Saturday, October 20, 2007

വാ‍രവിചാരം : ബൂലോകം പോയ വാരം : ഒമ്പതാം ലക്കം

പോയത് ബൂലോകത്തെ തല്ലു വാരങ്ങളിലൊന്നായിരുന്നു. മഹാത്മാ ഗാന്ധി മുതല്‍ കുന്തീ ദേവി വരെ വിചാരണ ചെയ്യപ്പെട്ട സംഭവ ബഹുലമായ വാരം സൌഹൃദങ്ങളില്‍ വിള്ളല്‍ വീഴ്തുന്നത് കണ്ടു കൊണ്ടാണ് കടന്നു പോയത്. കമന്റുകള്‍ക്ക് വേണ്ടിയുള്ള വിലാപം ഒരിടത്ത് നടക്കുമ്പോള്‍ കമന്റോപ്ഷന്‍ പൂട്ടിയിട്ട് ചിലര്‍ പ്രതിഷേധിക്കുന്നു. മറ്റു ചിലര്‍ ബ്ലോഗേ പൂട്ടി പോകുന്നു. ആകെ ഗുലുമാലുകളുടെ ഘോഷയാത്രയ്ക്കിടയിലേക്ക് വാരവിചാരവും കടന്നു വരുന്നു...

1. മാപ്പേ...മാപ്പ്:
കൈപ്പള്ളിയറിഞ്ഞ ഗാന്ധിയെ കൈപ്പള്ളി ബൂലോകത്ത് പിടിച്ച് നിര്‍ത്തി ബൂലോക സമക്ഷം അവതരിപ്പിച്ചത് പോയ വാരം ആയിരുന്നേയില്ല. ആ വാരം കഴിഞ്ഞിട്ട് ദിവസങ്ങള്‍ കുറേയായി. പക്ഷേ ഒരു കര്‍ഷകന്‍ കൈപ്പള്ളിയെ സ്റ്റാന്റില്‍ പിടിച്ചത് പോയ വാരമായിരുന്നു എന്ന് മാത്രം. ഭാ‍രതത്തിന്റെ മഹാത്മാവിനെ വിചാരണ ചെയ്യാന്‍ കൈപ്പള്ളിക്കെന്തധികാരം. ഓന്‍ മാപ്പ് പറയണമെന്നായി കര്‍ഷകന്‍. കൈപ്പള്ളിയാരാ മോന്‍. ഓന്‍ മാപ്പു പറയുമോ. ജനാധിപത്യ പരമായി തന്നെ കാര്യം തീര്‍ക്കാനായിരുന്നു കൈപ്പള്ളിയുടെ തീരുമാനം. കൈപ്പള്ളി വോട്ടെടുപ്പിനുള്ള വിജ്ഞാപനം പുറപ്പെടുവിച്ചു. സ്ഥാനാര്‍ത്ഥികള്‍ രണ്ടാള്‍ മാത്രം. പണ്ട് അമേരിക്കാവൂ പറഞ്ഞ പോലെ. “ഒന്നുകില്‍ ഞങ്ങളുടെ കൂടെ അല്ലാത്തവരെല്ലാം ഭീകരര്‍”. “ഞങ്ങക്കൊന്നും പറയാനില്ല ചെല്ലേ..” എന്നൊരോപ്ഷന് ഉണ്ടായിരുന്നേലെന്ന് വോട്ട് കുത്തിയവരെല്ലാം “കുശുകുശുപ്പ്” നടത്തിയെന്ന് എന്‍.ഡി.റ്റീ.വി. ലൈവായി മൊഴിഞ്ഞു. എല്ലാ വീറും വാശിയോടും കൂടി തന്നെ വോട്ടെടുപ്പ് നടന്നു. പെട്ടി തുറന്നപ്പോഴോ? കൈപ്പള്ളി പൊട്ടി. കള്ളവോട്ടായിരുന്നു എന്ന ഞൊണുക്ക് വാദമൊന്നുമില്ലാതെ കൈപ്പള്ളി മാഫും പറഞ്ഞ് കൂട്ടത്തില്‍ ബ്ലോഗും പൂട്ടി ബൂലോകം വിട്ടു. പൂട്ടിയ ബ്ലോഗ് തുറക്കാന്‍ ഭീമ ഹര്‍ജ്ജി. കൈപ്പള്ളിയറിഞ്ഞ ഗാന്ധിയെ തിരിച്ചറിയാന്‍ ബൂലോകര്‍ കൈപ്പള്ളി സമക്ഷം ഭീമ ഹര്‍ജ്ജി സമര്‍പ്പിച്ചു. മല്ലു അങ്കിള്‍ വീണ്ടും സ്റ്റാന്റില്‍. അപ്പോള്‍ പറഞ്ഞ് വന്നതെന്നാന്ന് പറഞ്ഞാലേ “മാപ്പാണ് താരം”. ദേണ്ടെ കര്‍ഷകന്‍ ഫെയിം വിചാരപ്പുകാരനും പ്രതിഷേധിക്കുവാ. എങ്ങിനാന്ന് വെച്ചാ..ഇതാ ഇങ്ങിനെ:

ആദ്യം മാപ്പു പറയാന്‍ വേദിയിലെത്തേണ്ടത് ശ്രീമാന്‍ കെ.പി.സുകുമാരന്‍ അഞ്ചരക്കണ്ടി. അതിയാന്റെ മേല്‍ ചാര്‍ത്തപ്പെട്ടിരിക്കുന്ന കുറ്റം: പ്രപഞ്ച നാഥനും ലോകരക്ഷീതാവും കോടിക്കണക്കിന് വിശ്വാസികളുടെ ആശയും ആവേശവും ആരാധനാ പാത്രവുമായ ദൈവത്തെ അടിക്കടി വിചാരണ ചെയ്യുന്നു. ശ്രീമാന് കെ.പി., വിചാരിപ്പ് കാരന്‍ അടക്കമുള്ള ലോകത്തെ കോടി കണക്കിന് ഈശ്വര വിശ്വസികള്‍ക്ക് വേണ്ടി നിര്‍വ്യജ്യം മാപ്പു പറയണമെന്ന് കോടതി വിധിച്ചിരിക്കുന്നു. വോട്ടെടുപ്പിന്റെ വിജ്ഞാപനം എന്നത്തേക്ക് പുറപ്പെടുവിപ്പിക്കാനാവും സുകുമാരന്മാഷേ. മൂന്നാമത്തെ ഓപ്ഷന്‍ മറക്കാണ്ടാട്ടോ. ജബ്ബാര്‍ മാഷിനും സുകുമാരന്‍‍ മാഷിനും വേണമെങ്കില്‍ ഒന്നിച്ച് മാപ്പ് പറയാം. അല്ലെങ്കില്‍ ശിക്ഷ തുല്യമായി പങ്കിടേണ്ടി വരും.

എഴുതുന്ന എല്ലാ പോസ്റ്റിലും കള്ളിനേയും കപ്പയേയും കൂട്ടു പിടിക്കുന്ന ബാച്ചികളും അല്ലാത്തവരുമായ എല്ലാ ബൂലോകരും മാപ്പ് പറയണം. പുതു തലമുറയെ “തണ്ണി” യില്‍ മുക്കി കൊല്ലാനുള്ള ഇവരുടെ ശ്രമം അത്യന്തം ആപല്‍ക്കരമാണ്. എല്ലാവരും കൂടി ഒന്നിച്ച് മാപ്പ് പറഞ്ഞാല്‍ മതിയാകും. അടുത്ത ബെല്ലോടുകൂടി മാപ്പു പറയല്‍ ആരംഭിക്കാം.ഈ കേസില്‍ വോട്ടെടുപ്പ് അനുവദിക്കുന്നതല്ല. നൂറു ശതമാനം വോട്ടും പ്രതികളുടെ പെട്ടിയില്‍ വീഴും എന്ന് കോടതി ഭയക്കുന്നു.

പിന്മൊഴിയെ പ്രണയിച്ചവരുടെ അപേക്ഷകള്‍ ദയാരഹിതമായി തള്ളിയ നടത്തിപ്പുകാരും പിന്മൊഴിയെ തള്ളി പറഞ്ഞവരും പിന്മൊഴിയെ പ്രണയിച്ചിരുന്നവരോട് മാപ്പ് പറയട്ടെ. പിന്മൊഴിയെ പൂട്ടിയവരെ ബൂലോകത്ത് പിടിച്ച് കെട്ടി വിചാരണ ചെയ്തവരും മാപ്പ് പറഞ്ഞേ പറ്റൂ. വായിക്കുന്ന പോസ്റ്റിന് കമന്റാതെ പോകുന്നവരെത്ര വല്ലിയ പാതകമാണ് അനുദിനം ചെയ്തു കൊണ്ടിരിക്കുന്നത്. അവരെകൊണ്ട് മാപ്പ് പറയിക്കും വരെ ഗാന്ധിയന്‍ സമരമുറകള്‍ അനുഷ്ടിക്കാം. ഒരു മിനിട്ട് ബ്ലോഗ് പൂട്ടിയിട്ട് പ്രതിഷേധിക്കാം.

മാപ്പ് പറയാനും കൊടുക്കാനും ഒക്കെയായി ഒരു പൊതുകളം സൃഷ്ടിക്കാം. ഈ “ഓഫ് യൂണിയന്‍” പോലെ ഒരു “മാഫ് യൂണിയന്‍”. ആര്‍ക്കങ്കിലും സ്വന്തമായിട്ടറിഞ്ഞതെന്തെങ്കിലും ബൂലോകത്ത് പങ്കുവെക്കണമെങ്കില്‍ മാഫ് യൂണിയനില്‍ ഒരു ചിറ്റെടുത്ത് മാഫ് പറയാനുള്ള ദിനവും സമയവും മുങ്കൂട്ടി റിസര്‍വ് ചെയ്ത് മാഫ് ചോദിക്കാനും പറയാനുമുള്ള അവസരം ഉണ്ടാക്കാം. ഇങ്ങിനെ പോയാല്‍ ചീട്ട് അടുത്ത നൂറ്റാണ്ടിലേ കിട്ടലുണ്ടാവുകയുള്ളൂ എന്ന് പിന്നാമ്പുറം.

എന്താ പറഞ്ഞേ...കേട്ടില്ല. ഓ...സര്‍വ്വതിനേയും കേറി വെറുതേയങ്ങ് വിചാരിക്കുന്ന താനാദ്യം മാപ്പു പറയാനോ..
ദേണ്ടെ കണ്ടില്ലേ ഒരു ഒന്നൊന്നര മാപ്പ് നെടുനെടുങ്ങനെ കിടന്ന് നിലവിളിക്കുന്നത്:
“സര്‍വ്വതിനും മാപ്പേ...മാപ്പ്.”

2. കമന്റുകളും കാത്തിരിക്കുന്ന വേഴാമ്പലുകള്‍.
പോസ്റ്റിന് കമന്റുകള്‍ കിട്ടുന്നില്ലേ എന്നുള്ള നിലവിളിക്ക് ബൂലോകം സൃഷ്ടിക്കപെട്ടതോളം പ്രായമൊന്നുമില്ല. ആദ്യ കാലങ്ങളില്‍ ആകെ മുപ്പത് പേരുള്ള ഒരു ചെറു ഗ്രൂപ്പിന്റെ കൂട്ടു കുടുംബമായിരുന്നപ്പോള്‍ ഇടുന്ന പോസ്റ്റിന് മുപ്പത് കമന്റ് ഫിക്സെഡ് ഡിപ്പോസിറ്റായിരുന്നു. കാലമേറെ മുന്നോട്ടു പോയി. വായനക്കാരേക്കാള്‍ എഴുത്തുകാര്‍. കമന്റുന്ന സമയത്ത് മറ്റൊരു പോസ്റ്റ് എന്നായി എല്ലാരുടേം ചിന്ത. പിന്നെങ്ങിനെ കമന്റുകള്‍ പെയ്യും.

കമന്റില്ലേ എന്ന് നിലവിളിച്ച് രണ്ട് പോസ്റ്റിട്ട് സ്വന്തം ബ്ലോഗില്‍ കമന്റ് മഴ പെയ്യിച്ച സാ‍ബു പ്രയാര്‍ എന്ന ബ്ലോഗര്‍ പുതു ബ്ലോഗര്‍മാരുടെ ബ്ലോഗുകളില്‍ ഇട്ട കമന്റുകള്‍ തപ്പി വിചാരിപ്പ് കാരന്‍ നടത്തിയ യാത്രയുടെ ഫലം പരാജയമായിരുന്നു. സാബു പ്രയാറിന്റെ മറ്റു ബ്ലോഗുകളിലെ സാനിദ്ധ്യം കണ്ടെത്തുക വളരെ ദുഷ്കരമാണ്. കാരണം സാബുവിന്റെ മറ്റു ബ്ലൊഗുകളിലെ കമന്റുകളുടെ സാനിദ്ധ്യം പൊടിപോലുമില്ല കണ്ടു പിടിക്കാന്‍. പക്ഷേ “വാര വിചാരത്തിന്റെ” കമന്റുകളില്‍ അദ്ദേഹത്തിന്റെ സാനിദ്ധ്യം കണ്ടു.

ഇന്നിയൊരു പുതിയ യൂണിയനും കൂടിയാകാം. ഓഫ് യൂണിയന്‍ പോലെ “കമന്റു സപ്ലൈ യൂണിയന്‍”. യൂണിയനിലെ ഒരോ അംഗവും ദിവസം ഏറ്റവും കുറഞ്ഞത് പത്ത് കമന്റുകള്‍ എങ്കിലും ഇടണമെന്നും ഇടുന്ന കമന്റെല്ലാം പുതു ബ്ലോഗറന്മാരുടെ ബ്ലോഗിലായിരിക്കണം എന്നും ഉള്ള നിബന്ധനയായിരിക്കണം അംഗത്വത്തിനു വേണ്ടുന്ന പ്രധാന മാനദണ്ഡം.

കമന്റുകളേ നിങ്ങള്‍ ഈ വഴിയും ഒന്നു കയറിയിട്ട് പോകൂ. കഴിഞ്ഞ ലക്കം വിചാരത്തിന് കിട്ടിയ കമന്റുകളുടെ എണ്ണം എത്രയെന്നോ. രണ്ടേ രണ്ടെണ്ണം. കമന്റുകള്‍ക്കായി മഴകാത്തിരിക്കുന്ന വിചാരിപ്പ് കാരന്‍ എന്ന വേഴാമ്പലിനെ കാണുന്നില്ലേ ബൂലോകമേ നിങ്ങള്‍... ആരെങ്കിലും ഇത്തിരി കമന്റ് ഇവിടേയും വിതരണം ചെയ്യൂ ബൂലോക സാഹോദര്യമേ.... ഇല്ലെങ്കില്‍ “ബൂലോകത്തെ കമന്റ് കുംഭകോണം” എന്ന പേരില്‍ പോസ്റ്റിട്ട് വിചാരിപ്പ്കാരനും കൃതൃമമായി കമന്റു മഴ പെയ്യിക്കും.

ജാഗ്രതൈ!

3. മലയാളത്തിനായി ഗൂഗ്ലിന്റെ സംഭാവന.
വരമൊഴിക്ക് ഗൂഗിള്‍ മറുമൊഴി എന്ന പോസ്റ്റില്‍ സിബൂ മലയാളത്തിനായി ഗൂഗിള്‍ നല്‍കിയ പുതു സാങ്കേതം പരിചയപ്പെടുത്തുന്നു. ഡൌണ്‍ ലോഡ് ചെയ്യുകയോ ഇന്‍സ്റ്റാള്‍ ചെയ്യുകയോ ഒന്നും ചെയ്യാതെ ഇതുവഴി വെറുതേ മംഗ്ലീഷില്‍ അങ്ങ് റ്റൈപ്പുക. ഉപയോഗിച്ച് നോക്കി സ്വയം മനസ്സിലാക്കണം. എങ്കില്‍ മാത്രമേ ഈ വിദ്യ നല്‍കുന്ന സൌകര്യം മുഴുവനും ഉള്‍കൊള്ളാന്‍ കഴിയുള്ളു. ഇതിലൂടെ പുതിയ നിഘണ്ടുവും അക്ഷര തെറ്റുകള്‍ ഓണ്‍ലൈനില്‍ തിരുത്താനുള്ള സാങ്കേതവും ഒക്കെ ഉണ്ടാകും എന്ന് പ്രതീക്ഷിക്കാം. ഈ സാങ്കേതത്തിന്റെ പിന്നില്‍ പ്രവര്‍ത്തിച്ചിരിക്കുന്നതും സിബുവും ഉമേഷും ഒക്കെ തന്നെയാണ് എന്നുള്ളത് ബൂലോകത്തിനാകെ അഭിമാനിക്കത്തക്കതും ആകുന്നു.

4. സ്ത്രീയെ സ്ത്രീ തന്നെ...
അഷറഫ് കൊണ്ടുവന്ന ഈ ദുരന്തകാഴ്ച മനസ്സിനെ പിടിച്ച് കുലുക്കി. ബയന്റ് പെട്ടിയില്‍ മോര്‍ച്ചറിയിലേക്ക് കയറി പോകുന്ന കുരുന്നിന്റെ ചിത്രം അത്ര വേഗമൊന്നും മനസ്സില്‍ നിന്നും മായില്ല. ദാരുണമായ കാഴ്ച.

5. സംഗീതത്തിന്‍ നേരേ പിടിച്ച കണ്ണാടി.
ഭാരതത്തിലെ പ്രശസ്തരും അനുഗ്രഹീതരുമായ ഗായകരെ illusions പരിചയപ്പെടുത്തുന്നത് അവരുടെ പോപ്പുലറായ സംഭാവനകളുടെ പിന്തുണയോടെയാണ്. കണ്ണാടി തികച്ചും ശ്രദ്ധയറ്ഹിക്കുന്ന ബ്ലോഗാണ്. സന്ദര്‍ശിക്കണം എന്ന് നിര്‍ദ്ദേശിക്കാന്‍ പറ്റിയൊരിടം.

6. നിഘണ്ടു.
അക്ഷരതെറ്റുകളെ തിരുത്തുവാനുതകുന്ന തരത്തിലുള്ള നിഘണ്ടു തപ്പി നടക്കവേയാണ് പോയ വാരം രണ്ടു നിഘണ്ടുകള്‍ കാണാന്‍ കഴിഞ്ഞത്. ഒന്നിവിടെ. മറ്റൊന്നു അങ്കിളിന്റെ ബ്ലോഗില്‍. രണ്ടും ഗുണകരം.

7. മാജിക്കിന്റെ മനശ്ശാസ്ത്രം.
മന്‍സൂറിന്റെ ഞാനും ,എന്റെ മാജിക്കും,പിന്നെ നിങ്ങളും എന്ന പുതു ബ്ലോഗില്‍ മന്‍സൂര്‍ ചര്‍ച്ച ചെയ്യാനുദ്ദേശിക്കുന്നത് അദ്ദേഹത്തിന്റെ മാജിക്ക് അനുഭവങ്ങളാണ്. മാജിക്ക് വേദികളിലുണ്ടായ അനുഭവ കുറിപ്പ് എന്നതിലുപരി മാജിക്കിന്റ് രഹസ്യങ്ങള്‍ ചര്‍ച്ച ചെയ്യാനുള്ള ഒരു വേദിയായി ഈ ബ്ലോഗ് മാറട്ടെ!

8. ബൂലോക വിവാഹം
ബൂലോകത്തെ ആദ്യ വിവാഹം ഒരു വിവാഹ വീട്ടിന്റെ സര്‍വ്വ ഭാവഹാതികളോടും കൂടി തന്നെ ബൂലോകം ആഘോഷിക്കുന്നതാണ് പോയ വാരത്തെ ബൂലോക കൌതുകം. ഇക്കാസും ജാസൂട്ടിയും വിവാഹിതരാകുമ്പോള്‍ അത് ബൂലോകത്തെ ആദ്യത്തെ ബ്ലോഗര്‍ വിവാ‍ഹമായി.ക്ഷണകത്ത് മുതല്‍ ബൂലോക മയം. ഒരു കല്ല്യാണ വീട്ടിന്റെ പരിഛേദമായി ഇക്കാസും ജാസൂട്ടിയും വിഹാഹിതരാകുന്നു എന്ന പോസ്റ്റിലെ കമന്റാഘോഷം. വധൂവരന്മാര്‍ക്ക് വാരവിചാരത്തിന്റേയും മംഗളാശംസള്‍.

9. ആസ്ഥാന ഗോദയില്‍.
ബൂലോകത്തെ ആസ്ഥാന ഗോദയില്‍ പോയ വാരം ‘ചിത്ര’വധത്തിന് ഇരയായത് മഹാഭാരതത്തിലെ പാവം കുന്തീ ദേവിയായിരുന്നു. മഹാഭാ‍രതത്തിലേയും രാമായണത്തിലേയും ഖുറാനിലേയും ബൈബിളിലേയും ഒക്കെ കഥാപാത്രങ്ങളേയും കഥകളേയും വിമറ്ശിക്കുന്നതില്‍ ആരും തെറ്റു പറയില്ല. പക്ഷേ സഭ്യമായ ഭാഷ ഉപയോഗിക്കണം എന്ന് മാത്രം. അല്ലെങ്കില്‍ അപ്പിയില്‍ ചവിട്ടിയ അറപ്പായിരിക്കും പോസ്റ്റ് വായിച്ച് കഴിയുമ്പോള്‍ തോന്നുക. ആ അറപ്പാണ് ആസ്ഥാന ഗോദയില്‍ ചെന്ന് പെടുമ്പോള്‍ അനുഭവപ്പെടുന്നത്. ആ അനുഭവത്തില്‍ നിന്നുമാണ് ഒമ്പതു വര്‍ഷം പഴക്കമുള്ള “ബ്രാഹ്മണ ശങ്ക” വീണ്ടും അവതരിക്കപ്പെട്ടത്. ആസ്ഥാന ഗോദയിലെ വരും വാരത്തെ വെളിപാടെന്നതായിരിക്കുമോ എന്തോ?

10. മലയാളം ജീവിക്കുന്നത്.
മലയാളം യൂണീകോഡിന്റെ ചരിത്രത്തെയും വളര്‍ച്ചയേയും കുറിച്ച് സ്നിഗ്ദാ റെബേക്കാ ജേക്കബ്ബ് എഴുതിയ മലയാളം ജീവിക്കുന്നത് എന്ന ലേഖനത്തില്‍ സാങ്കേതികമായി മലയാളം കംബൂട്ടറുകളിലൂടെ വളരുന്നതിന്റെ ചരിത്രത്തിലേക്കണ് ലേഖകന്‍ ശ്രദ്ധ ക്ഷണിക്കുന്നത്. മലയാളത്തിന്റെ യൂണീകോഡ് ചരിത്രം ആധികാരികമായി എഴുതി വെക്കേണ്ടതിന്റെ ആവശ്യകത വിളിച്ചോതുന്നതാണ് ലേഖനം. ലേഖനത്തേക്കാള്‍ ആധികാരികമായി വിശ്വപ്രഭയുടെ കമന്റ്. മലയാളത്തിന്റെ കംബൂട്ടര്‍ പ്രവേശ ചരിത്രം എഴുതി സൂക്ഷിക്കേണ്ടത് ആവശ്യം തന്നെ.

11. നവാഗതര്‍
മുന്‌വാരത്തെപോലെ തന്നെ പോയ വാരവും പുതുമുഖങ്ങളുടെ രംഗപ്രവേശം കൊണ്ട് ശ്രദ്ധേയമായിരുന്നു. മാതൃഭൂമിയിലെ വിശാലമനസ്കന്റെ സാനിദ്ധ്യം തന്നെയാണ് ഈ തള്ളി കയറ്റത്തിന് കാരണം. ശ്രദ്ധിക്കപ്പെടേണ്ട പലരും പുതുതായി വന്നിട്ടുണ്ട്.
1. സ്വപ്ന ഭൂമി.
ഡള്ളാസില്‍ നിന്നും പ്രിയാ ഉണ്ണികൃഷ്ണന്‍ എഴുതുന്ന ബ്ലോഗ്. സ്വപന ഭൂമിയെ കുറിച്ച് പ്രിയാ ഉണ്ണികൃഷ്ണന്റെ തന്നെ വാക്കുകള്‍ “ഇതെന്റെ സ്വപ്നഭൂമിയാണ്‌.കാലം ഇനിയെനിക്ക്‌ സമ്മാനിക്കുന്നതെല്ലാം ഇവിടെ നിന്നാണ്‌.അറിയാതെ മറന്നുവെച്ച സ്നേഹത്തെ സാക്ഷിയാക്കി മനപ്പൂര്‍വ്വം ഞാനെന്റെ ഹൃദയം ഇവിടെ മറന്നുവെയ്ക്കുകയാണ്‌..”

2. വിനുവിന്റെ ബ്ലൊഗ്.
മലയാളം ഭൂലോകം മുഴുവന്‍ ചെന്നെത്തുന്നതിനെ അഹങ്കാ‍രത്തോടെ അനുഭവിക്കാനായി വിനു ബ്ലോഗ് തുറന്നിരിക്കുന്നു. തുടക്കം സ്വതന്ത്ര സോഫ്റ്റ് വേയറിന്റെ സന്ദേശവുമായി. വിനുവിന്റെ ബ്ലോഗ് സാങ്കേതിക വിദ്യാര്‍ത്ഥിയായതു കൊണ്ട് തന്നെ ചര്‍ച്ചക്ക് വെക്കുന്നത് “സാങ്കേതികം” ആയിരിക്കും എന്ന് കരുതാം.

3. മലയാള വാക്ക്.
പാലക്കാട് വിക്ടോറിയാ കോളേജ് ലക്ചറ‌ര്‍ ശ്രീ. വി. വിജയ കുമാറിന്റെ പുതു ബ്ലോഗാണ് മലയാളം വാക്ക് ആനുകാലിക സംഭവ വികാസങ്ങളെ ഇടതു പക്ഷ വീക്ഷണകോണില്‍ നിന്നു കൊണ്ട് വിശകലനം ചെയ്യാനുള്ള ശ്രമമാണ് വിജയകുമാര്‍ നടത്തുന്നത്.

4. താമര പൊയ്കകള്‍
അയല്‍ക്കാരന്റെ ബ്ലോഗ്. ടൈപ്പ് ചെയ്യാനുള്ള മടി കാരണം മാത്രം പോസ്റ്റ് ചെയ്യല്‍ നീട്ടി വെക്കേണ്ടി വന്ന ഒരു ഹതഭാഗ്യന്റെ ബ്ലോഗ്. പേരു പൊലെ മനോഹരമായി എഴുതാന്‍ പുതു മുഖത്തിന് കഴിയുമോ എന്ന് സംശയമാണ്. ആദ്യ പോസ്റ്റില്‍ “നമസ്കാരം” വും രണ്ടാം പോസ്റ്റില്‍ “കോപ്പീ പേസ്റ്റുമേ” യുള്ളൂ.

5. ചിതറിയ ചായങ്ങള്‍.
രഞ്ജിത്ത് സജീവിന്റെ ബ്ലോഗ്. കവിതാ ബ്ലോഗാണ് ചിതറിയ ചായങ്ങള്‍.

6. കോങ്കണ്ണ്
ഹനീഷ് കെ.എം. എഴുതുന്ന ഫോട്ടോ ബ്ലോഗ്. ഫോട്ടോയുടേയും ഫോക്കസിന്റേയും സാങ്കേതികത്വം വിശകലനം ചെയ്യാന്‍ വിചാരിപ്പ് കാരന്‍ ആളല്ലായെങ്കിലും ആദ്യ ഫോട്ടോ അടുത്ത ബെല്ലോടുകൂടി ഗ്രാമത്തിലെ ഉത്സവത്തെ ഓര്‍മ്മപ്പെടുത്തി.

7. കീയോ...കീയോ.
വിനയത്തോടെ തന്നെ സ്വയം പരിചയപ്പെടുത്തുന്നത് അഹങ്കാരമാകും എന്ന് പറഞ്ഞാണ് ഉപദേശി ഉപദേശം തുടങ്ങിയിരിക്കുന്നത്. ബൂലോകത്ത് ഒരു പേരിടാനുള്ള ബുദ്ധി മുട്ട് ഉപദേശി തുറന്ന് പറഞ്ഞിരിക്കുന്നു. അങ്ങിനെ ആരും ഇടാത്ത ഒരു പേര് തപ്പി തപ്പി ഉപദേശി “കീയൊ...കീയോ” യില്‍ എത്തി. ശരിയാണ് ആരും ഇടാത്ത പേര് തന്നെ. സംശയമില്ല.

8. കരാള കേരളം.
നല്ല മറ്റൊരു പേര്. കേരളത്തിനെ ഇതില്‍ കൂടുതല്‍ എങ്ങിനെ വിശേഷിപ്പിക്കാനാ? അനീതികള്‍ക്കെതിരേ ആഞ്ഞടിക്കാനാണ് അദൃശ്യന്റെ അവതാരം. ആഞ്ഞടിക്കുമ്പോള്‍ അദൃശ്യനായിരിക്കയാണ് അത്യുത്തമം.

9. കടല്‍പ്പച്ച.
ആശാലതയുടെ കവിതാ ബ്ലോഗം. ദുരൂഹവും ദുര്‍ഗ്രാഹ്യവുമായ വരികളാണ് ആകെപ്പാടെ‍. എഴുത്തുകാരി തന്നെ ആസ്വാദനവും എഴുതേണ്ടി വരും കടല്‍പ്പച്ച യിലെ കവിതകള്‍ക്ക്.

10. ഉള്ളത് പറഞ്ഞാല്‍
ചില അപ്രിയ സത്യങ്ങളുമായാണ് Third eye എത്തുന്നത്. ഉള്ളത് പറഞ്ഞാല്‍ ഉറിയും ചിരിക്കും. ഉറി ചിരിക്കുന്ന ഉള്ളതുകള്‍ പറയാന്‍ എഴുത്തുകാരന് കഴിയട്ടെ.

11. ആദിദ്രാവിഡന്‍.
ബിനീഷ് പി. യുടെ പുതിയ ബ്ലോഗ്. “പച്ച നിറമുള്ള രാത്രി..., ചുവന്ന ഇലകള്‍ തേടി കാട് കയറിയപ്പോള്‍
എന്നെ നനയിക്കാതെ പെയ്ത വയലറ്റ് മഴയില്‍..” എന്നതാണോ എന്തോ? കവിതാ ബ്ലോഗാണ് ആദി ദ്രാവിഡന്‍.

12. ആകാശം വീഴുന്നു...കൈകള് താങ്ങുന്നു.
രഘുനാഥ് പലേരിയുടെ ബ്ലോഗ്. “ആകാശം അതിരുകള്‍ കാണാതെ സഞ്ചരിക്കുന്നു.ആ സുന്ദര സഞ്ചാരത്തിനിടയില്‍ വേദനിക്കുന്നവരുടെ തേങ്ങലുകള്‍ വീണു മുറിഞ്ഞ് ആകാശം വീഴുമ്പോള്‍ മനസ്സിന്റെ കൈ കൊണ്ടു തന്നെ അതിനെ താങ്ങുക. ഓരോ കഷ്ണ്ണങ്ങളും സ്നേഹത്തോടെ പെറുക്കി തിരികെ വെക്കുക. സ്നേഹമാണു ഗായത്രി. സ്നേഹം. സ്നേഹത്തിന്നപ്പുറം മറ്റൊരു മന്ത്രമില്ല.” ബൂലോകത്തെയും സ്നേഹ മന്ത്രമാകന് രഘുനാഥ് പലേരിക്ക് കഴിയട്ടെ.

13. The world, as I see it
അനീജ് ആനന്ദിന്റെ പുതു ബ്ലോഗ്. കവിതാ ബ്ലോഗമാണ് The world, as I see it

14. സ്വപ്ന സമാനം.
സനല്‍കുമാറിന്റെ ബ്ലോഗ്. നെരൂദയുടെ വരികളെ കടം കൊണ്ട് ബ്ലൊഗിലേക്കെത്തുന്നു സനല്‍കുമാറ് സ്വപ്ന സമാനവുമായി.

15. Perlath House
ശ്രീയുടെ പുതു ബ്ലോഗ്. പേരൂകളിലെ സാമ്യത പുതു ബ്ലോഗുകളില്‍ കൂടുതലായി കണ്ടുവരുന്നു. പേരു തിരഞ്ഞെടുക്കുമ്പോള്‍ അത് പുതിയതായിരിക്കാന്‍ പുതിയവര്‍ ശ്രമിക്കുന്നത് നന്നായിരിക്കും. ശ്രീ നമസ്കാരം പറഞ്ഞിട്ടേ ഉള്ളൂ. ലക്ഷ്യം വ്യക്തമല്ല.

16. നാടകീയം.
നാടകീയന്റെ പുതു ബ്ലോഗ്. അ..ആ‍ യില്‍ തുടക്കം. ശരിയല്ലല്ലോ. ഹരി ശ്രീ യീലല്ലേ തുടങ്ങേണ്ടത്. എന്തോ ആവട്ടെ. സിനിമ യാണെന്ന് തോന്നുന്നു നാടകീയം ചര്‍ച്ച ചെയ്യാന്‍ പോകുന്നത്.

17. MEZHATHOORKARAN
മേഴത്തൂര്‍കാരന്റെ പുതൂ ബ്ലൊഗ്. കവിതാ ബ്ലോഗ് ആണ് മേഴത്തൂര്‍കാരന്‍ എന്ന് തോന്നുന്നു.

18. Memoirs of Anand Kurup
വളരെകാലത്തെ നിരീക്ഷണങ്ങള്‍ക്ക് ശേഷം ബൂലോകത്ത് പട്ടയം നേടിയെത്തിയിരിക്കയാണ് ആനന്ദ് കുറുപ്പ്. ഓര്‍മ്മകുറിപ്പുകളാണ് കുറൂപ്പ് പങ്കുവെക്കുന്നത്.

19. Kuttettante Kurippukal
ഷൈനിന്റെ പുതു ബ്ലോഗ്. കുഞ്ഞു ചിന്തകള്‍ പങ്കുവെക്കാനൊരിടം എന്ന മിനിമം പ്രോഗ്രാമും ആയി പ്രോഗ്രാമര്‍ ആയ ഷൈന്‍ കുട്ടന്റെ കുറിപ്പുകളുമായി എത്തുന്നു. പ്രതീക്ഷയുണര്‍ത്തുന്ന മറ്റൊരു ബ്ലോഗിന്റെ രംഗപ്രവേശമായി ഷൈന്റെ ബ്ലോഗിനെ കാണാം.

20. Ente Blah !!
നോബഡിയുടെ പുതിയ ബ്ലോഗ്. ബ്ലാ..ബ്ലാ.. തന്നേന്ന്. എഴുതി തുടങ്ങിയ ആദ്യത്തെ പോസ്റ്റ് പോലും പൂര്‍ത്തിയാക്കി പോസ്റ്റാന്‍ പോസ്റ്റ്കാരന് കഴിഞ്ഞിട്ടില്ല.

21. എന്‍.ഏ. ബക്കറ്.
എന്‍.ഏ. ബക്കറുടെ ബ്ലോഗിന് പേരില്ല. തുടക്കം ചരിത്രത്തില്‍ നിന്നും മിത്തിലേക്ക് ഇറങ്ങി പോയ ചേരമാന്‍ പെരുമാളിനെ ഓര്‍ത്തുകൊണ്ട്. പേരിന് എന്തു പറ്റിയോ എന്തോ? ബ്ലോഗും മിത്താവാതിരിക്കട്ടെ.

പുതു ബ്ലോഗുകളിലധികവും ഇംഗ്ലീഷ് പേരാണ് ഉപയോഗിച്ചിരിക്കുന്നത്. ഇതൊരു നല്ല ട്രെന്റ് ആണെന്ന് കരുതാന്‍ കഴിയില്ല. മലയാളം തന്നെ കൂടുതല്‍ ഉപയോഗിക്കാന്‍ ശ്രമിക്കുന്നതല്ലേ നല്ലത്.

12. പുനര്‍ വായന.
സജുവിന്റെ ബ്ലോഗ് വായിക്കുക ഒരു ഹരമായിരുന്നു. സാങ്കേതികതയെ ലളിതമായി അവതരിപ്പിക്കാന്‍ സജു എപ്പോഴും ശ്രമിച്ചിട്ടുണ്ട്. അവസാനം വന്ന പോസ്റ്റ് ജനുവരി രണ്ടായിരത്തി ഏഴില്‍ ആണ്. സ്വതന്ത്ര സോഫ്റ്റ് വേയറിന്റെ നന്മകളെ കുറിച്ച് സജു ആധികാരികമായി തന്നെ ലേഖനങ്ങള്‍ എഴുതി. സാങ്കേതിക ജ്ഞാനം വളര്‍ത്തിയെടുക്കാന്‍ സജുവിനെ പോലെയുള്ളവര്‍ നടത്തിയ ശ്രമങ്ങള്‍ എപ്പോഴും സ്മരിക്കപ്പെടേണ്ടതാണ്. ഫേവറിറ്റില്‍ തൂങ്ങിയ സജുവിന്റെ ബ്ലോഗ് ഒരാവര്‍ത്തി കൂടി വായിച്ച് കഴിഞ്ഞപ്പോള്‍ ഇവരൊക്കെ എന്താണ് ബൂലോകത്തോട് വിട പറയുന്നത് എന്ന് തോന്നി പോയി. വായിക്ക പെടേണ്ടവയാണ് സജുവിന്റെ പോസ്റ്റുകള്‍ ഒക്കെയും തന്നെ.

വാരവിചാരത്തിന്റെ മുന്‍ ലക്കങ്ങള്‍ ഇവിടെ വായിക്കാം.
നന്ദി.

28 comments:

അഞ്ചല്‍കാരന്‍ said...

ഒമ്പതാം ലക്കം ബൂലോകം പോയ വാരം ബൂലോക സമക്ഷം സമര്‍പ്പിക്കുന്നു.
നന്ദി.

വാല്‍മീകി said...

വിണ്ടും ഒരു നല്ല വാരഫലം. വളരെ പ്രയോജനപ്രദം. നന്ദി.

ഉപദേശി‍ said...

താങ്കളുടെ ഈ പരിശ്രമം എന്നെപ്പോലുള്ള തുടക്കക്കാര്‍ക്ക് വളരെ പ്രയോജനപ്രദംതന്നെയാണ് നന്ദി

എതിരൊഴുക്കുകള്‍ said...

വാരവിചാരം ഒരു ഗംഭീര സംഭവമാണ്. ഇതിന്‍റെ പിന്നിലെ എഫര്‍ട് മനസിലാക്കാം. സല്യൂട്ട്.

സിമി said...

പുതിയ ആള്‍ക്കാരെ പരിചയപ്പെടുത്തിയത് നന്നായി. ചിത്രകാരനു വാരവിചാരത്തില്‍ നീതി ലഭിക്കുന്നില്ല എന്നൊരു തോന്നല്‍.

shine said...

വാരഫലത്തിലൂടെ പരിചയപ്പെടുത്തിയതില്‍ സന്തോഷം. പലര്‍ക്കും പരസ്പരം അറിയാനും, തെറ്റുകള്‍ തിരുത്തി നന്നായി എഴുതാനും സഹായിക്കും. എല്ലാ ആശംസകളും.

സസ്നേഹം
കുട്ടേട്ടന്‍

Manu said...

ആരെങ്കിലും ഇത്തിരി കമന്റ് ഇവിടേയും വിതരണം ചെയ്യൂ ബൂലോക സാഹോദര്യമേ.... ഇല്ലെങ്കില്‍ “ബൂലോകത്തെ കമന്റ് കുംഭകോണം” എന്ന പേരില്‍ പോസ്റ്റിട്ട് വിചാരിപ്പ്കാരനും കൃതൃമമായി കമന്റു മഴ പെയ്യിക്കും..

ഇതുകലക്കി..:)))

പുതിയവരെ പരിചയപ്പെടുത്തുന്നത് നന്നായി :)

വിഷ്ണു പ്രസാദ് said...

വാരവിചാരത്തിന് ഒരു ഷേക്ക് ഹാന്‍ഡ്.

അബ്ദുല്‍ അലി said...

എല്ലാ വാരവും വായിക്കുന്നുണ്ട്‌.

ആശംസകള്‍.

चन्द्रशेखरन नायर said...

:)

കുറുമാന്‍ said...

മാഷെ ഇത്തവണത്തെ ലക്കം കലക്കി എന്ന് പറയാതെ വയ്യ. പ്രത്യേകിച്ചും പുതു ബ്ലോഗേഴ്സിനെ പരിചയപെടുത്തിയതില്‍ കാണിച്ച ശുഷ്കാന്തി.

മുരളി മേനോന്‍ (Murali Menon) said...

വായിച്ചു. സന്തോഷം

Cartoonist said...

അഞ്ചല്‍മേന്‍,
ഞാന്‍ വായിയ്ക്കുന്ന അപൂര്‍വം ബ്ലോഗുകളീല്‍ ഒന്നാണിത്. ഇത്തവണ ധാരാളം പേരെ പരിചയപ്പെടുത്തിയത് അവരും മറക്കില്ല.:)
മനോഹരമായ ഉദ്യമം !
പിന്നെ...
ഇയ്യാളെ അറിയുമോ -
http://keralahahaha.blogspot.com/2007/10/45.html

സ്നേഹപൂര്‍വം,
125കി.ഗ്രാം.

സാല്‍ജോҐsaljo said...

ഗുഡ് എഫര്‍ട്ട്... ആശംസകള്‍

SAJAN | സാജന്‍ said...

അഞ്ചല്‍‌സ്,
താങ്കളുടെ ഏഫര്‍ട്ട് തികച്ചും പ്രശംസയര്‍ഹിക്കുന്നു, സമയക്കുറവു കൊണ്ട് കാണാതെ പോകുന്ന ചില പോസ്റ്റുകള്‍ വായിക്കാന്‍ കഴിയുന്നത്
താങ്കളുടെ എഴുത്ത് മൂലമാണ്,എങ്കിലും ഇത്തരം ഒരു പോസ്റ്റില്‍‍ ഉണ്ടാവേണ്ട നിക്ഷ്പക്ഷത ഇതില്‍ കാണുന്നില്ല എന്നത് കൂട്ടിച്ചേര്‍ക്കേണ്ടിയിരിക്കുന്നു,
ഭീമ ഹര്‍‌ജി നല്‍‌കി ബ്ലോഗറെ തിരിച്ചെത്തിച്ചു എന്നൊക്കെ അല്‍‌പം അതിശയോക്തി അല്ലേ എന്നൊരു സംശയം:)

kaithamullu : കൈതമുള്ള് said...

വായിച്ചു, ഇഷ്ടപ്പെട്ടു.
:-)

ഏറനാടന്‍ said...

അഞ്ചല്‍ക്കാരാ.. താങ്കളുടെ ഉദ്യമം പ്രശംസനീയം തന്നെ. അഭിനന്ദനങ്ങള്‍,,.,

Snigdha Rebecca Jacob said...

ബൂലോകം പോയ വാരം ഇന്നാണ് എടുത്തു നോക്കുന്നത്. ഈ effort സമ്മതിക്കേണ്ടത് തന്നെ. ഇതു വായിച്ച് കുറെ നല്ല ബ്ലോഗുകളിലേക്ക് പോകാന്‍ ഒത്തു എന്നതാണ് ഇതിന്റെ വലിയ മേന്മ. വളരെ നന്ദി.

പ്രയാസി said...

അഞചല്‍കാരാ..
വാരഫലത്തില്‍ക്കൂടി കുറച്ചുകാര്യങ്ങള്‍ അറിയാന്‍ കഴിഞ്ഞു, പ്രത്യേകിച്ചു ഇക്കാസിന്റെ വിവാഹം..
ഇനി മുടങ്ങാതെ വായിക്കാം..
ആരെയും ഒഴിവാക്കാതെയുള്ള വിവരണമായതു കൊണ്ടു പ്രത്യേകിച്ചും..:)

sageer said...

വാരഫലത്തില്‍ക്കൂടി കുറച്ചുകാര്യങ്ങള്‍ അറിയാന്‍ കഴിഞ്ഞു, പ്രത്യേകിച്ചു ഇക്കാസിന്റെ വിവാഹം..നന്ദി.

കൊച്ചുത്രേസ്യ said...

നല്ല അവലോകനം.

പുതിയ ബ്ലോഗ്ഗേര്‍സിനെ പരിചയപ്പെടുത്താനുള്ള ശ്രമം നന്നായി.

സഹയാത്രികന്‍ said...

ഈ ലക്കവും നന്നായിരിക്കണൂ...

:)

അലിഫ് & ഷം‌ല said...

വാരഫലം ഇക്കുറിയും നന്ന്..യാത്രയ്ക്കിടെ നഷ്ടമായിപ്പോകുമായിരുന്ന പല ബൂലോക വാര്‍ത്തകളും ചൂട് മാറാതെ വിളമ്പയിരി‍ക്കുന്നത് ആസ്വാദ്യകരം, പ്രത്യേകിച്ച് ഇക്കാസ് ജാസൂട്ടി വിവാഹം.
നന്‍ണ്ട്രി അഞ്ചല്‍കാരാ..

തറവാടി said...

അഞ്ചല്‍ക്കാരാ ,

അരൊക്കെയോ കഴുത്തില്‍‌ കയറിട്ടിരിക്കുന്നെന്ന തോന്നലുണ്ടാക്കി ,
വെറും‌ തോന്നലായിരിക്കുമല്ലെ? :)


നന്നാവുന്നുണ്ട് ട്ടോ .

ഡി പ്രദീപ്‌ കുമാര്‍ D.PRADEEP KUMAR said...

സ്നേഹിതാ,
വാരവിചാരം വായിക്കാന്‍ നോക്കി കണ്ണു ഫ്യൂസായി.നഷ്ടപരിഹാരം വേണം.രു വഴി പറഞ്ഞു തരുമോ?

ഏ.ആര്‍. നജീം said...

പതിവായി വായിക്കുന്ന പോസ്റ്റുകളില്‍ ഒന്നാണ് വാരഫലം.. പുതിയ മാറ്റം എല്ലാവര്‍ക്കും ഇഷ്ടമായി എന്ന് കമന്റുകളില്‍ നിന്നും മനസിലായല്ലോ.. അഭിനന്ദനങ്ങള്‍

മയൂര said...

പുതിയ ആള്‍ക്കാരെ പരിചയപ്പെടുത്തിയത് നന്നായി...

ഉഗാണ്ട രണ്ടാമന്‍ said...

വളരെ വളരെ...പ്രയോജനപ്രദം... നന്ദി.