്പവും ഇല്ലാതെ നൂറ്റാണ്ടുകള്‍ പിന്നിട്ട് ഇപ്പോഴും നമ്മുക്ക് മുന്നില്‍ ഉണ്ട്. അണക്കെട്ടിനു തുല്ല്യം അല്ലാ എങ്കിലും ലോകത്തിലെ ഏറ്റവും വല്ലിയ ഒറ്റ നിര്‍മ്മിതിയായ ചൈനാ വന്മതില്‍ ഒരു ഉദാഹരണം മാത്രം. അതായത് ഡാം അപകടത്തില്‍ ആണ് എന്നതു വസ്തുത. അതു പക്ഷേ കാലപഴക്കം കൊണ്ടോ സുര്‍ക്കിയുടെ സാങ്കേതം കൊണ്ടോ അല്ല. നൂറ്റി മുപ്പത്തിയാറ് അടി ഉയരത്തില്‍ ആയിരത്തി ഇരുന്നൂറ് അടി നീളത്തില്‍ പതിനഞ്ചു ദശലക്ഷം ഘനയടി  വെള്ളം കെട്ടി നില്‍ക്കുന്നത് ഏതു സാങ്കേതിക വിദ്യയുടെ അടിസ്ഥാനത്തില്‍ ആണെങ്കിലും അപകടകരം തന്നെയെന്നതാണ് വസ്തുത. അത് ഇല്ലാതാവുക തന്നെ ചെയ്യണം - ഒരു നിമിഷം മുന്നേ.

മുല്ലപ്പെരിയാര്‍ മാത്രമല്ല. എല്ലാ ഡാമുകളും ജല ബോംബുകള്‍ തന്നെയാണ്. പറഞ്ഞ് കേള്‍ക്കുന്നതു പോലെ റിക്ടര്‍ സ്കെയില്‍ ആറോ അതിനടുത്തോ വരുന്ന ഏതൊരു ഭൂകമ്പവും മുല്ലപ്പെരിയാര്‍ അണക്കെട്ടിനെ മാത്രമല്ല ഒഴിക്കി കൊണ്ട് പോവുക. കൂടെ കുറഞ്ഞത് അര ഡസന്‍ ഡാമുകളെങ്കിലും ഒലിച്ചു പോകും. ഒരു പക്ഷേ അപ്പോള്‍ ഏറ്റവും ഒടുക്കമായിരിക്കും മുല്ലപ്പെരിയാര്‍ ഒലിച്ചു പോവുക. ആദ്യമാദ്യം ആധുനിക സാങ്കേതിക വിദ്യ ഒലിച്ചു പോകാനാണ് സാധ്യത. കട്ടുമുടിച്ചതിന്റെ ബാക്കിയായിരിക്കുമല്ലോ ഇപ്പോള്‍ കാണുന്ന ഡാമിന്റെ ഭീമാകാര രൂപങ്ങള്‍ .

മുല്ലപ്പെരിയാര്‍ അണക്കെട്ട് ഇല്ലാതാവുന്നതോടെ തമിഴ് നാടിന്റെ പശ്ചിമ ഘട്ടത്തിലെ കാര്‍ഷിക രംഗം തകരും. അതിനുള്ള പരിഹാരമാര്‍ഗ്ഗങ്ങള്‍ അവിടുത്തെ സര്‍ക്കാര്‍ കണ്ടെത്തിക്കോളും. അക്കാര്യത്തില്‍ നമ്മേളേക്കാള്‍ എത്രയോ മുന്നിലാണ് കാര്‍ഷിക വൃത്തി ഒരു സംസ്കാരമായി കൊണ്ടു നടക്കുന്ന തമിഴ് ജനത. എന്നാല്‍ അതോടൊപ്പം നമ്മുടെ കാര്യവും കഷ്ടത്തില്‍ ആകും എന്ന് ഭയപ്പെടണം. ആ അവസ്ഥ പക്ഷേ ഡാം പൊട്ടുന്നതിനേക്കാള്‍ ഭീകരം ആയിരിക്കും. അതും പരിഹരിക്കാന്‍ കഴിയും. മെട്രോയും മെടോ സിറ്റികളും നഗരങ്ങളെ സ്മാര്‍ട്ടാക്കല്‍ പദ്ധതികള്‍ നടപ്പാക്കലും ഒക്കെയായി കോടികള്‍ ഒഴുക്കുന്നതിനു മുന്നേ തീറ്റയുടെ കാര്യത്തില്‍ ഭരണകൂടം കേവല ശ്രദ്ധ കൊടുത്താല്‍ പച്ചക്കറികളും അരിയും ഒക്കെ യധേഷ്ടം ഉല്പാദിപ്പിക്കാന്‍ നമ്മുക്കും കഴിയും. അതിനു ഡാം ഉണ്ടാക്കി തമിഴ് നാടിനു കൊടുക്കാം എന്നു നാം വീമ്പിളക്കുന്ന സമ്പത്തിന്റെ ചെറിയൊരു അംശം മതിയാകും. കര്‍ഷകര്‍ക്ക് പലിശയില്ലാത്ത വായ്പകളും സബ്സിഡികളും നല്‍കി കാര്‍ഷിക രംഗം പുനരുജ്ജീവിപ്പിച്ച് വിഭവങ്ങളും കാര്‍ഷിക വിളകളും നശിച്ചു പോകാതെ ശേഖരിച്ച് സൂക്ഷിച്ച് കൃത്യമായി വിതരണം ചെയ്താല്‍ തീറ്റക്കായി ചുരം ഇറങ്ങി വരുന്ന അന്യസംസ്ഥാന വാഹനങ്ങള്‍ക്കായി കാത്തിരിക്കുന്ന ഗതികേട് ഒഴിവാക്കാം.

ഡാം തകരാന്‍ അനുവദിക്കുകയാണ് ഇത്തരുണത്തില്‍ നാം ചെയ്യേണ്ടത്. തകരാന്‍ പോകുന്ന ഡാമിനെ ചൂണ്ടി ഭീതി പടര്‍ത്തുന്ന ദൃശ്യശ്രവ്യ മാധ്യമങ്ങള്‍ക്ക് പൊതുജനത്തെ തങ്ങളുടെ മാധ്യമങ്ങളുടെ മുന്നില്‍ പിടിച്ചിരുത്തി ടാമ്പറിങ്ങ് റേറ്റ് കൂട്ടി പരസ്യ വരുമാനം കൂട്ടുക എന്നതില്‍ കവിഞ്ഞ് എന്തെങ്കിലും ലക്ഷ്യം ഉണ്ട് എന്ന് കരുതുന്നത് തന്നെ വിഡ്ഢിത്തം ആണ്. ലാഭത്തിനപ്പുറം, സേവനം കുത്തക മാധ്യമങ്ങളുടെ ലക്ഷ്യമേ അല്ല എന്നത് ദൃശ്യ ശ്രവ്യ മാധ്യമങ്ങള്‍ക്ക് മുന്നില്‍ ഇരിക്കുന്ന ഒരോ നിമിഷവും നാം ഓര്‍ത്തു കൊണ്ടേയിരിക്കണം. ഇന്ന് ഏതെങ്കിലും മന്ത്രിമാരോ പൌരമുഖ്യന്മാരോ ഉള്‍പ്പെട്ട ഒരു പെണ്‍‌വാണിഭ കേസ് പുറത്ത് വന്നാല്‍ കഴിഞ്ഞു ചാനലുകളിലെ മുല്ലപ്പെരിയാര്‍!

രാഷ്ട്രീയ പാര്‍ട്ടികളുടെ നിലപാടുകള്‍ പിറവം ഉപതിരഞ്ഞെടുപ്പ് വരെ പ്രതീക്ഷിച്ചാല്‍ മതി. ഇത് തിരിച്ചറിയണം എങ്കില്‍ മുല്ലപ്പെരിയാര്‍ ഡാമിന്റെ അടിവാരത്തില്‍ വര്‍ഷങ്ങളായി തുടരുന്ന അതിജീവനത്തിന്റെ സമരത്തോടു രാഷ്ട്രീയ പാര്‍ട്ടികളും പൊതുസമൂഹവും സ്വീകരിച്ച നിലപാടുകള്‍ മാത്രം വിശകലനം ചെയ്താല്‍ മതി. ഇപ്പോഴത്തെ ഭൂചലനത്തിന്റെ പിന്നാലെ സമരം ചെയ്യാനും നിരാഹാരം കിടക്കാനും മുല്ലപ്പെരിയാറില്‍ ചെന്ന നേതാക്കന്മാര്‍ അറിയുന്നത് അവിടെ ചപ്പാത്ത് എന്നൊരു സ്ഥലം ഉണ്ട് എന്നും അവിടെ ഒരു സമര പന്തല്‍ ഉണ്ട് എന്നും അവിടെ വര്‍ഷങ്ങളായി ഭീതിയുടെ താഴ്വരയില്‍ അതിജീവനത്തിനു വേണ്ടി സഹന സമരം നടക്കുന്നുണ്ട് എന്നുമാണ്‍. അപ്പോ പിന്നെ ഇന്നി വേറെ പന്തല്‍ വേണ്ടല്ലോ എന്നു കരുതി അവിടെ തന്നെ അവരോടൊപ്പം ചേര്‍ന്ന് അങ്ങ് ധര്‍ണ്ണയും ഉപവാസ സമരവും പുറം‌പൂച്ചു കാരായ നേതാക്കന്മാര്‍ കൊട്ടും കുരവുമായി ആരംഭിച്ചു എന്നു മാത്രം. പിറവം ഉപതിരഞ്ഞെടുപ്പ് കഴിഞ്ഞാല്‍ വീണ്ടും സമരപന്തലില്‍ ചപ്പാത്തുകാര്‍ മാത്രമാകും.

അക്ഷരാര്‍ത്ഥത്തില്‍ ഇന്ന് മുല്ലപ്പെരിയാര്‍ ഡാമിന്റെ ദുരന്തമുഖത്ത് ആത്മാര്‍ത്ഥതയുള്ള ഒരു സമരവും നിലപാടും ഉണ്ടെങ്കില്‍ അത് അടിവാരത്ത് മരണം മുന്നില്‍ കണ്ട് കഴിയുന്ന വര്‍ഷങ്ങളായി ജീവനു വേണ്ടി സമരം ചെയ്യുന്ന ആ ഒരു പിടി മനുഷ്യജന്മങ്ങളുടേതു മാത്രമാണ്. ബാക്കിയെല്ലാം വെറും പടം. സോഷ്യല്‍ നെറ്റുവര്‍ക്കുകളില്‍ ലൈക്ക് അടിച്ചും പോസ്റ്റര്‍ പതിച്ചും കളിക്കുന്നതും അതില്‍ നിന്നും ഒട്ടും വ്യത്യസ്ഥമല്ല തന്നെ!

മുല്ലപ്പെരിയാര്‍ ഡാമിനു സ്വാഭാവിക മരണം അനുവദിക്കണം. കേരളത്തിന്റെ ഉത്തരവാദിത്വത്തില്‍ അതു പൊളിച്ചാല്‍ നമ്മുടെ ചിലവില്‍ പുനര്‍നിര്‍മ്മിക്കേണ്ടി വരും. സ്വാഭാവിക മരണം സംഭവിച്ചാല്‍ അതു ഒഴിവാകും. വീണ്ടും ഒരു ദുരന്തം കെട്ടിപ്പടുക്കാന്‍ ആരും ആവശ്യപ്പെടില്ലല്ലോ? പക്ഷേ തകര്‍ച്ച സംഭവിച്ചാല്‍ വന്‍ ദുരന്തം അഭിമുഖീകരിക്കേണ്ടി വരും. അതിനുള്ള പരിഹാരത്തെ കുറിച്ചാണ് നാം ഇപ്പോള്‍ ചിന്തിക്കുകയും, ചര്‍ച്ച ചെയ്യുകയും, പരിഹാര മാര്‍ഗ്ഗങ്ങള്‍ തേടുകയും ചെയ്യേണ്ടത്. ഇപ്പോള്‍ ഡാം പുനര്‍ നിര്‍മ്മാണത്തിനു വേണ്ടി അലമുറയിട്ട് വെറുതെ ഒഴുക്കി കളയുന്ന ഊര്‍ജ്ജവും ശ്രദ്ധയും അപകടം സംഭവിച്ചാല്‍ ഒരു ജീവന്‍ പോലും അപകടത്തില്‍ ആകാതെ എങ്ങിനെ അപകടത്തെ നേരിടാം എന്നു ചിന്തിക്കുന്നതിലേക്ക് മാറ്റാം. ഒരു നിമിഷം വൈകാതെ അതിനുള്ള ശ്രമം തുടങ്ങാം.

അടുത്ത നിമിഷം ഡാം പൊട്ടാം എന്ന അടിയന്തിര സ്ഥിതി മുന്നില്‍ കണ്ട് ഏറ്റവും അപകട മേഖലയില്‍ കഴിയുന്നവരെ എത്രയും വേഗം സുരക്ഷിത മേഖലയിലെക്ക് മാറ്റാനുള്ള നടപടികള്‍ തുടങ്ങാം.  വെള്ളം സ്വഭാവിക വഴിത്താരയിലൂടെ അറബിക്കടലില്‍ എത്തിക്കാനുള്ള ബണ്ടുകളും മതിലുകളും പുതിയ കൈവഴികളും ഒക്കെ ഉണ്ടാക്കി തകരുന്ന ഡാമിനെ അതര്‍ഹിക്കുന്ന ബഹുമാനത്തോടെയും സ്നേഹത്തോടെയും അറബി കടലില്‍ കൊണ്ട് ചെന്ന് സമാധിയിരുത്താം. അതൊരു പക്ഷേ ലോകത്തിനു തന്നെ മാതൃകയായേക്കാം. അസാധ്യമായി ഒന്നും ഇല്ലാ എന്ന് ഖനിയില്‍ പെട്ട മനുഷ്യരെ മാസങ്ങള്‍ക്ക് ശേഷം ജീവനോടെ പുറം ലോകത്തെത്തിച്ച നിശ്ചയ ദാര്‍ഢ്യം നമ്മുക്ക് മുന്നില്‍ പുഞ്ചിരിയോടെ നില്‍ക്കുന്നുണ്ടല്ലോ?

മറന്നു പോകരുത്!

മുല്ലപ്പെരിയാര്‍ ഡാം ജല ബോംബാണ്. അതു പൊളിച്ച് പുതിയത് നിര്‍മ്മിക്കുക എന്നാല്‍ ഉഗ്രസ്ഫോടക ശേഷിയുള്ള ബോംബ് നിര്‍വ്വീര്യമാക്കിയിട്ട് പുതിയത് ഒന്നു നിര്‍മ്മിച്ച് സൂക്ഷിക്കുന്നതു പോലെ അപകടകരമാണ്. ഡാം ഇല്ലാതാവുകയാണ് നാട്ടിന്റെ സുരക്ഷക്ക് ആവശ്യം. കേരളത്തിനു ജീവനും തമിഴ് നാടിനു വെള്ളവും എന്ന മുദ്രാവാക്യത്തിനു പകരം "ഡാമിന്റെ സുരക്ഷിത മരണവും കേരളത്തിനു ഭീതിയില്‍ നിന്നുള്ള മോചനവും"എന്നതാകട്ടെ നമ്മുടെ മുദ്രാവാക്യം.

പ്രിയപ്പെട്ട മുല്ലപ്പെരിയാര്‍ ഡാമേ,
നേരുന്നു നിന്നാസന്ന മൃതിയില്‍ നിനക്കാത്മ ശാന്തി....
നിനക്കാത്മ ശാന്തി!

Saturday, September 17, 2011

സുതാര്യ കേരളം....

അട്ടപ്പാടി ആദിവാസി കോളനിയില്‍ കുടിയേറി കാറ്റു യന്ത്രം വിതച്ച സുസ്ലോണ്‍ കമ്പനിക്ക് സര്‍ക്കാര്‍ വക അംഗീകരം നല്‍കിയ വാര്‍ത്ത ആദ്യം നിഷേധിക്കുകയും പിന്നെയും നിഷേധിക്കുകയും പിന്നെയും പിന്നെയും നിഷേധിക്കുകയും ചെയ്ത ഉമ്മന്‍ ചാണ്ടി സര്‍ക്കാര്‍ ഇന്നോടെ എല്ലാം വിഴുങ്ങി സുസ്ലോണ്‍ കമ്പനിയും ആദിവാസികളും ചേര്‍ന്ന് നടത്താന്‍ പോകുന്ന വായുവില്‍ നിന്നും കറണ്ടുണ്ടാക്കല്‍ പദ്ധതിക്ക് അനുമതി നല്‍കി കൊണ്ട് ഉത്തരവ് ഇറക്കിയിരിക്കുന്നു.അങ്ങിനെ രണ്ടു പേര്‍ ഉള്‍പ്പെടുന്ന ഒരു കരാര്‍ ഇരുവരും അറിയാതെ മൂന്നാന് പ്രാവര്‍ത്തികമാക്കാമെന്ന് ലോകത്ത് ആദ്യമായി ഭൂമിമലയാളത്തില്‍ തെളിയിക്കപ്പെട്ടിരിക്കുന്നു. പക്ഷേ ഇതൊരു തുടക്കമാണ്. എന്തെല്ലാം സാധ്യതകളാണ് ഈ ഒരു ഉത്തരവിലൂടെ ഭൂമിമലയാളത്തിനു തുറന്ന് കിട്ടുന്നത്? ആലോചിച്ചിട്ട് രോമാഞ്ചം ഉണ്ടാകുന്നു... ഉള്ളു കുളിരുന്നു...

മല്‍ട്ടി ലെവല്‍ മാര്‍ക്കറ്റിങ്ങും മണിചെയിനും നിയമ വിധേയമാകാന്‍ പോകുന്നു. ഇന്നലെ വരെ ഇതൊക്കെ നിയമ വിരുദ്ധമായിരുന്നു..

നിയമങ്ങള്‍ ലംഘിക്കപ്പെടാനുള്ളതല്ലെങ്കില്‍ പിന്നെ മറ്റെന്തിനാണ് അതു ഉണ്ടാക്കുന്നത്? ലംഘിക്കപ്പെടുന്ന നിയമങ്ങളെ സാധൂകരിക്കാനാണ് നിയമസഭയും മന്ത്രിമാരും എന്ന നിലയിലാണ് കാര്യങ്ങള്‍. ഇന്നത്തെ നിയമ ലംഘനങ്ങള്‍ നാളത്തെ നിയമങ്ങളായി മാറാം. നിയമങ്ങള്‍ നാളെ നിയമങ്ങളേ അല്ലാതായും മാറാം. അതൊക്കെ നിയമത്തിന്റെ കാര്യം. നമ്മുടെ കാര്യം സുതാര്യ കെരളം സുന്ദര കേരളം....

ബലാത്സംഗം ചെയ്യപ്പെടുന്ന സ്ത്രീകള്‍ക്കായി ഒരു പുതിയ പദ്ധതി സര്‍ക്കാറിനു ആവിഷ്കരിക്കാം. ബലാത്സംഗത്തിലൂടെ മാനം പോയ ലേഡീസിന് ഇന്നിമുതല്‍ മാനം മാന്യമായി വിറ്റു കാശുണ്ടാക്കാം. ഉണ്ടാക്കുന്ന വരുമാനത്തില്‍ നിന്നും അഞ്ചു ശതമാനം അതാതു ദിവസം തന്നെ ട്രഷറിയില്‍ അടച്ചു ബില്ലുമേടിക്കണം എന്നു മാത്രം. അപ്പോ പിന്നെ ഒരിക്കലും ട്രഷറി അടച്ചിടേണ്ടി വരികയോ കേന്ദ്രത്തീന്ന് ഓവര്‍ ഡ്രാഫ്റ്റ് എടുക്കേണ്ടി വരികയോ ചെയ്യുകയില്ലാ എന്നത് മൂന്നരത്തരം. കൂടുതല്‍ ബലാത്സംഗങ്ങള്‍ നടത്തുന്നവനു, വ്യഭിചാര വ്യവസായത്തിലേക്ക് പെണ്‍കുട്ടികളെ ആകര്‍ഷിപ്പിക്കുന്നതിനുള്ള വ്യവസായ രത്നം അവാര്‍ഡ് നല്‍കി ആദരിക്കാം.

മോഷണം ഒരു കല കൂടിയാണ്. സര്‍ക്കാറിന്റെയോ മറ്റു ഏജന്‍സികളുടേയോ എതെങ്കിലും തരത്തിലുള്ള സഹായം സ്വീകരിക്കാതെ സ്വയം തൊഴിലില്‍ ഏര്‍പ്പെട്ടിരിക്കുന്ന മോഷണ തൊഴിലാളിയോടൊപ്പം ചേര്‍ന്ന് പുതിയ മോഷണം നടത്തി മോഷണ മുതലില്‍ നിന്നും അഞ്ചു ശതമാനം സ്വീകരിച്ചു കൊണ്ടു പുതിയ തൊഴില്‍ സാധ്യതകളിലേക്ക് ഭൂമിമലയാളത്തിന്റെ പുതുതലമുറക്ക് ഉണര്‍ന്ന് എഴുന്നേല്‍ക്കാം. നാളത്തെ പ്രഭാതം കുഞ്ഞുങ്ങളേ നിങ്ങള്‍ക്കുള്ളതാണ് നിങ്ങള്‍ക്കു മാത്രം. മോഷണത്തിനു വിധേയരായവര്‍ക്ക് ഇന്നി മുതല്‍ മോഷ്ടാക്കള്‍ അതാതു ദിവസത്തെ മോഷണ വരുമാനത്തില്‍ നിന്നും അഞ്ചു ശതമാനം വീതം ലാഭ വിഹിതം നല്‍കണം. ഒരു തരത്തില്‍ പറഞ്ഞാല്‍ നെറ്റ് വര്‍ക്ക് മാര്‍ക്കറ്റിംഗ് തന്നെ. അതായത് ഇന്നു ഒരാളുടെ വീടു മോഷ്ടിക്കപ്പെട്ടാല്‍ ഉടമ മറ്റൊരു വീട് മോഷ്ടാക്കള്‍ക്ക് കാട്ടി കൊടുക്കുക. അവിടെ നിന്നും ലഭിക്കുന്ന വരുമാനത്തിന്റെ അഞ്ചു ശതമാനം ആദ്യം മോഷണത്തിനു വിധേയമായ വീട്ടുകാരനു നല്‍കുക. ആദ്യം കൊള്ളയടിക്കപ്പെട്ട വീട്ടുകാരനും രണ്ടാമതു കൊള്ളയടിക്കപ്പെട്ട വീട്ടുകാരനും കൂടി മൂന്നാമതൊരു വീടു കൊള്ളയടിക്കാന്‍ മോഷ്ടാവിനു കാട്ടി കൊടുക്കുക... അങ്ങിനെ ലാഭത്തില്‍ നിന്നും ലാഭത്തിലെക്കു നീങ്ങുക... ഹാ... എന്തു സുന്ദരം ആയിരിക്കും ആ നിമിഷങ്ങള്‍...

സ്പിരിറ്റ് കടത്തി കൊണ്ടു വരുന്നവര്‍ ഇന്നി മുതല്‍ അഞ്ചു ശതമാനം ലാഭം ചെക്ക് പോസ്റ്റുകളില്‍ കൊടുത്താല്‍ മതി. ചെക്ക് പോസ്റ്റിലെ ജീവനക്കാര്‍ക്ക് വേതനം നല്‍കല്‍ സര്‍ക്കാറിനു അവസാനിപ്പിക്കാം. സര്‍ക്കാര്‍ വേതനത്തേക്കാള്‍ വേദന കുറവായ അദ്ധ്വാനം കൊണ്ടു ജീവനക്കാര്‍ക്ക് ലക്ഷങ്ങള്‍ സമ്പാതിക്കുക്കയും ആവാം. ചെക്കു പോസ്റ്റിലെ ജീവനക്കാരെ നിയമിക്കാനുള്ള കരാര്‍ വേണമെങ്കില്‍ സ്പിരിറ്റ് കടത്തുകാരെ ഏല്പിക്കുകയും ആകാം. ഏറ്റവും കുറഞ്ഞത് കാല്‍ കോടി ഒരോ നിയമനത്തിനും നിയമം മൂലം ഈടാക്കാം. അതില്‍ നിന്നും ഒരു അഞ്ചു ശതമാനം സര്‍ക്കാര്‍ ട്രഷറിയില്‍ കെട്ടിയാല്‍ അതും നാട്ടിന്റെ വികസനത്തിനു ഉപയോഗിക്കാം.

പെണ്‍ വാണിഭം ദേശസാല്‍ക്കരിക്കാം. നാലു മുതല്‍ എഴുപത് വയസ്സു വരെയുള്ള വാണിഭങ്ങള്‍ പ്രത്യേകം പ്രത്യേകം തരം തിരിച്ച് അഞ്ചു ശതമാനം മുതല്‍ ഇരുപത്തി അഞ്ചു ശതമാനം വരെ ലാഭ വിഹിതം വീട്ടുകാര്‍ക്കു നല്‍കാം. ഇന്നി പിതാവോ മാതാവോ നേരിട്ട് നടത്തുന്ന വാണിഭമാണേല്‍ ലാഭ വിഹിതം അതാതു ദിവസം സര്‍ക്കാര്‍ ട്രഷറിയില്‍ നേരിട്ട് അടച്ച് രസീത് വാങ്ങാം. അങ്ങിനെ നാടിന്റെ സമഗ്ര വികസനത്തിനു സഹായിക്കുന്ന മാതാപിതാക്കള്‍ക്ക് വീരാളി പട്ട് നല്‍കി ആദരിക്കാം.

പൊതു പരീക്ഷകളുടേയും പി.എസ്സ്.സി ടെസ്റ്റുകളുടേയും ചോദ്യപേപ്പറുകള്‍ ചോര്‍ത്തി ആവശ്യക്കാര്‍ക്ക് നല്‍കാം. ചോദ്യ പേപ്പറുകള്‍ മുങ്കൂറായി വേണ്ടുന്നവരില്‍ നിന്നും ഒരു ഫീസ് വാങ്ങി അതും നാട്ടിന്റെ സമഗ്ര വികസനത്തിനു ഉപയോഗിക്കാം. സുതാര്യ കേരളം സുന്ദര കേരളം...ഹോ... കോള്‍മയിര്‍ കൊള്ളുന്നു.

കൊട്ടേഷന്‍ സംഘങ്ങള്‍ക്ക് ലൈസന്‍സിങ്ങ് ഏര്‍പ്പെടുത്താം. കാലു വെട്ട്, കൈ വെട്ട്, തല വെട്ട്, തട്ടികൊണ്ടു പോകല്‍ തുടങ്ങിയ പ്രത്യുല്പാദനപരമായ കലാപരിപാടികളില്‍ ഏര്‍പ്പെടുന്നവര്‍ക്ക് അതാതു മേഖലയില്‍ നിര്‍ഭയം തൊഴില്‍ എടുക്കുന്നതിനു വ്യത്യസ്ഥമായ ഫീസ് വാങ്ങി അനുമതി നല്‍കാം. വാങ്ങുന്ന ഫീസിന്റെ അഞ്ചു ശതമാനം അതാതു ദിവസം തന്നെ ട്രഷറിയില്‍ അടക്കാന്‍ നിര്‍ദ്ദേശിക്കണം എന്നു മാത്രം. പിറ്റേന്ന് ആയാല്‍ സംഗതി പണം അങ്ങൊട്ടു കൊടുക്കേണ്ടി വരുമെന്ന് പറയാതെ അറിയാമല്ലോ? വേണമെങ്കില്‍ പോലീസ് സ്റ്റേഷനുകള്‍ കൊട്ടേഷന്‍ സംഘങ്ങള്‍ക്ക് പാട്ടത്തിനും നല്‍കാം. എന്നിട്ട് ഇപ്പൊഴത്തെ പോലീസ്കാര്‍ക്ക് വ്യാജ വാറ്റില്‍ പരിശീലനം നല്‍കി കരാറടിസ്ഥാനത്തില്‍ വാറ്റിനു അനുവാദം നല്‍കാം. കിട്ടുന്ന വരുമാനത്തിന്റെ അഞ്ചു ശതമാനം നേരിട്ട് സര്‍ക്കാര്‍ ഖജനാവിനു മുതല്‍ കൂട്ടാം. പോലീസിനു ശമ്പളവും നല്‍കണ്ട, ജനത്തിനാണേല്‍ രണ്ടില്‍ ഒന്നിനെ ഭയന്നാല്‍ മതിയെന്ന ഗുണവും ഉണ്ട്.

സര്‍ജ്ജറിയുള്ള സ്വകാര്യ പൊതുമേഖലാ ആശുപത്രികളില്‍ പ്രവേശിപ്പിക്കുന്ന രോഗികളില്‍ നിന്നും വൃക്കമുതല്‍ തലച്ചോര്‍ വരെ അറുത്തെടുത്ത് വില്‍ക്കാം. കണ്ടു പിടിക്കപ്പെട്ടാല്‍ പരേതരുടെ ബന്ധുക്കള്‍ക്ക് അവയവങ്ങള്‍ വിറ്റു കിട്ടുന്ന തുകയില്‍ അഞ്ചു ശതമാനം നല്‍കി ഒതുക്കാം. ഇതും നെറ്റ് വര്‍ക്കു മാര്‍ക്കറ്റിങ്ങിനു പറ്റിയ സംഗതിയാണ്. വൃക്ക പോയവനു വേണമെങ്കില്‍ കിഡ്നിയുള്ള മറ്റു സഹജീവികളെ പറഞ്ഞ് പറ്റിച്ച് വൃക്ക തട്ടിപ്പ് നടത്തി അഞ്ചു ശതമാനം കമ്മീഷന്‍ നേടാം. അങ്ങിനെ കേരളം സ്വയം പര്യാപ്തതയിലേക്ക് വെച്ചടി വെച്ചടി നീങ്ങുന്നത് കണ്‍കുളിര്‍ക്കേ കാണാം.

വ്യാജ സിഡി നിര്‍മ്മാണം മുതല്‍ അന്യന്റെ വളപ്പില്‍ കയറി വ്യാജ വാറ്റ് നടത്തുന്നതു വരെയുള്ള ലാഭകരമായ എല്ലാ വ്യവസായങ്ങളും ലൈസന്‍സിങ്ങിലൂടെ നിയമ വിധേയമാകുന്ന സുന്ദര സുരഭില സുതാര്യ കേരളം മധുര മനോജ്ഞമായിരിക്കും... എന്നാല്‍ എല്ലാം സര്‍ക്കാര്‍ ഉത്തരവിലൂടെ ആയിരിക്കണം എന്നു മാത്രം.

വികസനം അതല്ലേ എല്ലാം...

Tuesday, September 06, 2011

ബാലകൃഷ്ണ പിള്ളയുടെ സുഖ തടവ് ഉണര്‍ത്തുന്ന സംശയങ്ങള്‍...

കേരള മുഖ്യമന്ത്രി, പ്രതിപക്ഷ നേതാവ്, അന്വോഷണാത്മക പത്രപ്രവര്‍ത്തകര്‍, നീതി പാലകര്‍, നിയമ വിദഗ്ദര്‍, നീതി പീഠം, സാമൂഹ്യ വിമര്‍ശകര്‍, നിയമ സഭാ സാമാജികര്‍, പൂജപ്പുര ജയില്‍ ഐജി സര്‍വ്വോപരി കേരളത്തിന്റെ പൊതു സമൂഹം എന്നിവര്‍ക്ക് മുമ്പാകെ വിവര ദോഷിയും സദാ സംശ്യാലുവുമായ ഒരു സാദാ പ്രവാസി മലയാളിയുടെ കേവലമായ ചില സംശയങ്ങള്‍ സമര്‍പ്പിക്കുന്നു.


വിഷയം: ആര്‍.ബാലകൃഷ്ണ പിള്ളയുടെ പഞ്ച നക്ഷത്ര ജയില്‍ വാസം.

സംശയം നമ്പര്‍ ഒന്ന്: ആര്‍. ബാലകൃഷ്ണ പിള്ള എന്ന മുന്‍ മന്ത്രിക്ക് ഭാരതത്തിന്റെ പരമോന്നത നീതി പീഠം നല്‍കിയ ഒരു വര്‍ഷം കഠിന തടവ് (വെറും തടവ് അല്ല) പഞ്ച നക്ഷത്ര ചികിത്സാ വിധിയായി മാറ്റിയത് കോടതി അലക്ഷ്യം അല്ലേ? അതെനിക്കറിയാം... കോടതി അലക്ഷ്യം ഒന്നും അല്ലെടാ ചെക്കാ... എല്ലാം നിയമ വിധേയമാണ് എന്നല്ലേ ഇപ്പോ മുഖ്യമന്ത്രി ഉമ്മന്‍ ചാണ്ടി പറയാന്‍ പോകുന്നത്? അപ്പോഴാണ് ദേണ്ടെ അടുത്ത സംശയം ഉണര്‍ന്ന് എഴുന്നേല്‍ക്കുന്നത്.

സംശയം നമ്പര്‍ രണ്ട്: തടവുകാരന് പിടിപെട്ടു എന്നു പറയപ്പെടുന്ന അസുഖത്തിനു കേരളത്തിലെ മറ്റൊരു ആശുപത്രിയിലും ചികിത്സ ഇല്ലാ എന്നുണ്ടോ? മറ്റേതെങ്കിലും സ്വകാര്യ ആശുപത്രിയില്‍ മേപ്പടി സൂക്കേടിനു ചികിത്സ ഉണ്ട് എങ്കില്‍ പ്രസ്തുത ചികിത്സാലയത്തില്‍ നിന്നും സീല്‍ഡ് ടെണ്ടര്‍ വാങ്ങിയിട്ട് ചികിത്സാ ചിലവ് കുറഞ്ഞ ആശുപത്രി എന്ന നിലക്ക് കിംസിലേക്ക് തടവു കാരനെ മാറ്റുകയായിരുന്നോ? അങ്ങിനെ ചിലവു കുറഞ്ഞ മറ്റൊരു ആശുപത്രി നിലവില്‍ ഉണ്ടെങ്കില്‍ അവിടെ ചികിത്സാ സൌകര്യം ലഭ്യമാക്കാതെ താരതമ്യേന ചിലവു കൂടിയ കിംസില്‍ തടവുകാരനെ പ്രവേശിപ്പിച്ചതും അഴിമതി അല്ലേ? അഴിമതി കേസില്‍ കഠിന തടവ് (വെറും തടവ് അല്ല) അനുഭവിക്കുന്ന തടവുകാരനു അനുവദിച്ച ചികിത്സാ സൌകര്യവും അഴിമതി തന്നെയെന്നു വരുന്നത് എന്തു കൊണ്ട് അന്വോഷണാത്മക പത്ര പ്രവര്‍ത്തകരുടെ ശ്രദ്ധയില്‍ പെടുന്നില്ല?

സംശയം നമ്പര്‍ മൂന്ന്: ബാലകൃഷ്ണ പിള്ളയുടെ കിംസ് എന്ന പഞ്ചനക്ഷത്ര ആശുപത്രിയിലെ ചികിത്സാ ചിലവ് ആരാണ് വഹിക്കുന്നത്? സര്‍ക്കാര്‍ ആണെങ്കില്‍ കിംസ് എന്ന ആശുപത്രി തന്നെ ചികിത്സക്ക് തിരഞ്ഞാടുക്കാനുള്ള കാരണം എന്താണ്?

സംശയം നമ്പര്‍ നാല്‍: ചികിത്സാ ചിലവ് ബാലകൃഷ്ണ പിള്ള സ്വന്തം നിലക്കാണ് വഹിക്കുന്നത് എങ്കില്‍ തടവു കാരന് തടവ് കാലത്തെ ചിലവുകള്‍ സ്വന്തം നിലക്ക് വഹിക്കാന്‍ വകുപ്പുണ്ടോ? അങ്ങിനെയെങ്കില്‍ മറ്റു തടവുകാര്‍ക്കും മേപ്പടി വകുപ്പ് അനുവദിച്ചു കൊടുക്കേണ്ടേ? ചികിത്സാ ചിലവ് അല്ലാതെ മറ്റു എന്തൊക്കെ കാര്യങ്ങളാണ് തടവുകാരന് സ്വന്തം നിലക്ക് ചെയ്യാന്‍ വകുപ്പ് ഉള്ളത്?

സംശയം നമ്പര്‍ അഞ്ച്: ബാലകൃഷ്ണ പിള്ളക്ക് ബാധിച്ചിരിക്കുന്നു എന്ന് മന്ത്രി ഗണേഷ് കുമാര്‍ പത്ര സമ്മേളനം നടത്തി പറഞ്ഞ "ആ" രോഗത്തിനുള്ള ചികിത്സ കേരളത്തിലെ ഒരു സര്‍ക്കാര്‍ ആശുപത്രിയിലും ഇല്ലാ എന്നുണ്ടോ? ആ രോഗത്തിനു കേരളത്തിലെ ഒരു ആതുര ചികിത്സാലയത്തിലും ചികിത്സയില്ലാത്തതു കൊണ്ടായിരിക്കും അല്ലോ സ്വാകാര്യ ആശുപത്രിയില്‍ തടവു കാരനെ പ്രവേശിപ്പിച്ചത്. അങ്ങിനെയെങ്കില്‍ കേരളത്തിന്റെ പുകള്‍ പെറ്റ ചികിത്സാ സൌകര്യങ്ങള്‍ എല്ലാം പരാജയം ആണെന്നു സമ്മതിക്കെണ്ടി വരില്ലേ? കിംസ് ആശുപത്രിയുടെ ഏഴയലത്തു പോലും ചെല്ലാന്‍ സാമ്പത്തിക ശേഷി ഇല്ലാത്ത ഒരുവനു മേപ്പടി സൂക്കേട് ബാധിച്ചാല്‍ അവന്‍ ചത്തൊടുങ്ങട്ടെ എന്നാണോ സര്‍ക്കാര്‍ നിലപാട്?

സംശയം നമ്പര്‍ ആറ്: കഠിന തടവിനു ശിക്ഷിക്കപെട്ടവര്‍ ജയിലില്‍ പണിയെടുക്കണം എന്നും മറ്റുമാണ് സാമാന്യ നിലക്ക് മനസ്സിലാകുന്നത്. ബാലകൃഷ്ണ പിള്ള പഞ്ചനക്ഷത്ര ആശുപത്രിയില്‍ അങ്ങിനെ പണികള്‍ വല്ലതും എടുക്കുന്നുണ്ടോ? ഉണ്ടെങ്കില്‍ അത് എന്തു തരം പണിയാണ്?

സംശയം നമ്പര്‍ ഏഴ്: ജയില്‍ വാസം തുടങ്ങിയ ഇടക്ക് പരോള്‍ ലഭിക്കാന്‍ ബാലകൃഷ്ണ പിള്ള പറഞ്ഞ ന്യായം ഭാര്യക്ക് സൂക്കേടാണ്, അവരെ പരിചരിക്കണം എന്നാണ്. ഇപ്പോള്‍ വാമഭാഗത്തിന്റെ അസുഖങ്ങള്‍ക്ക് ശമനം ഉണ്ടോ? ആദ്യകാല പരോള്‍ സമയത്ത് ഭാര്യ ആശുപത്രിയില്‍ ആയിരുന്നുവോ അതോ വീട്ടില്‍ വൈദ്യന്മാര്‍ വന്നു ചികിത്സിക്കുകയായിരുന്നോ? ആശുപത്രിയില്‍ ആയിരുന്നു എങ്കില്‍ ഏത് ആശുപത്രിയില്‍ എന്തു രോഗത്തിനുള്ള ചികിത്സയായിരുന്നു? കേരളത്തിലെ ജയിലുകളില്‍ കഴിയുന്ന എല്ലാ തടവുകാര്‍ക്കും ജയിലില്‍ പ്രവേശിപ്പിക്കുന്ന ദിനങ്ങളില്‍ തന്നെ ഇങ്ങിനെ ഭാര്യയെ ശുശ്രൂഷിക്കാന്‍ പരോള്‍ നല്‍കാറുണ്ടോ?

സംശയം നമ്പര്‍ എട്ട്: ഇപ്പോള്‍ ബാലകൃഷ്ണ പിള്ളക്ക് അപൂര്‍വ്വ രോഗം ബാധിച്ച് കിംസില്‍ ചികിത്സയില്‍ ആയിരിക്കുമ്പോള്‍ രോഗിയായ ഭാര്യയെ ആരാണ് ശുശ്രൂഷിക്കുന്നത്? അങ്ങിനെ ഇപ്പോള്‍ ആരെങ്കിലും മിസ്സിസ്സ് പിള്ളയെ ശുശ്രൂഷിക്കാനും പരിചരിക്കാനും ഉണ്ട് എങ്കില്‍ എന്തു കൊണ്ട് ആദ്യകാല പരോള്‍ ആവശ്യപ്പെടുന്ന സമയത്ത് ഈ പരിചാരകര്‍ ഇല്ലാതെ പോയി?

സംശയം നമ്പര്‍ ഒമ്പത്: ബാലകൃഷ്ണപിള്ളയുടെ മകനും കൂടി ഉള്‍പെട്ട ഒരു സര്‍ക്കാര്‍ അല്ലാ ഇപ്പോള്‍ കേരളം ഭരിക്കുന്നത് എങ്കില്‍ കിംസ് പോലെയുള്ള ആശുപത്രിയില്‍ പഞ്ചനക്ഷത്ര ചികിത്സാ സൌകര്യം ബാലകൃഷ്ണ പിള്ളക്ക് ലഭിക്കുമായിരുന്നുവോ? അങ്ങിനെ ലഭിക്കും ആയിരുന്നില്ലാ എങ്കില്‍ സര്‍ക്കാറിനു താല്പര്യം ഉള്ളവര്‍ക്കു വേണ്ടി കോടതി വിധിയും ജയില്‍ ശിക്ഷയും അട്ടിമറിക്കുക എന്ന നിലയിലല്ലേ കര്യങ്ങള്‍ എത്തുന്നത്? സ്വന്തക്കാര്‍ക്ക് വേണ്ടി ജയില്‍ നിയമങ്ങളില്‍ വെള്ളം ചേര്‍ക്കുന്നത് മുഖ്യമന്ത്രി തൊട്ടു താഴോട്ടുള്ള എല്ലാവരും സത്യപ്രതിജ്ഞാ ലംഘനം നടത്തുന്നതിനു തുല്യമല്ലേ?

സംശയം നമ്പര്‍ പത്ത്: കിംസ് ആശുപത്രിയില്‍ തടശിക്ഷ അനുഭവിക്കുന്ന ബാലകൃഷ്ണ പിള്ള പോലീസ് കാവലില്‍ ആണോ ചികിത്സ സ്വീകരിക്കുന്നത്? സാധാരണ തടവുകാര്‍ ചികിത്സയില്‍ ആണെങ്കില്‍ അവരെ ഏറ്റവും അടുത്ത ബന്ധുക്കള്‍ പോലും സന്ദര്‍ശിക്കുന്നതിനു ജയില്‍ വകുപ്പില്‍ ചില നിബന്ധനകളും മാനദണ്ഡങ്ങളും ഉണ്ടാകും. ബാലകൃഷ്ണ പിള്ളയുടെ കാര്യത്തില്‍ കാര്യങ്ങള്‍ എങ്ങിനെയാണ്? ആശുപത്രി ജീവനക്കാര്‍ ആല്ലാതെ മറ്റാരെങ്കിലും തടവുകാരനെ പരിപാലിക്കാന്‍ ആശുപത്രിയില്‍ നിയോഗിക്കപ്പെട്ടിട്ടുണ്ട് എങ്കില്‍ അതും നിയമ വിരുദ്ധം അല്ലേ? അങ്ങിനെ ആരെങ്കിലും അധിക്രമിച്ച് തടവുകാരനു ബൈസ്റ്റാന്റായി ഉണ്ടെങ്കില്‍ അവരെ നിയമ വിരുദ്ധ പ്രവര്‍ത്തിയുടെ പേരില്‍ അറസ്റ്റ് ചെയ്യേണ്ടേ?

ഒരു കുബുദ്ധിയുടെ ഒരാവശ്യവും ഇല്ലാത്ത സംശയങ്ങള്‍ ആണ്. ഒരു പക്ഷേ മന്ത്രിയായ മകനും സ്വന്തക്കാര്‍ക്കും സ്വന്തം സര്‍ക്കാറിനും ബാലകൃഷ്ണ പിള്ള നിരപരാധിയായിരിക്കാം. എന്നാല്‍ ഭാരതത്തിന്റെ പരമോന്നത നീതി പീഠമാണ് അദ്ദേഹം കുറ്റക്കാരനാണെന്നും ശിക്ഷ അനുഭവിക്കണം എന്നും വിധി പുറപ്പെടുവിപ്പിച്ചത്. എന്തെല്ലാം കൊള്ളരുതായ്മകള്‍ പറഞ്ഞു കേള്‍ക്കുന്നുണ്ട് എങ്കിലും കോടതികളാണ് തെറ്റുകുറ്റങ്ങളുടെ അവസാന വാക്ക് എന്നു ചിന്തിക്കുന്നവരായിരിക്കും ഭൂമിമലയാളത്തില്‍ ഭൂരിപക്ഷവും. സ്വന്തം തട്ടകത്തില്‍ പോലും ജനങ്ങളെ തന്റെ നിരപരാധിത്വം ബോധ്യപ്പെടുത്താന്‍ ബാലകൃഷ്ണ പിള്ളക്ക് കഴിഞ്ഞിട്ടും ഇല്ല. അങ്ങിനെയായിരുന്നു എങ്കില്‍ കൊട്ടാരക്കരയില്‍ മുരളി ഡോക്ടര്‍ വന്‍ ഭൂരിപക്ഷത്തോടെ ജയിച്ചു കയറും ആയിരുന്നു. അപ്പോള്‍ കുറ്റവാളി ശിക്ഷിക്കപ്പെടണം. ആ ശിക്ഷ സ്വന്തക്കാരനായതു കൊണ്ട് വഴിവിട്ട നിലക്ക് ഭരണ കൂടം ഇളവു ചെയ്യുക എന്നാല്‍ അത് ഭരണഘടനക്കും സത്യപ്രതിജ്ഞക്കും എതിരാണ്. ബാലകൃഷ്ണപിള്ളയുടെ കാര്യത്തില്‍ കേരള പൊതു സമൂഹം കാട്ടുന്ന നിസ്സംഗത അഴിമതി സ്ഥാപനവല്‍ക്കരിക്കപ്പെട്ടതിനു തെളിവുമാണ്.

അറിയാനുള്ള ആഗ്രഹമല്ല മറിച്ച് നിയമങ്ങള്‍ എങ്ങിനെയൊക്കെ വളച്ചൊടിക്കപ്പെടുന്നു എന്ന ഭയമാണ് ഏതൊരു സാധാരണക്കാരനെയും ബാലകൃഷ്ണപിള്ളയുടെ പഞ്ചനക്ഷത്ര തടവും ഉളവാക്കുന്നത്. ഇല്ലാത്തവന്‍ റൊട്ടി മോഷ്ടിച്ചാല്‍ അവനു കാരാഗൃഹം. ഭാര്യയുടെ ചികിത്സക്കെന്നല്ല മാതാവോ പിതാവോ മക്കളോ ചത്തൊടുങ്ങിയാലും ഒരു പക്ഷേ പരോളോ എന്തിനു ഒരു നോക്ക് കാണാനോ ഉള്ള അവസരം നീതി പീഠം നല്‍കണം എന്നില്ല. പക്ഷേ സര്‍ക്കാറിനു വേണ്ടപ്പെട്ടവനാണെങ്കില്‍ തടവി തന്നെ തടവ് തീര്‍ക്കാം.

അപ്പോള്‍ ആര്‍ക്കാണ് ചികിത്സ വേണ്ടത്?





Sunday, August 28, 2011

വികസനവും കരുതലും!

അയാള്‍ ആദ്യം വന്നു പറമ്പിനു ചുറ്റും ഒന്ന് നടന്നു മുറുക്കി  തുപ്പി വെറുതെ അങ്ങ് പോയി.  ആരോ ഒരാള്‍ അങ്ങിനെ വന്നു പോയി എന്നെ കരുതിയുള്ളു. പിന്നൊരു ദിവസം രണ്ടു മൂന്നു പണിക്കരെയും കൊണ്ട് വന്നു മതില്‍ ചാടി പറമ്പിനു ഉള്ളില്‍  കടന്നു. എന്തൊക്കെയോ ചെയ്യാനുള്ള പുറപ്പാടാണ്. വാമ ഭാഗത്തോട് വിളിച്ചു ചോദിച്ചു ഇവരെന്താ ചെയ്യുന്നത് എന്ന്. ഇന്നി ഞാന്‍ അറിയാതെ അവള്‍ പണിക്കാരെ വല്ലോം ഏര്‍പ്പെടുത്തിയിട്ടുണ്ടോ എന്നറിയില്ലല്ലോ. അപ്പോഴാണ് അവളും അങ്ങിനെ ഒരു കാര്യം അറിയുന്നത്  തന്നെ. അവള്‍ക്കും സംശയം ആയി. ഇവര്‍ക്കെന്നാ നമ്മുടെ പറമ്പില്‍ കാര്യം?

ചോദിയ്ക്കാന്‍ ചെന്ന എന്നോട് അവരാണെങ്കില്‍  കണ്ട ഭാവം പോലും കാട്ടുന്നും ഇല്ല. അപ്പോഴാണ്‌ സ്ഥലത്തെ പ്രധാനി അതുവഴി വന്നത്. വന്നപാടെ എന്നോട് ഒന്നും ഉരിയാടാതെ മറ്റേ ചങ്ങാതിയോട്‌ എന്തൊക്കെയോ പറഞ്ഞു. മുന്‍ പരിചയക്കാര്‍ ആണെന്ന് തോന്നുന്നു. അങ്ങിനെയാണ് ഭാവം. ഞാനാണെങ്കില്‍ ഇതുങ്ങളെ ആദ്യം കാണുകയും ആണ്. ഒന്നും അറിയാതെ വാ പൊളിച്ചു നിന്ന എന്റെ അടുത്തേക്ക് വന്നു തോളത്ത്‌ തട്ടി  പ്രധാനി പറഞ്ഞു.

  "അവര്‍ ഇവിടെ കള്ള വാറ്റു തുടങ്ങുവാന്‍ വന്നവരാണ്. അവര്‍ക്ക് ഈ സ്ഥലം അങ്ങ് വല്ലാതെ ഇഷ്ടമായി. കള്ള  വാറ്റെന്നു പറഞ്ഞാല്‍  നല്ല വരുമാനം കിട്ടുന്ന പണിയാണ്. വരുമാനത്തിന്റെ അഞ്ചു ശതമാനം നിനക്ക് തരും. നിനക്കൊരു വരുമാനവും ആകും. അവര്‍ക്ക് വാറ്റാന്‍ ഒരിടവും ആകും. നീ ഒന്നും പറയാന്‍ നില്‍ക്കണ്ട ട്ടോ.. നാടിന്റെ വികസനം അല്ലെ നമ്മുക്ക് പ്രധാനം.മാത്രമല്ല  നിന്റെ കാര്യത്തില്‍ എനിക്കെപ്പോഴും ഒരു കരുതലും ഉണ്ടെന്നു നിനക്ക് അറിയാമല്ലോ? നിന്റെ ഉന്നമനം ആണ് എന്റെ ലക്‌ഷ്യം."

"അയ്യോ ചേട്ടാ അത്..."

"നിനക്ക് ഇഷ്ടമില്ലേല്‍ പറ. അവര്‍ വല്ല നക്കാ പിച്ചയും തരും. അതും വാങ്ങി  കൂടും കുടുക്കയും എല്ലാം പിറക്കി സ്ഥലം കാലിയാക്കാന്‍ നോക്ക്..."

ഞാന്‍ എന്തേലും പറയും മുന്നേ പ്രധാനി തോളത്തെ തോര്‍ത്ത്‌ മുണ്ട് ഒന്നെടുത്തു   കുടഞ്ഞു നടന്നു നീങ്ങി...

Friday, July 08, 2011

ഓയില്‍ കമ്പനികളുടെ നഷ്ടവും കേന്ദ്ര സര്‍ക്കാറും

ഡീസലിന്റെ വില വര്‍ദ്ധിപ്പിച്ചു കൊണ്ട് കേന്ദ്ര പെട്രോളിയം മന്ത്രി ജയ്പാല്‍ റെഡ്ഡി പറഞ്ഞത് ഭാരതത്തിലെ ഓയില്‍ കമ്പനികളുടെ നഷ്ടം ഏകദേശം ഒന്നര ലക്ഷം കോടി കവിയുന്നു എന്നാണ്. ഡീസലിന്റെ വില്പനയില്‍ പ്രതി ലിറ്ററിനു ഏകദേശം ആറു രൂപയോളം നഷ്ടം സഹിച്ചാണ് ഓയില്‍ കമ്പനികള്‍ ഭാരത പൌരന് പ്രതി ദിനം ദ്രവോര്‍ജ്ജം ദാനം ചെയ്യുന്നത് എന്നായിരുന്നു മന്ത്രി അവര്‍കളുടെ ഗീര്‍വ്വാണം. പെട്രോളിയം മന്ത്രാലയം മാത്രമല്ല പ്രധാനമന്ത്രിയുടെ ആപ്പീസും ധനകാര്യം വകുപ്പും കാണ്‍ഗ്രസ് പാര്‍ട്ടിയും എല്ലാം ഓയില്‍ കമ്പനികളുടെ നഷ്ടത്തില്‍ വ്യാകുലരായാണ് കുറേ നാളായി കാണപ്പെടുന്നത്. പെട്രോള്‍ വില നിശ്ചയിക്കുന്നതില്‍ ഓയില്‍ കമ്പനികള്‍ക്ക് മേല്‍ സര്‍ക്കാറിനുണ്ടായിരുന്ന നിയന്ത്രണം എടുത്തു കളയുമ്പോഴും നഷ്ടത്തില്‍ മുങ്ങി പൊയ്ക്കൊണ്ടിരിക്കുന്ന എണ്ണകമ്പനികളെ രക്ഷിക്കുക എന്നതായിരുന്നു സര്‍ക്കാറിന്റെ ലക്ഷ്യം.

സര്‍ക്കാറിന്റേയും ഓയില്‍ കമ്പനി മാനേജ്മെന്റിന്റേയും വാദം ശരിയാണെങ്കില്‍ ഭാരതത്തിലെ ഓയില്‍ കമ്പനികള്‍ എല്ലാം തന്നെ അതീവ പ്രതിസന്ധിയില്‍ ആണ്. ഒരു ഭാരത പൌരന്‍ അവന്റെ വാഹനത്തില്‍ ഒരു ലിറ്റര്‍ ഇന്ധനം നിറക്കുമ്പോള്‍ പാവം ആയില്‍ കമ്പനികളുടെ കീശയില്‍ നിന്നും മിനിമം ആറു രൂപ ചോര്‍ന്നു കൊണ്ടിരിക്കുന്നു. ഒരു മിനുട്ടില്‍ എത്ര ലിറ്റര്‍ ഇന്ധനം വില്‍ക്കുന്നുവോ ആ ലിറ്ററിന്റെ അഞ്ചോ ആറോ ഇരട്ടി നഷടം എണ്ണ കമ്പനികളിലേക്ക് ഒഴികി എത്തുന്നു! കഷ്ടമേ കഷ്ടം. ഇങ്ങിനെയൊരു ദുര്‍വിധി ഭാരതത്തിലെ മറ്റേതെങ്കിലും വ്യവസായ മേഖലയില്‍ ഉണ്ടോ എന്നു സംശയമാണ്. എണ്ണ കമ്പനികള്‍ ഇങ്ങിനെ ഭാരത പൌരനെ സേവിച്ച് എത്ര കാലം മുന്നോട്ട് പോകും? അപ്പോ പിന്നെ കമ്പനികളുടെ ഇപ്പോഴത്തെ അവസ്ഥയെന്താണ്?

നഷ്ടത്തില്‍ നിന്നും നഷ്ടത്തിലേക്ക് എന്നു കേന്ദ്ര സര്‍ക്കാറും എണ്ണ കമ്പനി മാനേജുമെന്റും അടിക്കടി ആണയിടുന്ന ഭാരത്തിലെ മുന്‍ നിര എണ്ണ കമ്പനികളുടെ മുംബൈ സ്റ്റോക്ക് എക്സ്ചേഞ്ചിലെ ഇപ്പോഴത്തെ ഓഹരി വില നിലവാരം നഷ്ടത്തില്‍ നിന്നും നഷ്ടത്തിലേക്ക് മൂക്കു കുത്തുന്ന ഓഹരികളുടെ വില നിലവാരത്തിനു തുല്യമല്ല. ലാഭത്തില്‍ നിന്നും ലാഭത്തിലേക്ക് കുതിക്കുന്ന കമ്പനികളുടെ സ്വഭാവമാണ് ഭാരതത്തിലെ മിക്കവാറും എല്ലാം എണ്ണ കമ്പനികളുടേയും ഓഹരികളുടെ വിപണിയിലെ പ്രവര്‍ത്തന സ്വഭാവം. ഇന്ന് അതായത് 08/07/2011 വെള്ളിയാഴ്ച മുംബൈ ഓഹരി വിപണി അടക്കുമ്പൊള്‍ എണ്ണ കമ്പനികളുടെ ഓഹരികളുടെ വില ഇങ്ങിനെയാണ്:

1. ഐ.ഓ.സി. 337.85 രൂപ.

2. Bharat Petrolium Corporation LTD. : 662.00 രൂപ.

3. Hundustan Petrolium Corporation LTD : 391.75 രൂപ.

ഇവയൊക്കെയാണല്ലോ നമ്മുടെ നവരത്ന കമ്പനികളില്‍ പെട്ട എണ്ണ കമ്പനികള്‍. ഒരോ ഭാരതീയന്റേയും അഭിമാനവും അഹങ്കാരവും ആയ ഭാരതത്തിന്റെ സ്വന്തം കോര്‍പ്പറേറ്റ് ഭീമന്മാര്‍. ഈ കമ്പനികള്‍ ഇല്ലായിരുന്നു എങ്കില്‍ ഭാരത ജീവിതം നിശ്ചലം! കമ്പനികളെ എന്തു വില കൊടുത്തും സംരക്ഷിക്കേണ്ടത് ഒരോ ഭാരതീയ പൌരന്റേയും ധാര്‍മ്മികത. നഷ്ടത്തില്‍ മൂക്കു കുത്തി കമ്പനികള്‍ നശിച്ചാല്‍ കമ്പനികളെ തിരികേ കൊണ്ടു വരിക പ്രയാസമാകും. അപ്പോ ഈ കമ്പനികളുടെ ഇപ്പോഴത്തെ നഷ്ടം എന്തായിരിക്കും?

മുംബൈ സ്റ്റോക്ക് എക്സ്ചേഞ്ചില്‍ മേപ്പടി കമ്പനികള്‍ നല്‍കിയിരിക്കുന്ന പ്രവര്‍ത്തന ഫലവും കേന്ദ്രസര്‍ക്കാറിന്റേയും കമ്പനിമാനേജ്മെന്റുകളുടെ പ്രഖ്യാപനങ്ങളും തമ്മില്‍ ഒരു തരത്തിലും പൊരുത്തപ്പെടുന്നില്ല. ഐ.ഓ.സിയുടെ കഴിഞ്ഞ സാമ്പത്തിക വര്‍ഷത്തിലെ പ്രവര്‍ത്തന ഫലം നോക്കൂ...

ഐ.ഓ.സി.

2011 മാര്‍ച്ചില്‍ അവസാനിച്ച സാമ്പത്തിക വര്‍ഷത്തില്‍ ഐ.ഓ.സി നേടിയ പ്രവര്‍ത്തന ലാഭം എല്ലാ നികുതികളും കഴിഞ്ഞ് ഏഴായിരത്തി നാനൂറ്റി നാല്പത്തി അഞ്ച് കോടി രൂപയാണ്. മൊത്തം വില്പന മൂന്ന് ലക്ഷത്തി ഇരുപത്തി എട്ടായിരിത്തി എണ്ണൂറ്റി അമ്പത്തി മൂന്ന് കോടി രൂപയും. ഐ.ഓ.സിയുടെ മുഴുവന്‍ പ്രവര്‍ത്തന റിപ്പോര്‍ട്ടും വാര്‍ഷിക റിപ്പോര്‍ട്ടും ഇവിടെ നിന്നും ലഭിക്കും.

ഭാരത് പെട്രോളിയം കോര്‍പ്പറേഷന്‍ (B.P.C.L)
ബീ.പീ.സി.എല്ലിന്റെ പോയ സാമ്പത്തിക വര്‍ഷത്തിലെ മൊത്തം വിറ്റു വരവ് ഒരു ലക്ഷത്തില്‍ അമ്പത്തി ഒരായിരത്തി അറുനൂറ്റി ഇരുപത്തി അഞ്ച് കോടിയും, അറ്റാദായം (എല്ലാ നികുതികള്‍ക്കും ശേഷം)ആയിരത്തി അഞ്ഞൂറ്റി നാല്പത്തി ഏഴു കോടിയും ആണ്. മുംബൈ സ്റ്റോക്ക് എക്സ്ചേഞ്ചില്‍ കമ്പനി നിയമ പ്രകാരവും സെബി ചട്ടപ്രകാരവും ബീ.പി.സി.എല്‍ സമര്‍പ്പിച്ചിരിക്കുന്ന പ്രവര്‍ത്തന ഫലവും വാര്‍ഷിക റിപ്പോര്‍ട്ടും ഇവിടെ നിന്നും പൂര്‍ണ്ണമായും ലഭിക്കുന്നതാണ്.

ഹിന്ദുസ്ഥാന്‍ പെട്രോളിയം കോര്‍പ്പറേഷന്‍ ലിമിറ്റഡ് (എച്ച്.പി.സി.എല്‍)
മാര്‍ച്ചില്‍ അവസാനിച്ച സാമ്പത്തിക വര്‍ഷത്തില്‍ എച്ച്.പി.സി.എല്‍ നേടിയ മൊത്തം വിറ്റു വരവ് ഒരു ലക്ഷത്തി മുപ്പത്തി നാലായിരത്തി ഒരു നൂറ്റി ഇരുപത് കോടി രൂപയും അറ്റാദായം (എല്ലാ നികുതികള്‍ക്കും ശേഷം) ആയിരത്തി അഞ്ഞൂറ്റി മുപ്പത്തി ഒമ്പത് കോടി രൂപയും ആണ്. എച്ച്.പി.സില്‍ മുംബൈ സ്റ്റോക്ക് എക്സ്ചേഞ്ചിനു നിയമ പ്രകാരം സമര്‍പ്പിച്ചിരിക്കുന്ന പ്രവര്‍ത്തന ഫലവും വാര്‍ഷിക റിപ്പോര്‍ട്ടും ഇവിടെ നിന്നും ലഭ്യമാണ്.

അതായത് ഭാരതത്തിലെ എണ്ണപ്പെട്ട എണ്ണകമ്പനികള്‍ ഒന്നും തന്നെ നഷ്ടത്തില്‍ അല്ല. ഇന്നി സഞ്ചിത നഷ്ടം നികത്താനാണ് ഡീസലിന്റെ വില കൂട്ടിയത് എന്നും പെടോളിന്റെ സര്‍ക്കാര്‍ വില നിയന്ത്രണം എടുത്തു കളഞ്ഞതും എന്നുമാണ് ന്യായമെങ്കില്‍ ഈ മൂന്ന് കമ്പനികളുടെ സഞ്ചിത നഷ്ടം തേടുന്ന ഒരുവന്‍ നിരാശനാകും. കാരണം മൂന്ന് കമ്പനികള്‍ക്കും സഞ്ചിത ലാഭമാണ് കമ്പനിയുടെ കണക്കുകളില്‍ കാണുന്നത്.

ഹിന്ദുസ്ഥാന്‍ പെട്രോളിയം ഓഹരി ഒന്നിനു 14 രൂപയാണ് പോയ വര്‍ഷം ലാഭ വിഹിതം നല്‍കിയത്. അതായത് നൂറ്റി നാല്പത് ശതമാനം! ഇന്‍ഡ്യന്‍ ഓയില്‍ കോര്‍പ്പറേഷന്‍ പ്രഖ്യാപിച്ച ലാഭ വിഹിതം ഓഹരിയൊന്നിനു ഒമ്പത് രൂപ അമ്പത് പൈസ. ശതമാന കണത്തില്‍ 95 ശതമാനം!

എണ്ണ കമ്പനികള്‍ മുംബൈ സ്റ്റോക്ക് എക്സ്ചേഞ്ചില്‍ സമര്‍പ്പിച്ചിരിക്കുന്ന പ്രവര്‍ത്തന റിപ്പോര്‍ട്ടുകള്‍ എല്ലാം ലാഭത്തിന്റേതാണ്. നഷ്ടത്തില്‍ ഓടുന്ന കമ്പനികള്‍ ലാഭ വിഹിതം പ്രഖ്യാപിക്കുകയും ഇല്ലല്ലോ? എല്ലാതരത്തിലുള്ള നികുതികള്‍ക്കും ശേഷവും വമ്പന്‍ ലാഭ കണക്കുകള്‍ പ്രഖ്യാപിക്കുന്ന എണ്ണകമ്പനികള്‍ നഷ്ടത്തില്‍ ആണെന്ന് പ്രചരിപ്പിക്കാന്‍ ജനപ്രാതിനിധ്യ നിയമ പ്രകാരം നില നില്‍ക്കുന്ന ഒരു ഗവണ്മെന്റിനും ഗവണ്മെന്റ് പ്രതിനിധികള്‍ക്കും ജനപ്രതിനിധികള്‍ക്കും എങ്ങിനെ കഴിയുന്നു?

ഒരു ക്യാബിനറ്റ് മിനിസ്റ്റര്‍ പത്ര സമ്മേളനം വിളിച്ച് കളവ് പറയുന്നതിനെ ചോദ്യം ചെയ്യാന്‍ നമ്മുടെ ജനപ്രാതിനിധ്യ നിയമത്തില്‍ ഒരു വ്യവസ്ഥയും ഇല്ലേ? ജനങ്ങളേയും ജനജീവിതത്തേയും നേരിട്ട് ബാധിക്കുന്ന പ്രശ്നത്തിന്മേലുള്ള സത്യാവസ്ഥ പുറത്ത് കൊണ്ടു വരുവാന്‍ ഭാരതത്തിലെ പുകള്‍ പെറ്റ മാധ്യമങ്ങള്‍ മിനക്കെടാത്തത് എന്തു കൊണ്ട്? അസ്സമയത്ത് ഒരു മന്ത്രിയോ കുടുംബാംഗങ്ങളോ ശോധനക്ക് പോയാല്‍ പോലും അന്വോഷണാത്മക പത്ര പ്രവര്‍ത്തകര്‍ പിറകേ കൂടുന്ന ഇക്കാലത്ത് ഒരു ഗവണ്മെന്റ് അപ്പാടെ പൊതുജനത്തോട് കളവ് പറഞ്ഞ് കൊണ്ടിരുക്കുന്നത് അന്വോഷണാത്മക പത്ര പ്രവര്‍ത്തനത്തിന്റെ പരിധിയില്‍ വരാത്തത് യാദൃശ്ചികമല്ലാ എന്നതല്ലേ സത്യം? ഭാരതത്തിലെ എണ്ണ രാഷ്ട്രീയത്തില്‍ പത്രക്കാരും സര്‍ക്കാറും ജ്യൂഡീഷ്യറിയും എക്സിക്യൂട്ടീവും എല്ലാം വഴുക്കല്‍ പിടിച്ച് കിടക്കുന്നത് എണ്ണയില്‍ നിന്നും ഊറി വരുന്ന കറുത്ത പണത്തിന്റെ പിടിയില്‍ അകപ്പെട്ടതു കൊണ്ടാണ് എന്നതാണ് വസ്തുത.

ഭാരതത്തിലെ എണ്ണ കമ്പനികള്‍ ഒന്നും തന്നെ നഷ്ടത്തില്‍ അല്ല. അതു പറയുന്നത് എണ്ണ കമ്പനികള്‍ തന്നെ. അപ്പോള്‍ പിന്നെ ലക്കും ലഗാനും ഇല്ലാതെ മുട്ടിനു മുട്ടിനു എണ്ണ വിലകൂട്ടുന്നത് എതിര്‍ക്കപ്പെടേണ്ടുന്ന പ്രതിഭാസമാണ്. എണ്ണവിലയും സര്‍ക്കാറും എണ്ണ കമ്പനി മാനേജുമെന്റും സ്വകാര്യ എണ്ണ കമ്പനികളും ചേര്‍ന്നുള്ള കറക്കു കമ്പനി ഭാരത പൌരനെ ഊറ്റുന്നത് അവസാനിപ്പിക്കാന്‍ മാധ്യമങ്ങള്‍ സഹായിക്കും എന്നു കരുതുക വയ്യ തന്നെ.

Monday, March 28, 2011

സാര്‍ത്ഥകമായ നാല്‍പ്പത്തി ഒന്നാം ജന്മ ദിനം.

ഓപ്പണ്‍ ഹൌസ്.

ഒമ്പതാം ക്ലാസ്സുകാരിക്ക് ആര്‍ട്സും ക്രാഫ്ട്സും അടക്കം എല്ലാ വിഷയങ്ങള്‍ക്കും A1. ടീച്ചറുടെ വക അഭിനന്ദനങ്ങള്‍. ഒപ്പം ടീച്ചറിന്റെ മനം കുളിര്‍പ്പിക്കുന്ന നല്ല വാക്കുകളും.

ആഹ്ലാദവും ആമോദവും നുര പൊന്തുന്ന നിമിഷങ്ങള്‍...
പക്ഷേ ഓര്‍മ്മകളെ കൊണ്ടു പോയത് പത്തു മുപ്പത് വര്‍ഷം പിറകിലെ ഒരു ഒമ്പതാം ക്ലാസ് റിസല്‍ട്ട് ദിനത്തില്‍.

അന്ന്..
ഒമ്പതാം ക്ലാസ്സിന്റെ ഫലം വന്ന ദിവസം.
പ്രസിദ്ധീകരിക്കപ്പെട്ട റിസല്‍ട്ടില്‍ തലങ്ങും വിലങ്ങും അരിച്ചു പെറുക്കിയിട്ടും എന്റെ പേരില്ല. പിന്നെയും പിന്നെയും നോക്കി. എവിടെ എന്റെ പേരിന്റെ പൊടിപോലുമില്ല കണ്ടു പിടിക്കാന്‍. ഒടുവില്‍ ക്ലാസ്സ് ടീച്ചറെത്തി.

"എടാ നീയിന്നി നോക്കണ്ട. തോറ്റവരുടെ പേര് അതില്‍ കാണില്ല. നീ പോയി നിന്റെ തന്തേ നാളെയിങ്ങ് വിളിച്ചോണ്ട് വാ".

പിതൃഭാഗം ഗള്‍ഫില്‍ ആയിരുന്നതിനാല്‍ പിറ്റേന്ന് ഇളയാപ്പയുമായി സ്കൂളിലേക്ക്. പാവം ഇളയാപ്പ. സ്കൂളിലെ മാതൃകാ സ്റ്റുഡന്റിന്റെ കൊണവതികാരം കേട്ട് തലകുനിച്ചു നിന്ന ഇളയാപ്പയുടെ മുഖം ഇന്നും മനസ്സില്‍ മായാതെയുണ്ട്.

അതെല്ലാം ഓര്‍ത്തും പേര്‍ത്തും ഇളയവള്‍ - അഞ്ചാം ക്ലാസ്സു കാരിയുടെ ഫല‍ത്തിനായി അവളുടെ ക്ലാസ്സിലേക്ക്...

മിടുക്കി.
അവള്‍ക്കും എല്ലാത്തിനും A+.

അവളുടെ ടീച്ചറുടേയും വാത്സല്യവും സന്തോഷവും നിറഞ്ഞ വാക്കുകളും കേട്ടു മനം നിറയേ സന്തോഷവുമായി തിരികെ....

അങ്ങിനെ നാല്‍പ്പത്തി ഒന്നാം ജന്മദിനം സാര്‍ത്ഥകമായിരിക്കുന്നു.

Thursday, March 24, 2011

സിന്ധൂ ജോയി വി.എസ്സിനെതിരേ മത്സരിക്കും!

ഇന്ന്..
അല്ലെങ്കില്‍ നാളെ...
അതുമല്ലെങ്കില്‍ മറ്റന്നാള്‍..
അല്ലെങ്കി പോട്ടെ എന്നാത്തിനാ ഇതിങ്ങിനെ വലിച്ചു നീട്ടുന്നത് അല്ലേ?
ഒള്ളതു ഒള്ളതു പോലങ്ങ് പറഞ്ഞാല്‍ ഭൂമിമലയാളത്തിലെ തിരഞ്ഞെടുപ്പിനു നാമനിര്‍ദ്ദേശ പത്രിക സമര്‍പ്പിക്കുന്നതിനുള്ള അവസാന ദിവസത്തിന്റെ അന്ത്യ വിനാഴികകളില്‍ ഒന്നില്‍ സംഭവിക്കാന്‍ പോകുന്നൊരു സംഗതി. എന്താന്നു വച്ചാല്‍ കുഞ്ഞൂഞ്ഞ് സാറ് എന്തോന്നോ ഒരുഗ്രന്‍ സംഗതി പൊട്ടിക്കും പോലെ നിലവില്‍ സ്ഥാനാര്‍ത്ഥിയായി പ്രഖ്യപിക്കപ്പെട്ട നമ്മുടെ സഹോദരി ലതികാ സുഭാഷിനെ പിന്‍‌വലിച്ച് ഇന്ന് പുതുപ്പള്ളിയില്‍ കോണ്‍ഗ്രസ്സായി അവതരിച്ച ഇന്നലത്തെ സഖാവ് സിന്ധൂ ജോയിയെ ഐക്യ ജനാധിപത്യ മുന്നണി സ്ഥാനാര്‍ത്ഥിയാക്കി സാക്ഷാല്‍ സഖാവ് വീയെസ്സിനെതിരേ മത്സരിപ്പിക്കും!

സിന്ധൂ ജോയിക്കാണേല്‍ തന്റെ പഴയ പാര്‍ട്ടി തനിക്ക് ഉറച്ച സീറ്റൊന്നും നല്‍കി തന്നെ സഹായിച്ചില്ലാ എന്ന പരാതിയും തീരും. മലമ്പുഴക്കു തുല്ല്യം മറ്റേതു ഉറച്ച സീറ്റൊണ്ട് സഗാവ് സിന്ധുവിനു മത്സരിക്കാന്‍? ലതിക ചേച്ചി വിമ്മിട്ടപ്പെടേണ്ട. ഭരണം കിട്ടികഴിയുമ്പോള്‍ ചേച്ചിക്ക് ഏതേലും വകുപ്പ് തലപ്പത്ത് സീറ്റ് തരപ്പെടുത്തി തരും.

കഴിഞ്ഞൊരു ദിനം അങ്ങ് തിരോന്തോരത്തെ ഒരു കാണ്‍ഗ്രസ്സ് പെങ്ങള് കൊച്ച് തന്റെ പാര്‍ട്ടിയെ തള്ളിപ്പറഞ്ഞപ്പോ തൊള്ളേന്നു വന്ന വിമ്മിട്ടം കേട്ട് ഓക്കാനം വന്നിരുന്നപ്പോഴാ ഈ സഗാവിന്റെ കൊണവതികാരം ഇന്നു രാവിലെ കേട്ട് വെറും വയറ്റില്‍ മനം‌പിരട്ടില്‍ ഉണ്ടായത്. അപ്പനും അമ്മയും ഇല്ലാത്ത അനാഥയായ തന്നെ പാര്‍ട്ടി ഗൌനിക്കുന്നില്ല പോലും. തലേന്നു തിരോന്തോരത്ത് പാര്‍ട്ടി അവഗണിച്ച വികലാംഗയായ പെങ്ങള് കൊച്ചിനു തന്റെ പാര്‍ട്ടി അഭയം കൊടുത്തതില്‍ പ്രതിഷേധിച്ച് പാര്‍ലമെന്ററി വ്യാമോഹം ലവലേശമില്ലാത്ത, അടിമുടി സാമൂഹിക സേവന തത്പരത മുറ്റി നില്‍ക്കുന്ന സഗാവ് സിന്ധൂ ജോയി സാമൂഹ്യ സേവനത്തിനു കാണ്‍ഗ്രസിനെ തിരഞ്ഞെടുത്തത് ലേശം താമയിച്ചു പോയോ എന്നൊരു സംശയമേ ബാക്കിയാകുന്നുള്ളൂ.

സാമൂഹ്യ സേവന തല്പരത മുറ്റി നില്‍ക്കുന്നവര്‍ക്ക് ഒറ്റക്കൊറ്റക്കോ കൂട്ടം കൂട്ടമായോ സാമൂഹ്യ സേവനം നടത്താന്‍ പറ്റിയയിടമാണ് കാണ്‍ഗ്രസ്സ് എന്നതില്‍ തര്‍ക്കമേതുമില്ല തന്നെ. പക്ഷേ രാഹുലന്റെ ഇന്റര്‍വ്യൂ പാസ്സാകണം എന്നു മാത്രം. ഓ... അതിപ്പോ രാഹുല്‍ജീയുടെ ഇന്റര്‍വ്യൂ എഴുത്തു പരീക്ഷയ്ക്കും മുന്നേ സഗാവ് പാസ്സാവുകയും ചെയ്യും.

പണ്ട്...
പണ്ടെന്നു പറഞ്ഞാല്‍ ഒരു പത്തിരുപത് വര്‍ഷം മുന്നേയുള്ളൊരു പണ്ട്. ഭൂമിമലയാളത്തിലെ സര്‍വ്വ നിരക്ഷരരേയും സാക്ഷരരാക്കുന്ന സാക്ഷരതാ യ്ജ്ഞം പൊടിപൊടിക്കുന്ന കാലം. പ്രതിഫലേഛ കൂടാതെ സാക്ഷരതാ യജ്ഞത്തില്‍ പങ്കാളികളാകാന്‍ യുവജനങ്ങളെ സര്‍ക്കാര്‍ ക്ഷണിക്കുന്നൊരു കാലം. കേരളമല്ലേ സാക്ഷരതയല്ലേ യജ്ഞമല്ലേ സര്‍ക്കാറല്ലേ... വല്ലതും തടയാതിരിക്കില്ലാ എന്നുറപ്പിച്ച് ബ്ലോക്ക് ഡെവലപ്പ്മെന്റ് ആപ്പീസറെ കണ്ടു.
"സാര്‍... പ്രതിഫലേഛ കൂടാതെ സാക്ഷരതാ യജ്ഞത്തില്‍ പങ്കാളിയായാല്‍ മാസം എന്തര് കിട്ടും സര്‍?"
ബ്ലോക്കാപ്പീസറു പണ്ടു പോലീസ് ട്രെയിനിങ്ങിനു പോയിട്ടുണ്ടായിരുന്നു എന്നെനിക്കറിയില്ലായിരുന്നു. ഈശ്വരാ... ഇങ്ങിനേയും തെറിയോ?

പ്രതിഫലേഛ കൂടാതെ കമ്മ്യൂണിസ്റ്റ് മാര്‍ക്സിസ്റ്റ് പാര്‍ട്ടിയില്‍ പ്രവര്‍ത്തിച്ച പാവം സിന്ധു പെങ്ങള്‍ക്ക് പ്രതിഫലം ഒന്നും നല്‍കാതിരുന്ന പാര്‍ട്ടിയുടെ നടപടി ദൂഷ്യങ്ങള്‍ക്കെതിരേ സഗാവ് സിന്ധു അങ്കം കുറിക്കേണ്ടത് പാര്‍ട്ടിയുടെ ജനകീയ മുഖത്തിനെതിരേയാണ്. ആര്‍.എസ്സ്.എസ്സിന്റെ മുഖമാണ് തന്റെ നേതാവിനെന്നു തുറന്നടിച്ച കാണ്‍ഗ്രസ് കാരിയുടെ നേതാവിന്റെ തോളത്ത് തൂങ്ങി തന്നെ സഗാവ് സിന്ധു മലമ്പുഴയില്‍ അങ്കം കുറിക്കണം.

കമ്മ്യൂണിസ്റ്റാണേലും കാണ്‍ഗ്രസ്സാണേലും ആപ്പാപ്പം കാണുന്നോരേ അപ്പാന്നു വിളിക്കുന്നോരെ അപ്പപ്പോ കേറ്റി ഒക്കത്തിരുത്തുന്ന രാഷ്ട്രീയം ഇന്നിന്റെ ഭൂമിമലയാളത്തിന്റെ മുറിച്ച മുറിയാണ്. അതു തന്നേന്ന്. പിതൃത്വത്തിന്റെ സ്ഥാനത്ത് ശൂന്യത നിറയുന്ന സമൂഹത്തിന്റെ മുറിച്ച മുറി. ഒളിക്യാമറയില്‍ പകര്‍ത്തിയ ദൃശ്യം കണ്ടാല്‍ മാത്രം പ്രതികരണ ശേഷി ഉണരുന്ന നിഷ്കൃയ ജന്മങ്ങള്‍ നിറഞ്ഞ നാട്ടില്‍ അപ്പനപ്പാപ്പന്മാര്‍ക്ക് എന്തു വില?

Friday, March 18, 2011

വി.എസ്സ്. മത്സരിക്കും : സി.പി.എം.


വേദി : ഏ.കേ.ജി. സെന്റര്‍
പരിപാടി : സി.പി.എം. സെക്രട്ടറി പിണറായി വിജയന്റെ പത്രസമ്മേളനം.
തീയതി : ഇന്നോ, നാളെയോ അല്ലെങ്കില്‍ മറ്റന്നാളോ.

കേരളാ നിയമസഭാ തിരഞ്ഞെടുപ്പില്‍ മത്സരിക്കുന്ന സി.പി.എം സ്ഥാനാര്‍ത്ഥി പട്ടിക പ്രഖ്യാപിക്കാന്‍ വേണ്ടി സഖാവ് പിണറായി അടുത്ത ഏതാനും മണിക്കൂറുകളീലോ ഏറ്റവും അടുത്ത ദിവസങ്ങളിലോ വിളിക്കാന്‍ പോകുന്ന പത്ര സമ്മേളനത്തിന്റെ പൂര കാഴ്ച!

പിണറായി സ്വതസിദ്ധമായ കമ്മ്യൂണിസ്റ്റ് ശൈലിയില്‍ പാറശ്ശാല മുതലുള്ള നിയമസഭാ മണ്ഡലങ്ങളിലെ സ്ഥാനാര്‍ത്ഥികളെ പ്രഖ്യാപിച്ചു തുടങ്ങുന്നു. അതിനും മുന്നേ സ്ഥാനാര്‍ത്ഥികളുടെ പേരും ഉള്‍പ്പെടുത്തിയ പത്രക്കുറിപ്പ് പത്രക്കാര്‍ക്കു നല്‍കുന്നു. നിമിഷങ്ങള്‍ക്കുള്ളില്‍ ദൃശ്യമാധ്യമങ്ങളില്‍ "ഫ്ലാഷ്" പ്രളയം....

"വി.എസ്സ്. മത്സരിക്കും"

പത്രസമ്മേളനത്തില്‍ പിണറായി രണ്ടുരൂപാ അരിയും കുഞ്ഞാലികുട്ടിയും വിക്കിലീക്സും എല്ലാം വിശകലനം ചെയ്യുകയാണ്. കൂട്ടത്തില്‍ സ്ഥാനാര്‍ത്ഥികളെ കുറിച്ചുള്ള കാര്യങ്ങളും.

എല്ലാം വിവരിച്ചു കഴിഞ്ഞു ഇന്നി നിങ്ങള്‍ക്ക് ചോദ്യങ്ങള്‍ വല്ലതും ഉണ്ടോ എന്നര്‍ത്ഥത്തില്‍ പത്രക്കാര്‍ക്ക് നേരെ ഒരു നോട്ടത്തോടെ പിണറായി...

പത്രക്കാരില്‍ നിന്നും ഒരു മനോരമാ ശബ്ദം:

"പാര്‍ട്ടിയുടെ സംസ്ഥാന സമിതിയുടെ തീരുമാനത്തിനു വിപരീതമായി വി.എസ്സിന്റെ മത്സരിപ്പിക്കാന്‍ തീരുമാനിച്ചത് ജനരോഷം ഭയന്നാണോ?..."

പിണാറിയിയുടെ മുഖത്ത് ഒരു ചതഞ്ഞ ചിരി.

"സംസ്ഥാന കമ്മിറ്റിയുടെ തീരുമാനമാണ് ഞാനിപ്പോള്‍ പറഞ്ഞത്. നിങ്ങളോട് ആരാണ് പറഞ്ഞത് സംസ്ഥാന കമ്മിറ്റി വി.എസ്സിനു സീറ്റ് നിഷേധിച്ചത് എന്ന്. നിങ്ങള്‍ തന്നെ ഉണ്ടാക്കുന്ന വാര്‍ത്തകള്‍ നിങ്ങള്‍ക്ക് തന്നെ വിഴുങ്ങേണ്ടി വരുന്ന വിഷമം എനിക്കു മനസ്സിലാകും."

പത്രക്കാരില്‍ നിന്നും ഒരു ഏഷ്യാനെറ്റ് ന്യൂസ് ശബ്ദം:

"വി.എസ്സ്. അനാരോഗ്യം കാരണം മാറി നില്‍ക്കുകയാണ് എന്ന് അദ്ദേഹം പറഞ്ഞല്ലോ? അത് പാര്‍ട്ടിയുടെ തീരുമാനം ആയിരുന്നില്ലേ?"

പിണറായി: "അദ്ദേഹം അങ്ങിനെ പറഞ്ഞോ? അതും നിങ്ങളുടെ ഭാവനയാണ്. അദ്ദേഹം പൂര്‍ണ്ണ ആരോഗ്യവാനാണ്. അദ്ദേഹത്തിനു പ്രായാധിക്യം മൂലമുള്ള അസ്വസ്ഥതകള്‍ ഉണ്ട് എന്ന് അദ്ദേഹത്തിനോ സഹപ്രവര്‍ത്തകരായ ഞങ്ങള്‍ക്കോ തോന്നിയിട്ടില്ല. ഇതെല്ലാം നിങ്ങളുടെ ഭാവനയ്ക്ക് ഒപ്പിച്ച് നിങ്ങള്‍ എഴുതി കൂട്ടുന്ന കാര്യങ്ങള്‍. അതില്‍ ഞങ്ങള്‍ക്ക് എന്തു കാര്യം. സംസ്ഥാന കമ്മിറ്റിയുടെ ചര്‍ച്ചകള്‍ക്കും പോളിറ്റ് ബ്യൂറോയുടെ തീരുമാനങ്ങള്‍ക്കും അധിഷ്ഠിതമായാണ് ഞങ്ങള്‍ സ്ഥാനാര്‍ത്ഥികളെ നിശ്ചയിക്കുന്നത്. അല്ലാതെ പത്രവാര്‍ത്ത നോക്കിയല്ല."

പത്രക്കാരില്‍ നിന്നും ഒരു ജയ്ഹിന്ദ് ശബ്ദം:

"സി.പി.എമ്മിലെ വിഭാഗീയതയല്ലേ സ്ഥാനാര്‍ത്ഥി പട്ടികയില്‍ നിന്നും ആദ്യം വി.എസ്സ്. ഒഴിവാക്കപ്പെടാന്‍ കാരണം?."

പിണറായിയുടെ പരിഹാസ ചിരി!.

"സി.പി.എമ്മില്‍ ഒരു വിഭാഗീയതയും ഇല്ല. സഖാവ് വി.എസ്സ്. മാര്‍ക്സിസ്റ്റ് പാര്‍ട്ടിയുടെ സ്വത്താണ്. ഞങ്ങളുടെ എല്ലാം അനിഷേധ്യ നേതാവാണ് അദ്ദേഹം. സഖാവ് വി.എസ്സിനെ മാറ്റി നിര്‍ത്തി കൊണ്ടുള്ള ഒരു തീരുമാനവും ഞങ്ങളുടെ പാര്‍ട്ടി എടുത്തിട്ടില്ല. ഇതെല്ലാം പറയുന്നത് നിങ്ങള്‍ പത്രക്കാര്‍ മാത്രമാണ്...."

അപ്പോഴാണ് ഇന്‍ഡ്യാവിഷന്‍ ശബ്ദം...

"പി.ശശിയെ പാര്‍ട്ടിയില്‍ നിന്നും പുറത്താക്കാതെ തരം താഴ്ത്തുക മാത്രം ചെയ്തത് പെണ്‍‌വാണിഭക്കാര്‍ക്ക് എതിരല്ല പാര്‍ട്ടി എന്ന സൂചനയല്ലേ നല്‍കുന്നത്?"

പിണറായി : "അത്... ആ സഖാവിനു പ്രത്യേയ ശാസ്ത്രാധിഷ്ടിതമായ ചില വീഴ്ചകള്‍ പറ്റി എന്നു പാര്‍ട്ടി മനസ്സിലാക്കുന്നു. അതു തിരുത്താനുള്ള അവസരമാണ് ഇപ്പോള്‍ അദ്ദേഹത്തിനു നല്‍കിയിരിക്കുന്നത്. അദ്ദേഹം അതു തിരുത്തും എന്നാണ് പാര്‍ട്ടി കരുതുന്നത്. അദ്ദേഹം പെണ്‍‌വാണിഭക്കാരന്‍ ആണെന്നു നിങ്ങളോട് ആരാണ് പറഞ്ഞത്. ആ സഖാവ് പാര്‍ട്ടി സെക്രട്ടറിക്കു നല്‍കിയ ഒരു കത്ത് പത്രക്കാര്‍ക്ക് ചോര്‍ന്നു കിട്ടിയതിന്റെ പേരിലാണ് അദ്ദേഹത്തെ തരംതാഴ്ത്തിയത്. നിങ്ങള്‍ക്ക് ഈ പാര്‍ട്ടിയെ കുറിച്ച് എന്തറിയാം..."

പത്രസമ്മേളനം കഴിഞ്ഞു. പിണറായി പോയി. ലൈവായി പത്രസമ്മേളനം കണ്ടും കേട്ടും കൊണ്ടിരുന്ന ജനം വീണ്ടും പഴയ ആ ജീവി തന്നെ എന്ന് ഒന്നു കൂടി ഉറപ്പിച്ചു. മലയാളികളെ ചേര്‍ത്ത് ആ നാല്‍ക്കാലിയുടെ പേരു പറയുന്നില്ല. പേരു പറഞ്ഞാല്‍ ആ ജീവിയ്ക്കത് കുറച്ചിലാകും. കഴുതകള്‍ക്കും ഇല്ലേ മാനം!

Monday, January 31, 2011

ജീവിക്കാന്‍ വേണ്ടി...

ലൈഫ് ഇന്‍ഷുറന്‍സ് വേണം എന്ന് പറഞ്ഞാണ് അയാള്‍ വന്നത്. മണി ബാക്കും സേവിങ്ങും തുടങ്ങി നിക്ഷേപ സാധ്യതയും മൂലധന വളര്‍ച്ചയും ഉള്ള നിരവധി പോളിസികള്‍ പരിചയപ്പെടുത്തുമ്പോള്‍ അയാള്‍ക്ക്‌ അതൊന്നും കേള്‍ക്കേണ്ട. ഒരു മില്യണ്‍ ഡോളറിന്റെ ലെവല്‍ ടേം പ്ലാന്‍ വേണം. ലെവല്‍ ടേം എന്ന് പറഞ്ഞാല്‍ ഏകദേശം നമ്മുടെ മോട്ടോര്‍ ഇന്‍ഷുറന്‍സ് പോലെ. മരണം സംഭവിച്ചാല്‍ മാത്രം ക്ലയിം ലഭിക്കുന്ന പോളിസി.


അയാളുടെ നിലപാട് കണ്ടപ്പോള്‍ എന്തോ ഒരു പന്തികേട്‌ പോലെ.


"ബായി എന്താ പോളിസി എടുത്തിട്ടു ആത്മഹത്യ ചെയ്യാനുള്ള പരിപാടിയാ?. അത് നടക്കില്ല കേട്ടോ. അപകട മരണമോ സ്വോഭാവിക മരണമോ ആണെങ്കിലേ ക്ലയിം കിട്ടുള്ളൂ."


"അതൊക്കെ അറിയാം ബായി. ഞാന്‍ നാട്ടില്‍ പോയിട്ട് അവിടുന്നെന്റെ മരണ സര്ടിഫികറ്റ് സംഘടിപ്പിച്ചു അയച്ചു തരാം. താങ്കള്‍ അതൊന്നു കബൂലാക്കി എന്റെ അനിയന് കൊടുത്താല്‍ മതി. കിട്ടുന്ന പൈസേടെ പത്ത് ശതമാനം ബായിക്ക് തരാം...."


ജീവിക്കാന്‍ വേണ്ടി മരിക്കാന്‍ വരെ പാവം പാവം ബായി തയ്യാറായിരുന്നു!

Friday, January 28, 2011

ഒരു മുഴം മുന്നേ എറിയുന്ന കുഞ്ഞാലി കുട്ടി സാഹിബ്.

വ്യാജ സീഡി വീണ്ടും!

കുഞ്ഞാലി കുട്ടി സാഹിബിനെ തന്റെ ഭാര്യ ബന്ധു ശ്രീ. റൌഫ് വ്യാജ സീഡി കാട്ടി പേപ്പിടിയക്കുന്നു എന്ന് കുഞ്ഞാലി കുട്ടി പത്ര സമ്മേളനം നടത്തി പറഞ്ഞിരിക്കുന്നു. തന്നെ വധിക്കാന്‍ റൌഫ് ക്വട്ടേഷന്‍ സംഘത്തെ ഏര്‍പ്പെടുത്തിയിരിക്കുന്നു എന്നും അദ്ദേഹം പറഞ്ഞു വെച്ചിരിക്കുന്നു. പക്ഷെ വധ ഭീഷണിയല്ല കുഞ്ഞാലി കുട്ടി സാഹിബിനെ അലട്ടുന്നത് എന്ന് അദ്ധേഹത്തിന്റെ ശരീര ഭാഷയില്‍ നിന്നും തന്നെ വ്യക്തമാണ്‌. ചിത്ര വധം ചെയ്യപ്പെടാന്‍ വിധിക്കപ്പെട്ട ഒരാളുടെ ഭാവമായിരുന്നു അദ്ദേഹത്തിന്റേത്.

വ്യവസായ മന്ത്രിയായിരുന്ന കുഞ്ഞാലി കുട്ടിയുടെ നിഴലായിരുന്നു ഇന്ന് അദ്ദേഹത്തിനു അനഭിമതനായി മാറിയിരിക്കുന്ന റൌഫ്. വ്യവസായ മന്ത്രിയുടെ ഓഫീസിനെ റൌഫ് വ്യവസായ മന്ത്രിക്കും തനിക്കു വേണ്ടി തന്നെയും ദുരുപയോഗം ചെയ്തിട്ടിണ്ട്‌ എന്നത് അന്നേ പരസ്യമായിരുന്നു. ഇന്ന് പത്ര സമ്മേളനത്തില്‍ കുഞ്ഞാലി കുട്ടി സാഹിബ് തന്നെ അത് തുറന്നു സമ്മതിക്കുകയും ചെയ്തിരിക്കുന്നു. മന്ത്രിയായിരുന്ന കാലത്ത് റൌഫ് ഉള്‍പ്പെടെ പലരെയും താന്‍ വഴി വിട്ടു സഹായിച്ചിട്ടുണ്ട് എന്ന കുഞ്ഞാലി കുട്ടി സാഹിബിന്റെ കുറ്റസമ്മതം മന്ത്രിയായിരിക്കാനുള്ള തന്റെ യോഗ്യതയെ തന്നെയാണ് ചോദ്യം ചെയ്യുന്നത്. മന്ത്രിയായിരുന്നപ്പോള്‍ താന്‍ വഴിവിട്ട നിലപാടുകള്‍ എടുത്തിട്ടുണ്ട് എന്ന് അദ്ദേഹം തന്നെ പറയുമ്പോള്‍ മന്ത്രിയായിരുന്നപ്പോള്‍ അദ്ദേഹം എടുത്ത എല്ലാ തീരുമാനങ്ങളും നടപടികളും അന്വോഷണ വിധേയം ആകണം.

സീഡി എന്ന് കേട്ട നിമിഷം തന്നെ ഒരാള്‍ തന്നെ പെപ്പിടിയാക്കുന്നു എന്ന് വിലപിച്ചു സാഹിബ് പത്ര സമ്മേളനം നടത്തിയത് ഏതോ ഒരു സീഡിയോ അല്ലെങ്കില്‍ ഒരു കൂട്ടം സീഡികള്‍ ഒരുമിച്ചോ അദ്ദേഹത്തെ ഭയപ്പെടുത്തുന്നു എന്ന സൂചനയാണ് നല്കുന്നുത്. കുഞ്ഞാലികുട്ടി സാഹിബിന്റെ പ്രതിശ്ചായക്ക്‌ മങ്ങലേല്‍ക്കുന്ന തരത്തില്‍ ഏതെങ്കിലും സീഡികള്‍ രംഗത്ത് വരികയോ വരാതിരിക്കുകയോ ചെയ്യട്ടെ. പക്ഷെ സീഡികള്‍ വ്യജമാനെങ്കില്‍ അദ്ദേഹം എന്തിനു ഭയക്കണം? ഒരിക്കല്‍ ഐടി മന്ത്രിയായിരുന്ന അദ്ദേഹത്തിനു വ്യാജ സീഡി വളരെ ലളിതമായി പിടിക്കപ്പെടും എന്ന തിരിച്ചറിവ് ഇല്ലാതിരിക്കുമോ? അപ്പോള്‍ ഏതോ സീഡികള്‍ അദ്ധേഹത്തിന്റെ ഉറക്കം കെടുത്തുന്നുണ്ട്.

"ഇന്നലെ വരെ പലതും നടന്നിട്ടുണ്ടാകും.."

"താന്‍ ഇന്നി ബ്ലാക്ക്‌ മെയിലിങ്ങിനു നിന്ന് കൊടുക്കില്ല."

"മനുഷ്യനല്ലേ ... ഇതുവരെ നടന്നത് നടന്നു."

"കൊന്നാലും ബ്ലാക്ക്‌ മെയിലിങ്ങിനു ഇന്നി നിന്ന് കൊടുക്കില്ല."

അദ്ധേഹത്തിന്റെ ലൈവ് വാക്കുകള്‍. ....

അതായതു ഇന്നലെ പലതും അദ്ദേഹം നടത്തിയിട്ടുണ്ട്. അത് നാട്ടുകാര്‍ അറിയുന്ന കാര്യങ്ങള്‍. ഇന്ന് അദ്ദേഹം  തന്നെ അത് തുറന്നു പറയുകയും ചെയ്യുന്നു. നാട്ടുകാര്‍ അറിയുന്ന റജീന അല്ലാതെ മറ്റെന്തോക്കെയാണ് അദ്ദേഹം അന്ന് നടത്തിയതെന്ന് കൂടി പുറത്തു വരേണ്ടിയിരിക്കുന്നു.

മലബാര്‍ സിമന്റസിലെ അഴിമതി പര്‍വ്വം കുഞ്ഞാലി കുട്ടി സാഹിബ്‌ വ്യവസായ മന്ത്രിയായിരുന്ന കാല ഘട്ടത്തില്‍ ആയിരുന്നു നടന്നത്. സിമന്റസിലെ കമ്പനി സെക്രട്ടറിയായിരുന്ന ശശീന്ദ്രന്റെയും മക്കളുടെയും ദുരൂഹ മരണവും ഇപ്പോഴത്തെ അദ്ധേഹത്തിന്റെ പത്ര സമ്മേളനവുമായി വല്ല ബന്ധവും ഉണ്ടോ? ശശീന്ദ്രന്റെ മരണവുമായി ബന്ധപ്പെടുത്തി വാര്‍ത്തകളില്‍ വരുന്ന വ്യവസായി രാധാകൃഷ്ണനും കുഞ്ഞാലികുട്ടി സാഹിബിന്റെ ആഫീസുമായി
ബന്ധ പെട്ടിരുന്നു എന്ന വാര്‍ത്തകളും പുറത്തു വന്നു കൊണ്ടിരിക്കുന്നു. മലബാര്‍ സിമന്റസിലെ അഴിമതി വിചാരണക്ക് വരുന്ന ദിനങ്ങളിലാണ് ശശീന്ദ്രന്‍ ദുരൂഹമായി മരണപ്പെടുന്നതും അന്നത്തെ വ്യവസായ മന്ത്രിയായിരുന്ന ഒരാള്‍ വധ ഭീഷണി ഉണ്ട് എന്ന് പറഞ്ഞു വിലപിക്കുന്നതും.

ഇപ്പോള്‍ എല്ലാം പുറത്തു വരുന്ന കാലം. കുഞ്ഞാലി കുട്ടി സാഹിബിനും എല്ലാം തുറന്നു പറയാന്‍ ഒരു പക്ഷെ കാലം കൊടുത്ത അവസരം ആകാം ഇത്. അദ്ദേഹം കിട്ടിയ അവസരം നന്നായി ഉപയോഗിക്കട്ടെ!

പിന്‍ വിളി.
നമ്മുടെ തമിഴന്‍ സ്വാമിയും പറയുന്നത് അത് തന്നെ.
"സീഡി വ്യാജമാണെന്ന്!"